ରାୟପୁର: ଛତିଶଗଡ ନିର୍ବାଚନରେ ଓଡି଼ଆ ପୁଅଙ୍କ ବିଜୟ । ରାୟପୁର ନଗର ଉତ୍ତର ବିଧାନସଭା ଆସନରୁ ବିଜୟୀ ହେଲେ ଏକମାତ୍ର ଓଡ଼ିଆ ପ୍ରାର୍ଥୀ ପୁରନ୍ଦର ମିଶ୍ର । ଚଳିତ ନିର୍ବାଚନରେ ପୁରନ୍ଦର ବିଜେପି ଟିକେଟରେ ରାୟପୁର ଉତ୍ତର ଆସନରୁ ପ୍ରତିଦ୍ବନ୍ଦିତା କରିଥିଲେ । ତାଙ୍କ ବିପକ୍ଷରେ କୁଲଦୀପ ଜୁନେଜାଙ୍କୁ ଛିଡା କରିଥିଲା କଂଗ୍ରେସ । ତେବେ ପ୍ରଥମ ଓଡ଼ିଆ ପ୍ରାର୍ଥୀ ଭାବେ ପୁରନ୍ଦର କଂଗ୍ରେସ ପ୍ରାର୍ଥୀ ଜୁନେଜାଙ୍କୁ ୨୩,୦୫୪ ଖଣ୍ଡ ଭୋଟରେ ହରାଇ ନିର୍ବାଚନରେ ବିଜୟ ଲାଭ କରିଛନ୍ତି । ଏହାକୁ ନେଇ ଛତିଶଗଡ ସ୍ଥିତ ଓଡ଼ିଆ ସମାଜରେ ଖୁସିର ଲହରୀ ଖେଳିଯାଇଛି ।
ଏଠାରେ ଉଲ୍ଲେଖଯୋଗ୍ୟ ଯେ, ପୁରନ୍ଦର ମିଶ୍ର ୩୫ ଲକ୍ଷ ଜନସଂଖ୍ୟାକୁ ପ୍ରତିନିଧିତ୍ବ କରୁଥିବା ଛତିଶଗଡ ସ୍ଥିତ ବୃହତ ଓଡିଆ ସମାଜର ସଭାପତି ଏବଂ ଜଣେ ବିଶିଷ୍ଟ ସମାଜସେବୀ ଅଟନ୍ତି । ସେ ଛତିଶଗଡ ଉତ୍କଳ ବ୍ରାହ୍ମଣ ସମାଜ ସଂରକ୍ଷକ ଅଧ୍ୟକ୍ଷ ସଙ୍ଗେ ସଙ୍ଗେ ରାୟପୁରରେ ଥିବା ଜଗନ୍ନାଥ ମନ୍ଦିର ସେବା ସମିତିର ସଂସ୍ଥାପକ ମଧ୍ୟ ଅଟନ୍ତି । ଯାହାକି ତାଙ୍କର ନିର୍ବାଚନ ମଣ୍ଡଳୀ ପରିସରରେ ଆସୁଛି । ବର୍ତ୍ତମାନ ସେ ଛତିଶଗଡ ରାଜ୍ୟ ବିଜେପି କାର୍ଯ୍ୟକାରିଣୀ ସଦସ୍ୟ ଭାବେ କାର୍ଯ୍ୟ କରୁଛନ୍ତି । ଏହାସହିତ ସେ ଆସାମ, ଝାଡଖଣ୍ଡ, ଓଡ଼ିଶା, ଗୁଜୁରାଟର ଲୋକସଭା ଓ ବିଧାନସଭା ନିର୍ବାଚନରେ ବିଜେପି ପର୍ଯ୍ୟବେକ୍ଷକ ରୂପେ କାର୍ଯ୍ୟ କରିସାରିଛନ୍ତି ।
ଏହା ମଧ୍ୟ ପଢନ୍ତୁ: ତେଲେଙ୍ଗାନା କଂଗ୍ରେସରେ ସିଏମ୍ ରେସ୍: ସବୁଠୁ ଆଗରେ ପିସିସି ସଭାପତି ରେଭାନ୍ତ
ଏହା ମଧ୍ୟ ପଢନ୍ତୁ: ଛତିଶଗଡ଼ରେ ବିଜେପି ଆଗୁଆ, ରମଣ କହିଲେ ବିଜେପି ଲୋକଙ୍କ ବିଶ୍ୱାସ ଜିତିଛି
ପୁରନ୍ଦର ଗତ ୨୫ ବର୍ଷ ଧରି ନିଶା ମୁକ୍ତ ଅଭିଯାନ ଚଳାଇ ୨୨ ହଜାର ୬୫୦ ଲୋକଙ୍କୁ ନିଶା ସେବନରୁ ନିବୃତ୍ତ କରିପାରିଛନ୍ତି । ୧୯୫୯ ମସିହା ଜାନୁୟାରୀ ୩ ତାରିଖରେ ପୁରୋନ୍ଦର ମିଶ୍ରଙ୍କ ଜନ୍ମ । ତାଙ୍କ ବାପାଙ୍କ ନାମ ଗୌତମ ମିଶ୍ର ଓ ମାଆ ଗୁଫା ଦେବୀ ମିଶ୍ର । ତାଙ୍କର ଜେଜେବାପା ତ୍ରିଲୋଚନ ପ୍ରସାଦ ମିଶ୍ର ଜଣେ ସ୍ବାଧୀନତା ସଂଗ୍ରାମୀ ଥିଲେ । ପୁରନ୍ଦର ଏଲଏଲବି ପାସ୍ କରିବା ସହିତ ଆୟକର ପରାମର୍ଶଦାତା ଭାବେ କାର୍ଯ୍ୟ କରିଛନ୍ତି । ସେ ଓଡ଼ିଶାର ମୂଳ ବାସିନ୍ଦା ହୋଇଥିବା ବେଳେ ବର୍ତ୍ତମାନ ରାୟପୁରର ଶଙ୍କର ନଗର ଅଞ୍ଚଳରେ ରହୁଛନ୍ତି ।
ରାୟପୁର ଉତ୍ତର ବିଧାନସଭା ସିଟ୍ ରାଜ୍ୟର ହାଇପ୍ରୋଫାଇଲ ସିଟ୍ ମଧ୍ୟରୁ ଅନ୍ୟତମ। ୨୦୧୮ ବିଧାନସଭା ନିର୍ବାଚନରେ ଏହି ଆସନ କଂଗ୍ରେସ ଦଖଲକୁ ଯାଇଥିଲା । ଚଳିତ ନିର୍ବାଚନରେ କଂଗ୍ରେସ ଏଠାରୁ କୁଲଦୀପ ଜୁନେଜାଙ୍କୁ ଟିକେଟ ଦେଇଥିଲା । ଜୁନୋଜଙ୍କୁ ଟକ୍କର ଦେବାକୁ ବିଜେପି ବିଶିଷ୍ଟ ସମାଜସେବୀ ପୁରନ୍ଦର ମିଶ୍ରଙ୍କୁ ପ୍ରାର୍ଥୀ କରିଥିଲା । ଫଳସୂରୁପ ବହୁମତ ସହିତ ପୁରନ୍ଦର କଂଗ୍ରେସ ହାତରୁ ରାୟପୁର ଉତ୍ତର ଆସନ ଛଡାଇ ନେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
