ଇସଲାମାବାଦ: ପାକିସ୍ତାନ ଅନ୍ତର୍ଜାତୀୟ ଏୟାରଲାଇନ୍ସର ପିଛା ଛାଡୁନି ବିବାଦ । ପ୍ରଥମେ ବିମାନ ଦୁର୍ଘଟଣା ପରେ ଜାଲ ପାଇଲଟ ଲାଇସେନ୍ସ ଓ ଏବେ ସ୍ବତନ୍ତ୍ର ଉଡାଣ ଟିକେଟ ସ୍କାମ । ମଙ୍ଗଳବାର ଏନେଇ ବିଭାଗୀୟ ଅଧିକାରୀ ଖୁଲାସା କରି କହିଛନ୍ତି କି ୟୁରୋପକୁ ଉଡାଣ ପାଇଁ ସ୍ବତନ୍ତ୍ର ଟିକେଟ ସ୍କାମରେ କମ୍ପାନୀକୁ ପ୍ରାୟ 8 ମିଲିୟନ ଟଙ୍କାର କ୍ଷତି ମୁଣ୍ଡାଇବାକୁ ପଡିଛି ।
ସୂଚନା ମୁତାବକ ସିଆକୋଟସ୍ଥିତ ପିଆଇଏ କାର୍ଯ୍ୟାଳୟର କେତେକ ବିଭାଗୀୟ ଅଧିକାରୀ ବର୍ତ୍ତମାନର ଲାଗୁ କଟକଣା ସତ୍ତ୍ବେ ପ୍ୟାରିସ ଓ ଇଟାଲୀ ଯାତ୍ରା ପାଇଁ ପୁରୁଣା ଟିକେଟଧାରୀ ପ୍ରାୟ 50 ଜଣଙ୍କୁ ବିମାନ ସେବା ଯୋଗାଇଥିଲା । ତେବେ ନିୟମ ମୁତାବକ କୋରୋନା ସଂକ୍ରମଣର ପୂର୍ବରୁ ବୁକ ହୋଇଥିବା କୌଣସି ଟିକେଟରେ ଯାତ୍ରା ନକରାଇବାକୁ ସ୍ଥିର ହୋଇଥିବା ବେଳେ କେବଳ କିଛି ପଇସା ରୋଜଗାର ପାଇଁ ଅଧିକାରୀମାନେ ଏହି ନିୟମ ଉଲ୍ଲଙ୍ଘନ କରିଥିଲେ ।
ସେପଟେ ସ୍ବତନ୍ତ୍ର ଉଡାଣ ପାଇଁ ପିଆଇଏ ନିର୍ଦ୍ଧାରିତ ମୂଲ୍ୟର ଦୁଇଗୁଣା ଅର୍ଥ ଚାର୍ଜ କରି ପୁରୁଣା ଟିକେଟଧାରୀଙ୍କୁ ବିମାନ ସେବା ଯୋଗାଇଥିବା ତଥ୍ୟ ସାମ୍ନାକୁ ଆସିଥିଲା । ଏହି ଖବର ସାମ୍ନାକୁ ଆସିବା ପରେ ଉଚ୍ଚସ୍ତରୀୟ ଅଧିକାରୀମାନେ ଏନେଇ ତଦନ୍ତ ନିର୍ଦ୍ଦେଶ ଦେଇଥିଲେ । ଫଳରେ ପିଆଇଏକୁ ଏହି ସ୍କାମ ପାଇଁ ପ୍ରାୟ 8ମିଲିୟନ ଟଙ୍କାର କ୍ଷତି ସହିବାକୁ ପଡିଥିଲା ।
@IANS
