ରାଉରକେଲା: ସମୟ ଯେତେ ଆଗକୁ ବଢିଲେ ବି ଲୋକଙ୍କ ମନରୁ ଦୂର ହୋଇନି ଗୁଣି ଗାରେଡି ଓ ଡାହାଣୀର ଅନ୍ଧବିଶ୍ବାସ । ଯାହାର ଏକ ନଜିର ଦେଖିବାକୁ ମିଳିଛି ସ୍ଥାନୀୟ ବଣାଇ ଥାନା ଅନ୍ତର୍ଗତ ଟିକିରାପୋଷ ଗାଁରେ । ଝିଅ ଘରକୁ ବୁଲି ଆସିଥିବା ସମୟରେ ଡାହାଣୀ ସନ୍ଦେହରେ ମା’କୁ ହତ୍ୟା କରିଛି ଦିଅର । ହତ୍ୟାକାଣ୍ଡ ପରେ ଘଟଣାସ୍ଥଳରୁ ଅଭିଯୁକ୍ତ ଫେରାର ଥିବାବେଳେ ଖବର ପାଇ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ ଟିକାୟତ ପାଲି ଥାନାର ଚିକଟନାଲି ଗ୍ରାମର ବନ୍ଧନୀ ଓରାମ ବୁଧବାର ନିଜ ଘରକୁ ବୁଲିବାକୁ ଯାଇଥିଲେ । ସନ୍ଧ୍ୟାରେ ଖିଆପିଆ ସାରି ସମସ୍ତେ ନିଆ ପୁଇଁ ହେଉଥିବାବେଳେ ହଠାତ୍ ଝିଅର ଦିଅର ରତିକାନ୍ତ ଓରାମ ବନ୍ଧନୀଙ୍କୁ ଟାଙ୍ଗିଆର ଆକ୍ରମଣ କରିଥିଲା । ଆକ୍ରମଣରେ ବନ୍ଧନୀଙ୍କର ମୃତ୍ୟୁ ହୋଇଥିବା ବେଳେ ଘଟଣାସ୍ଥଳରେ ଥିବା ଜଣେ ଦେଢ ବର୍ଷର ଶିଶୁ ଗୁରୁତର ହୋଇ ନିକଟସ୍ଥ ଡାକ୍ତରଖାନାରେ ଚିକିତ୍ସିତ ହେଉଛି । ସେପଟେ ଘଟଣା ପରେ ରତିକାନ୍ତ ଫେରାର ରହିଛି।
ଖବର ପାଇ ବଣାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି । ତେଣେ ପୂର୍ବରୁ ପରିବାର ଉପରେ ଗୁଣି ଗାରେଡି କରିବା ସହ ବନ୍ଧନୀ ଝିଅକୁ ତନ୍ତ୍ରମନ୍ତ୍ର ଶିଖାଉଥିବାରୁ ରତିକାନ୍ତ ତାଙ୍କୁ ହତ୍ୟା କରିବାର ଧମକ ଦେଉଥିବା ରତିକାନ୍ତଙ୍କ ବଡ ଭାଇ କହିଛନ୍ତି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
