ଭୋପାଳ: ନିକଟରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ପୌର ନିର୍ବାଚନ ପ୍ରଚାର ପାଇଁ ଛତରପୁର ଗସ୍ତ କରିଥିଲେ । ଏହି ସମୟରେ ମୁଖ୍ୟମନ୍ତ୍ରୀ ବିମାନ ବନ୍ଦରରେ କିଛି ସମୟ ଅଟକି ଥିଲେ । ସେଠାରେ ତାଙ୍କୁ ଚା' ପିଇବାକୁ ଦିଆଯାଇଥିଲା, ଯାହାକି ସ୍ବାଦହୀନ ଏବଂ ଥଣ୍ଡା ଥିଲା । ଏହି ଭୁଲ୍ ପାଇଁ ରାଜନଗରର କନିଷ୍ଠ ଯୋଗାଣ ଅଧିକାରୀଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି । ଏହି ନୋଟିସ୍ର କପି ବର୍ତ୍ତମାନ ସୋସିଆଲ ମିଡିଆର ଭାଇରାଲ ହେଉଛି । ଯାହାକୁ ନେଇ ମୁଖ୍ୟମନ୍ତ୍ରୀ ଶିବରାଜଙ୍କ ସମେତ ବିଜେପିକୁ କଟାକ୍ଷ କରିଛି ବିରୋଧି କଂଗ୍ରେସ ।
କଂଗ୍ରେସ ମୁଖ୍ୟମନ୍ତ୍ରୀଙ୍କୁ କଟାକ୍ଷ କରି ପଚାରିଛି ମାମାଜୀ, ଚା'ବାଲା ପ୍ରତି ଏତେ ଘୃଣା କାହିଁକି ? ଏଥିସହ ବିରୋଧି ଏହିଭଳି କିଛି ପୁରୁଣା କଥା ମଧ୍ୟ ଉଠାଇଛନ୍ତି । ପୂର୍ବରୁ ଇନ୍ଦୋରରେ ମୁଖ୍ୟମନ୍ତ୍ରୀଙ୍କୁ ଥଣ୍ଡା ଖାଦ୍ୟ ପରଷା ଯିବାରୁ ଖାଦ୍ୟ ଅଧିକାରୀଙ୍କୁ ନିଲମ୍ବିତ କରାଯାଇଥିଲା । ଆଉ ଥରେ, ସିଧି ସ୍ଥିତ ଗେଷ୍ଟହାଉସରେ ମୁଖ୍ୟମନ୍ତ୍ରୀଙ୍କୁ ମଶା କାଡିବାରୁ ଗେଷ୍ଟହାଉସ ଦାୟିତ୍ବରେ ଥିବା ଇଞ୍ଜିନିୟରଙ୍କ ଉପରେ ଏହିଭଳି କାର୍ଯ୍ୟାନୁଷ୍ଠାନ ନିଆଯାଇଥିଲା । ବର୍ତ୍ତମାନ ଏହି ଥଣ୍ଡା ଚା' ଘଟଣାକୁ ନେଇ ଚାରିଆଡେ ଚର୍ଚ୍ଚା ଜୋର ଧରିଛି । ସେପଟେ ସୋସିଆଲ ମିଡିଆରେ କାରଣ ଦର୍ଶାଅ ନୋଟିସ କପି ଭାଇରାଲ ହେବା ପରେ ସ୍ଥାନୀୟ ଜିଲ୍ଲାପାଳ ଏହାକୁ ଫେରସ୍ତ ନେଇଛନ୍ତି । ଯାହା ସୂଚନା ରହିଛି, ରାଜନଗରର କନିଷ୍ଠ ଯୋଗାଣ ଅଧିକାରୀ ରାକେଶ କହ୍ନେୱାଙ୍କୁ ଏସଡିଏମ ଏହି ନୋଟିସ୍ ଜାରି କରିଥିଲେ ଏବଂ ୨ ରୁ ୩ ଦିନ ଭିତରେ ଜବାବ ଦେବାକୁ ନିର୍ଦ୍ଦେଶ ଦେଇଥିଲେ ।
