ମୁମ୍ବାଇ: କଙ୍ଗନା ରଣାୱତ ଚଳିତ ବର୍ଷ ବ୍ୟାକ ଟୁ ବ୍ୟାକ ଫିଲ୍ମ ନେଇ ଫେରିବେ । ଏହି କ୍ରମରେ ସାମିଲ ଅଛି ‘ଥଲାଇଭି’, ‘ଧାକଡ’ ଓ ‘ତେଜସ’ । ସେହିପରି ‘ଥଲାଇଭି’ରେ ସେ ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ଭୂମିକାରେ ନଜର ଆସିବେ । ଏହି ଫିଲ୍ମ ବ୍ୟତୀତ ସେ ଦେଶର ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ବାୟୋପିକ ‘ଏମର୍ଜେନ୍ସି’ରେ ମଧ୍ୟ ଦେଖାଯିବେ । ଇତିମଧ୍ୟରେ ଫିଲ୍ମକୁ ନେଇ ଆଉ ଏକ ଖବର ସାମ୍ନାକୁ ଆସିଛି ।
କଥାଟି ହେଲା ଯେ ଏହି ଫିଲ୍ମରେ ନିର୍ଦ୍ଦେଶନା ଦେଇଥାଆନ୍ତେ ନିର୍ଦ୍ଦେଶକ ସାଇ କବୀର । ହେଲେ ଏବେ ଲାଗୁଛି ସାଇ ଏହି ଦାୟିତ୍ବ ତୁଲାଇବେ ନାହିଁ । କାରଣ ତାଙ୍କ ହାତରୁ ଏହି ପଦ ଛଡାଇ ନେଇଛନ୍ତି କଙ୍ଗନା । ଆଜ୍ଞା ହଁ, ଫିଲ୍ମରେ ନିର୍ଦ୍ଦେଶନା ଦେବେ କଙ୍ଗନା ।
ହି ଅବସରରେ କଙ୍ଗନା ବୁଧବାର କହିଥିଲେ, ‘ମୋ ବ୍ୟତୀତ ଏହି ଫିଲ୍ମ ସହ କେହି ମଧ୍ୟ ନ୍ୟାୟ କରିପାରିବେ ନାହିଁ । ପୁଣିଥରେ ନିର୍ଦ୍ଦେଶନା ଦୁନିଆରେ ପାଦ ରଖି ଖୁସି ଅନୁଭବ କରୁଛି । ଏକ ବର୍ଷରୁ ଅଧିକ ସମୟ ମୁଁ ଏହି ଫିଲ୍ମରେ କାମ କରିବା ପରେ ମୋତେ ଲାଗୁଛି ଯେ ମୋ ଠାରୁ ଅନ୍ୟ କେହି ଏଥିରେ ଭଲ ନିର୍ଦ୍ଦେଶନା ଦେଇ ପାରିବେ ନାହିଁ । ଲେଖକ ରିତେଶ ଶାହଙ୍କ ସହ ଫିଲ୍ମରେ କାମ କରୁଛି । ଯଦି ମୋତେ ଏଥିପାଇଁ ଅଭିନୟ ସହ ଜଡିତ ବାକି କାର୍ଯ୍ୟକୁ ବଳି ଦେବାକୁ ପଡିବ, ତେବେ ମୁଁ ପ୍ରସ୍ତୁତ ।’
