ଭୁବନେଶ୍ବର: ଭୁବନେଶ୍ବର ବିମାନ ବନ୍ଦରରୁ ସିଧା ସଳଖ ଦୁବାଇକୁ ବିମାନ ଉଡାଣ ଆରମ୍ଭ କରିବାକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ଏସ ପୁରୀଙ୍କୁ ଚିଠି ଲେଖିଛନ୍ତି ।
ଓଡିଶାର ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନ ବନ୍ଦରକୁ କେବଳ ବ୍ୟାଂକକ ସହ ସିଧାସଳଖ ବିମାନସେବା ରହିଛି । ଏହା ସହିତ ଦୁବାଇ ସହିତ ସିଧାସଳଖ ବିମାନ ଯାତ୍ରା ପାଇଁ ବହୁ ଦିନରୁ ଦାବି କରାଯାଉଛି ବୋଲି ଧର୍ମେନ୍ଦ୍ର ନିଜ ପତ୍ରରେ ଉଲ୍ଲେଖ କରିଛନ୍ତି ।
ୟୁଏଇର ବିଭିନ୍ନ ଭାଗରେ 15 ହଜାରରୁ ଉର୍ଦ୍ଧ୍ବ ଓଡିଆ ଲୋକ ବାସ ରହିଛନ୍ତି । ସେମାନେ ଓଡିଶାକୁ ଫେରିବା ବେଳେ ବିଭିନ୍ନ ବିମାନବନ୍ଦର ଦେଇ ଆସିବାକୁ ପଡୁଛି । ଏହା ଛଡା ଭୁବନେଶ୍ବର ଶିକ୍ଷା, ସ୍ବାସ୍ଥ୍ୟ, ସଂସ୍କୃତି ଓ ପର୍ଯ୍ୟଟନ ଆଦି କ୍ଷେତ୍ରରେ ବେଶ ପାରଦର୍ଶିତା ହାସଲ କରିଛି । ଏହି ବିମାନ ଚଳାଚଳ ଓଡିଶାର ପ୍ରଗତି କ୍ଷେତ୍ରରେ ବେଶ ସହାୟକ ହେବ । ତେଣୁ ବିମାନ ଚଳାଚଳ ପାଇଁ ବିଭାଗୀୟ ମନ୍ତ୍ରୀ ହସ୍ତକ୍ଷେପ କରିବାକୁ ଧର୍ମେନ୍ଦ୍ର ଅନୁରୋଧ କରିଛନ୍ତି ।
