ଭୁବନେଶ୍ବର: ପ୍ରବଳ ବର୍ଷାରେ ବେହାଲ ରାଜଧାନୀ । ସ୍ମାର୍ଟସିଟିର ରାଜରାସ୍ତାରେ ସୃଷ୍ଟି ହେଉଛି ନଦୀର ଭ୍ରମ । ଶୁକ୍ରବାର ଭୁବନେଶ୍ବରରେ ଭାରି ବର୍ଷା କାରଣରୁ ଜଳବନ୍ଦୀ ସମସ୍ୟା ଉପୁଜିଛି । ଫଳରେ ରାଜଧାନୀବାସୀ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ରାଜୀବଭବନ ଅଞ୍ଚଳରେ ସର୍ବାଧିକ 43.0 ମିମି ବର୍ଷା ରେକର୍ଡ ହୋଇଥିବାବେଳେ ଏୟାରପୋର୍ଟ ଅଞ୍ଚଳରେ 37.0 ମିମି ବର୍ଷା ରେକର୍ଡ କରାଯାଇଛି ।
ତେବେ ଗୋଟିଏ ପଟେ ମୁଖ୍ୟମନ୍ତ୍ରୀ ସ୍ମାର୍ଟସିଟିର ଡ୍ରେନେଜକୁ ଅଧିକ ବ୍ୟବସ୍ଥିତ କରିବା ପାଇଁ କୋଟି କୋଟି ଟଙ୍କାର ମଞ୍ଜୁର କରିଛନ୍ତି । ହେଲେ ଅସରାଏ ବର୍ଷା ପରେ ବେହାଲ ହୋଇପଡୁଛି ରାଜଧାନୀ । ତେଣୁ ସରକାରଙ୍କ ଟଙ୍କା କେଉଁ ବାଟରେ ଖର୍ଚ୍ଚ ହେଉଛି, ଏବେ ଏନେଇ ପ୍ରଶ୍ନ ଉଠିଛି । ଯଦି ରାଜଧାନୀରେ ଡ୍ରେନେଜ ବ୍ୟବସ୍ଥା ମଜବୁତ ଥାଆନ୍ତା, ତେବେ ଏଭଳି ସ୍ଥିତିକୁ ଏଡାଇ ଦିଆଯାଇପାରିଥାନ୍ତା । ପୂର୍ବରୁ ମଧ୍ୟ ଏନେଇ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ ନିଜର ଅସନ୍ତୋଷ ବ୍ୟକ୍ତି କରିଥିଲେ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
