ନୂଆଦିଲ୍ଲୀ: ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ପୁଅ ତଥା ରାଜ୍ୟ ମନ୍ତ୍ରୀ ଥିବା ଉଦୟାନିଧି ଷ୍ଟାଲିନଙ୍କ ନାମରେ ଥିବା ଏକ ଫାଉଣ୍ଡେସନ ନାଁରେ ଆର୍ଥିକ ହେରଫେର ଅଭିଯୋଗ । ଆଜି ପ୍ରବର୍ତ୍ତନ ନିର୍ଦ୍ଦେଶାଳୟ ଫାଉଣ୍ଡେସନରେ ଚଢାଉ କରି ପ୍ରାୟ 36 କୋଟି ଟଙ୍କାର ସମ୍ପତ୍ତି ଜବତ କରିଛି । ଏହା ସହ ଫାଉଣ୍ଡେସନରେ ନାମରେ ବିଭିନ୍ନ ବ୍ୟାଙ୍କରେ ଜମା ହୋଇଥିବା 34.7 ଲକ୍ଷ ଟଙ୍କା ମଧ୍ୟ ପ୍ରବର୍ତ୍ତନ ନିର୍ଦ୍ଦେଶାଳୟ ଜବତ କରିଛି ।
ଚେନ୍ନାଇ ସେଣ୍ଚ୍ରାଲ କ୍ରାଇମ ବ୍ରାଞ୍ଚ-1 ଦ୍ବାରା କରାଯାଇଥିବା ଅଭିଯୋଗ ଆଧାରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ପ୍ରବର୍ତ୍ତନ ନିର୍ଦ୍ଦେଶାଳୟ କହିଛି । ନିକଟରେ ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ (PMLA)ର ବିଭିନ୍ନ ବିଭାଗ ଅଧୀନରେ କାଲାଲ୍ ଗ୍ରୁପ୍ ଏବଂ ବ୍ରିଟେନର ଲାଇକା ଗ୍ରୁପ୍ ଏବଂ ଏହାର ଭାରତୀୟ କମ୍ପାନୀ ଲାଇକା ପ୍ରଡକ୍ସନ୍ସ ଏବଂ ଲାଇକା ହୋଟେଲ ବିରୁଦ୍ଧରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । ଏଥିରେ ଅର୍ଥ ହେରଫେର ହୋଇଥିବା ତଦନ୍ତକାରୀ ସଂସ୍ଥା ଜାଣିବା ପରେ ତଦନ୍ତକୁ ବ୍ୟାପକ କରାଯାଇଥିଲା ।
ଏହି କମ୍ପାନୀର ଲିଙ୍କ୍ ଉଦୟାନିଧି ଷ୍ଟାଲିନ ଫାଉଣ୍ଡେସନ ସହ ଥିବା ଜଣାପଡିବା ପରେ ଏହା ଉପରେ ମଧ୍ୟ ପ୍ରବର୍ତ୍ତନ ନିର୍ଦ୍ଦେଶାଳୟ ଚଢାଉ କରିଛି । ପ୍ରଥମ ଅଭିଯୋଗ ଆଧାରରେ ତଦନ୍ତକାରୀ ସଂସ୍ଥା ଡିଜିଟାଲ୍ ପ୍ରମାଣ, ଦଲିଲ, ସମ୍ପତ୍ତି, ସନ୍ଦେହଜନକ ନଗଦ କାରବାର ଏବଂ ହାୱାଲା କାରବାର ଆକାରରେ ବିଭିନ୍ନ ଅପରାଧ ପ୍ରମାଣ ହାତେଇବା ପରେ ତଦନ୍ତର ସୁରାକ ଜରିଆରେ ଉଦୟାନିଧି ଷ୍ଟାଲିନ ଫାଉଣ୍ଡେସନ ପର୍ଯ୍ୟନ୍ତ ପହଞ୍ଚିଛି ।
