କୋଲକାତା: ନିର୍ବାଚନ କମିସନ କୁଚବିହାର ଜିଲ୍ଲାରେ ରାଜନୈତିକ ବ୍ୟକ୍ତି କିମ୍ବା ଅନ୍ୟ କୌଣସି ବାହାର ଲୋକଙ୍କୁ 72 ଘଣ୍ଟା ପାଇଁ ପ୍ରବେଶ ଉପରେ କଟକଣା ଲଗାଇବା ପରେ ଜୋରଦାର ବର୍ଷିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ନିର୍ବାଚନ କମିସନ ନିର୍ବାଚନ ଆଚରଣ ବିଧିକୁ Model Code of Conduct କୁ ସଂଶୋଧନ କରି ' Modi Code of Conduct' କରନ୍ତୁ ବୋଲି ମମତା ବାନାର୍ଜୀ କହିଛନ୍ତି।
ଚତୁର୍ଥ ପର୍ଯ୍ୟାୟ ନିର୍ବାଚନ ବେଳେ କୁଚବିହାରରେ ଜିଲ୍ଲାରେ ହିଂସାରେ 4 ଜଣ ଟିଏମସି ସମର୍ଥକଙ୍କ ମୃତ୍ୟୁ ପରେ ସେଠାରେ ଯାଇ ମୃତଙ୍କ ପରିବାରକୁ ଭେଟିବା ପାଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀ ଘୋଷଣା କରିଥିଲେ । ଏହା ପରେ ନିର୍ବାଚନ କମିସନ କୁଚବିହାର ଜିଲ୍ଲାରେ 72 ଘଣ୍ଟା ପାଇଁ କୌଣସି ରାଜନୈତିକ ବ୍ୟକ୍ତି କମ୍ବା ବାହାର ଲୋକଙ୍କୁ ପ୍ରବେଶ ଉପରେ କଟକଣା ଜାରି କରିଥିଲେ ।
ସୂଚନାଥାଉକି, ଶନିବାର ପଶ୍ଚିମବଙ୍ଗରେ ଚତୁର୍ଥ ପର୍ଯ୍ୟାୟ ନିର୍ବାଚନ ଶେଷ ହୋଇଛି । ଏହି ପର୍ଯ୍ୟାୟରେ କୁଚବିହାରର ଜିଲ୍ଲାର ଦିନହାଟ ବିଧାନସଭା ଆସନର ସିତଲକୁଛି 126 ନଂ ବୁଥରେ ଦିନ 11.05 ସମୟରେ ଟିଏମସି ସମର୍ଥକ ମାନେ ଉତ୍ତେଜନା ସୃଷ୍ଟି କରିବା ସହ କେନ୍ଦ୍ରୀୟ ସୁରକ୍ଷାବଳ ସିଆଇଏସଏଫକୁ ଆକ୍ରମଣ କରିଥିଲେ । ଲୋକଙ୍କୁ ବୁଝାଇବାକୁ ଚେଷ୍ଟା କରିଥିଲେ ମଧ୍ୟ କେନ୍ଦ୍ରୀୟ ସୁରକ୍ଷାବଳର କଥାକୁ କେହି ଶୁଣି ନଥିଲେ । ଧୀରେ ଧୀରେ ହିଂସା ବୃଦ୍ଧି ପାଇବାରେ ଲାଗିଥିଲା ଏହା ପରେ ଲୋକଙ୍କ ସୁରକ୍ଷା ଏବଂ ସିଆଏସଏଫର ଆତ୍ମରକ୍ଷା ପାଇଁ ଗୁଳି ଚଳାଇଛି । ଏହି ଘଟଣାରେ 4 ଜଣ ଟିଏମସି ସମର୍ଥକ ପ୍ରାଣ ହରାଇଥିଲେ ।
ଏହି ଘଟଣା ପରେ ସ୍ବତନ୍ତ୍ର ପର୍ଯ୍ୟବେକ୍ଷକଙ୍କ ରିପୋର୍ଟ ପରେ ନିର୍ବାଚନ କମିସନ 72 ଘଣ୍ଟା କଟକଣା ସହ ସିତଲକୁଛିର 126 ନଂ ବୁଥର ମତଦାନ ସ୍ଥଗିତ ରଖିଛନ୍ତି । ସୁରକ୍ଷା ବ୍ୟବସ୍ଥାକୁ ଅଧିକ କଡାକଡି କରିବା ପାଇଁ ଅଧିକ ସଂଖ୍ୟାରେ ସୁରକ୍ଷାବଳୟ ପଠାଇଛନ୍ତି । ସେପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୁଚବିହାର ହିଂସା ଘଟଣାକୁ ଦୃଢ ନିନ୍ଦା କରିଛନ୍ତି । ଦୋଷୀଙ୍କୁ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ନିର୍ବାଚନ କମିଶନଙ୍କୁ କହିଛନ୍ତି । ପଶ୍ଚିମବଙ୍ଗରେ ଆଠଟି ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହେବାକୁ ଥିବାବେଳେ ବର୍ତ୍ତମାନ ପର୍ଯ୍ୟନ୍ତ 4ଟି ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହୋଇଛି । ଅପ୍ରେଲ 17ରେ ହେବ ପଞ୍ଚମ ପର୍ଯ୍ୟାୟନ ନିର୍ବାଚନ । ମେ 2ରେ ବାହାରିବ ଫଳାଫଳ ।
ବ୍ୟୁରୋ ରିପୋର୍ଟ,ଇଟିଭି ଭାରତ
