ନୂଆଦିଲ୍ଲୀ: ଆଶାରାମ ବାପୁଙ୍କ ଆଶ୍ରମରୁ ନାବାଳିକାଙ୍କ ମୃତଦେହ ଉଦ୍ଧାର । ଉତ୍ତର ପ୍ରଦେଶର ଗୋଣ୍ଡା ଜିଲ୍ଲାର ଜେଲରେ ଥିବା ବହୁଚର୍ଚ୍ଚିତ ବାବା ଆଶାରାମ ବାପୁଙ୍କ ମାଲିକାନାରେ ଥିବା ଆଶ୍ରମରେ ଜଣେ 13 ବର୍ଷୀୟ ନାବାଳିକାଙ୍କ ମୃତଦେହ ଉଦ୍ଧାର କରିଛି ପୋଲିସ । ନାବାଳିକା ଜଣଙ୍କ ଗତ 5 ତାରିଖରୁ ନିଖୋଜ ଥିଲେ ।
ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଉଦ୍ଧାର କରି ତଦନ୍ତ ଜାରି ରଖିଛି । ଗତ ଗୁରୁବାର ବିଳମ୍ବିତ ରାତିରେ ଆଶାରାମ ବାପୁଙ୍କ ଆଶ୍ରମ ପରିସରରେ ଥିବା ଏକ ଗାଡି ଭିତରୁ ନିଖୋଜ ନାବାଳିକାଙ୍କ ମୃତଦେହ ମିଳିଥିବା ପୋଲିସ ସୂଚନା ଦେଇଛି । ନାବାଳିକାଟି ଗତ 5ତାରିଖ ଉତ୍ତର ପ୍ରଦେଶର ଗୋଣ୍ଡା ଜିଲ୍ଲାର ନଗର କୋତୱାଲି ଅନ୍ତର୍ଗତ ଅଞ୍ଚଳରୁ ନିଖୋଜ ହୋଇଥିଲେ । ଝିଅ ନମିଳିବାରୁ ଗତ 7ତାରିଖ ଦିନ ପରିବାରଲୋକେ ତିନିଜଣଙ୍କ ନାମରେ ଥାନାରେ ଅଭିଯୋଗ କରିଥିଲେ । ଏହାପରେ ଗତ ଗୁରୁବାର ତାଙ୍କର ମୃତଦେହ ଉଦ୍ଧାର ହୋଇଛି । ଅନ୍ୟପଟେ ଘଟଣାର ତଦନ୍ତ ଜାରି ରହିଥିବାବେଳେ ଆଶ୍ରମର ସମସ୍ତ କର୍ମଚାରୀଙ୍କୁ ପଚରାଉଚରା କରୁଥିବା ଗୋଣ୍ଡା ଏସ୍ପି ସୂଚନା ଦେଇଛନ୍ତି ।
