କଟକ: ସମୟ ସହ ନାରୀ ସମାଜ ପ୍ରତି ସଭିଙ୍କ ବିଚାରଧାରା ବଦଳିଛି । ଆଗକୁ ପାଦ କାଢି ନାରୀ ସବୁ କ୍ଷେତ୍ରରେ ନିଜର ପରାକାଷ୍ଠା ଦେଖାଇବାରେ ସଫଳ ହୋଇଛି । ଖାଲି ଘରେ ନୁହେଁ ବରଂ ବାହାରେ ମଧ୍ୟ ପରିବାରକୁ ଚଳାଇଲା ଭଳି କ୍ଷମତା ରଖୁଛି ନାରୀ । ସେମିତି ଏକ ଉଦାହରଣ ସିଲଭର ସିଟି କଟକରେ ଦେଖିବାକୁ ମିଳିଛି । ଏବେ ଜୋମାଟୋ ଡେଲିଭରି ବଏ ନୁହେଁ ବରଂ ଡେଲିଭରି ଗାର୍ଲ କୁହନ୍ତୁ । କଟକ ସହରରେ ପ୍ରଥମ ଥର ଅନଲାଇନ୍ ଖାଦ୍ୟ ସାମଗ୍ରୀ ଡେଲିଭର୍ କରୁଛନ୍ତି ଜଣେ ଗାର୍ଲ । ପାଠ ପଢା ସହ ପରିବାର ପୋଷିବା ପାଇଁ ଅଣ୍ଟା ଭିଡିଛନ୍ତି କଟକର ବିଷ୍ଣୁପ୍ରିୟା ସ୍ବାଇଁ ।
ଅନଲାଇନ୍ କ୍ଲାସ୍ ସରିବା ପରେ ଗାଡି ଧରି ବାହାରି ପଡନ୍ତି ସେ, ପ୍ରାୟ 2-3 ଘଣ୍ଟା କାମ କରିବା ପରେ ପୁଣି ଆସି ପାଠ ପଢନ୍ତି । ସେପଟେ ବିଷ୍ଣୁପ୍ରିୟାଙ୍କ ଏହି ତ୍ୟାଗକୁ ସ୍ଥାନୀୟ ଲୋକେ ମଧ୍ୟ ସଲାମ୍ କରିଛନ୍ତି । ତାଙ୍କର ଏହି କାମ ଏବେ ସିଲଭରସିଟିର ଯୁବପିଢିଙ୍କ ପାଇଁ ସାଜିଛି ଏକ ବଡ଼ ଉଦାହରଣ । ତେବେ ବିଷ୍ଣୁପ୍ରିୟା ଏ ଯୁଦ୍ଧରେ ନିଶ୍ଚୟ ଜିତିବେ ବୋଲି ଆମର ଆଶା ।
କଟକରୁ ପ୍ରଭୁକଲ୍ୟାଣ ପାଲ୍, ଇଟିଭି ଭାରତ
