ନୂଆଦିଲ୍ଲୀ: ଦେଶରେ ଲୋକସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜନ ସଧାରଣଙ୍କ ହୃଦୟ ଜିତି ପ୍ରଚଣ୍ଡ ବହୁମତ ସହିତ ଦ୍ବିତୀୟ ଥର କ୍ଷମତାକୁ ଫେରିଥିବା ବେଳେ ଇସ୍ରାଏଲରେ ଏବେ ମୋଦିଙ୍କ ଦବଦବା ଦେଖିବାକୁ ମିଳିଛି ।
ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରି ଦେଇଛନ୍ତି । ଏହି ନିର୍ବାଚନର ଖାସ କଥା ହେଉଛି ଯେ ନେତାନ୍ୟାହୁ ନିଜ ପ୍ରଚାରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଋଷ ରାଷ୍ଟ୍ରପତି ପୁତିନଙ୍କ ପୋଷ୍ଟର ବ୍ୟବହାର କରୁଥିବା ଦେଖିବାକୁ ମିଳିଛି । ଏହି ପୋଷ୍ଟର ଜରିଆରେ ନେତାନ୍ୟାହୁ ନିଜ ବିଦେଶ ନୀତିର ଉପଲବ୍ଧିକୁ ଦର୍ଶାଇବାକୁ ପ୍ରୟାସ କରିଛନ୍ତି ।
ନେତାନ୍ୟାହୁ ବିଶ୍ବ ନେତାଙ୍କ ସହିତ ଭେଟୁଥିବା ସମୟର ଭିଡିଓ ଜାରି କରିଛନ୍ତି । ଭିଡିଓରେ ନେତାନ୍ୟାହୁ ପ୍ରଧାନମନ୍ତ୍ରୀ ମୋଦି, ଡୋନାଲ୍ଡ ଟ୍ରମ୍ପ ଓ ପୁତିନଙ୍କ ସହିତ ଭେଟୁଥିବା ନଜର ଆସିଛନ୍ତି ।
ଇସ୍ରାଏଲରେ ଚଳିତ ବର୍ଷ ଏପ୍ରିଲରେ ନିର୍ବାଚନ ହୋଇଥିଲା । ନିର୍ବାଚନରେ ନେତାନ୍ୟାହୁଙ୍କ ପାର୍ଟିକୁ ପୂର୍ଣ୍ଣ ବହୁମତ ମିଳିନଥିଲା । ମେଣ୍ଟ ଗଠନ କରିବାକୁ ମଧ୍ୟ ସେ ଅସମର୍ଥ ଥିଲେ । ଇସ୍ରାଏଲରେ ସେପ୍ଟେମ୍ବର ମାସରେ ପୁଣି ଥରେ ନିର୍ବାଚନ ହେବାକୁ ଅଛି ।
