ଭୁବନେଶ୍ବର: ହୁସିଆର ! ଆପଣଙ୍କ ଗାଡି ହୋଇପାରେ ଚୋରି । ଏଥିପାଇଁ ସର୍ବଦା ସତର୍କ ରହିବା ସହ ନିଜ ଗାଡି ଉପରେ ରଖନ୍ତୁ ସ୍ବତନ୍ତ୍ର ନଜର । ଗାଡିରେ ଡବଲ ଲକ ପକାଇବା ସହ ଚୋରି ହେବା ପ୍ରତି ଦିଅନ୍ତୁ ଧ୍ୟାନ, କାରଣ ଆପଣଙ୍କ ଗାଡି ଚୋରି ହୋଇଯିବାର ରହିଛି ଯଥେଷ୍ଠ ସମ୍ଭାବନା । ଆଉ ଚୋରା ଗାଡିରେ ଏବେ ଚାଲୁଛି ବ୍ରାଉନସୁଗାର ସ୍ମଗଲିଂ ଠୁ ଆରମ୍ଭ କରି ଗଞ୍ଜେଇ କାରବାର ଭଳି ଅନେକ ଅନୈତିକ କାର୍ଯ୍ୟ । ଏଥିସହ ବିଭିନ୍ନ ଛିନତାଇ ଓ ରାହାଜାନି ଭଳି ବେଆଇନ କାର୍ଯକଳାପ ମଧ୍ୟ ବଢିବାରେ ଲାଗିଛି ।
ବିଗତ କିଛି ଦିନ ଧରି ଶାନ୍ତ ରାଜଧାନୀ ଏବେ ଅପରାଧିକ କାର୍ଯ୍ୟକଳାପ ଯୋଗୁଁ ହୋଇପଡିଛି ଅଶାନ୍ତ । ଅପରାଧିମାନେ ଚୋରା ଗାଡିର କରୁଛନ୍ତି ଅପବ୍ୟବହାର । ଅର୍ଥାତ ଗାଡି ଚୋରି କରି ନମ୍ବର ବଦଳାଇ ନକଲି ନମ୍ବର ଲଗାଇ ବୁଲୁଛନ୍ତି ଏମାନେ । ସ୍ମାର୍ଟ ସିଟିର ସ୍ମାର୍ଟ ପୋଲିସକୁ ଚକମା ଦେଖାଇ ବେଧଡକ ଚୋରାକାରବାର କରୁଛନ୍ତି ଅପରାଧି । ଆଉ ଏହାର ଖୁଲାସା କରିଛି କମିସନରେଟ ପୋଲିସର ଲକ୍ଷ୍ମୀସାଗର ଥାନା ପୋଲିସ ।
ରାଜଧାନୀରେ ସଟଡାଉନ ଜାରି ରହିଥିବାବେଳେ ଝାରପଡା ଓଭରବ୍ରିଜ କଡରେ ଚେକିଙ୍ଗ୍ ସମୟରେ ଧରାପଡିଛନ୍ତି ତିନିଜଣ ଗାଡି ଚୋର । ଏମାନେ ବ୍ୟବହାର କରୁଥିବା ଗାଡିର ନମ୍ବର ଯାଞ୍ଚବେଳେ ସାମ୍ନାକୁ ଆସିଛି ପ୍ରକୃତ ସତ । ଅସଲି ବାଇକରେ ନକଲି ନନ୍ବର ପ୍ଲେଟ ଲଗାଇ ଅର୍ଥାତ ଅସଲି ନମ୍ବର ବଦଳାଇ ଏମାନେ ଚଲାଉଥିଲେ ଗାଡି । ଏହି ଗାଡି ସେହିଦିନ ସକାଳୁ ଓସ୍କାରସିଟିରୁ ଚୋରି ହୋଇଥିଲା ।ତେବେ ୩ଜଣଙ୍କ ମଧ୍ୟରେ ଜଣେ ବ୍ରାଉନସୁଗାର ବେପାରୀ ଥିବାବେଳେ ସେ ପୁର୍ବରୁ ମଧ୍ୟ ଗିରଫ ହୋଇଥିବା ଜଣାପଡିଛି । ତେବେ ପୋଲିସ ସନ୍ଦେହରେ ଥାନାରେ ପଚରାଉଚରା ସମୟରେ ୭ଟି ବାଇକର ସୁରାକ ମିଳିଥିଲା । ଏଥିମଧ୍ୟରୁ ୩ଟି ବାଇକର ନମ୍ବର ବଦଳାଇଦିଆଯାଇ ବ୍ୟବହାର କରାଯାଉଥିଲା । ତେବେ ରାଜଧାନୀରୁ ୭ଟି ବାଇକ ଜବତ ସହ ୩ ଜଣଙ୍କୁ ଗିରଫ କରିଛି ଲକ୍ଷ୍ମିସାଗର ଥାନା ପୋଲିସ । ଗିରଫ ଅଭିଯୁକ୍ତମାନେ ଲକ୍ଷ୍ମୀସାଗର ଅଞ୍ଚଳର ରବି ବେହେରା, ମହେଶ ସାହୁ, ସମିଲ ସିଂ ବୋଲି ଜଣାପଡିଛି । ୩ ଜଣଙ୍କୁ ଆପିସିର ଧାରା ୩୭୯ରେ ଗିରଫ କରି କୋର୍ଟ ଚାଲାଣ କରିଛି କମିସନରେଟ ପୋଲିସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
