ନୂଆଦିଲ୍ଲୀ: ରାଜଧାନୀର ନାଙ୍ଗଲ ଗାଁରେ ୯ ବର୍ଷ ଦଳିତ ନାବାଳିକା ଦୁଷ୍କର୍ମ ମାମଲାକୁ ନେଇ ରାଜନୀତି ସରଗରମ ହୋଇଛି । ତେବେ ଏହି ଘଟଣାକୁ ନେଇ ରାହୁଲ ଗାନ୍ଧୀ କେନ୍ଦ୍ର ସରକାରଙ୍କୁ ଟାର୍ଗେଟ କରି ଏକ ପୋଷ୍ଟ କରିଥିଲେ । ଏହି ପୋଷ୍ଟକୁ ନେଇ ବିବାଦ ଘନେଇବା ପରେ ଟ୍ବିଟର ଏହାକୁ ହଟାଇଥିବା ଜଣାପଡିଛି ।
ରାହୁଲଙ୍କ ଏହି ପୋଷ୍ଟରେ ପୀଡିତାଙ୍କ ପରିବାରର ପରିଚୟ ଜଣାପଡୁଥିଲା । କାରଣ ପୀଡିତାଙ୍କ ପରିବାର ସହିତ ଆଲୋଚନା ସମୟର ଫଟୋକୁ ରାହୁଲ ପୋଷ୍ଟ କରିଥିଲେ । ଘଟଣାକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରୁଥିବାବେଳେ ରାହୁଲ ନିଜେ ଫସିଯାଇଛନ୍ତି । ଏହି ଟ୍ବିଟରେ ରାହୁଲ ଲେଖିଥିଲେ ଯେ ପୀଡିତାଙ୍କ ପିତାମାତାଙ୍କ ଆଖିର ଲୁହ କେବଳ ନ୍ୟାୟ ମାଗୁଛି । ନ୍ୟାୟ ଦେବା ରାସ୍ତାରେ ସେ ପୀଡିତାଙ୍କ ପରିବାର ସହିତ ଅଛନ୍ତି ବୋଲି ପୋଷ୍ଟରେ ଲେଖିଥିଲେ । ଏହି ଫଟୋରେ ପୀଡିତାଙ୍କ ମାତାପିତାଙ୍କ ମୁହଁ ଦେଖାଯାଉଥିଲା । ଏହି ଘଟଣାକୁ ନେଇ କେନ୍ଦ୍ର ସରକାରଙ୍କୁ ରାହୁଲ ଟାର୍ଗେଟ କରିଥିବାବେଳେ ବିଜେପି ପୋଷ୍ଟକୁ ନେଇ ତାଙ୍କୁ ପାଲଟା ଘେରିଥିଲା ।
ବିଜେପି ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର ଏହି ପୋଷ୍ଟକୁ ନେଇ ରାହୁଲଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ । ରାଷ୍ଟ୍ରୀୟ ବାଲ ଅଧିକାର ସଂରକ୍ଷଣ ଆୟୋଗ(NCPCR) ଟ୍ବିଟର ନିକଟରେ ଅଭିଯୋଗ କରିଥିଲା । ରାହୁଲଙ୍କ ପୋଷ୍ଟ ୨୦୧୫ କିଶୋର ନ୍ୟାୟ ଆଇନ ଧାରା ୭୪ ଓ ଶିଶୁ ଯୌନ ଅପରାଧ ପ୍ରତିରୋଧ ନିୟମ ୨୩ର ଉଲ୍ଲଘଂନ ଥିଲା । ଏହାପରେ ଟ୍ବିଟର ରାହୁଲଙ୍କ ପୋଷ୍ଟକୁ ହଟାଇଥିବା ଜଣାପଡିଛି ।
@ANI
