ନୂଆଦିଲ୍ଲୀ: ଆଇଏନଏକ୍ସ ମିଡିଆ ଦୁର୍ନୀତି ମାମଲାରେ ବରିଷ୍ଠ କଂଗ୍ରେସ ନେତା ପି ଚିଦାମ୍ବରମକୁ ଝଟକା । 4 ଦିନିଆ ରିମାଣ୍ଡରେ ନେବା ପାଇଁ ସିବିଆଇକୁ ଅନୁମତି ଦେଲେ ସ୍ବତନ୍ତ୍ର କୋର୍ଟ । ଆସନ୍ତା 26 ପର୍ଯ୍ୟନ୍ତ ଚିଦାଙ୍କୁ ହେପାଜତରେ ନେଇ ଜେରା କରିବ ସିବିଆଇ । ପ୍ରତିଦିନ 30 ମିନିଟ ପରିବାର ଓ ଓକିଲ ଚିଦାଙ୍କୁ ଭେଟିବା ନେଇ ଅନୁମତି ଦେଇଛନ୍ତି କୋର୍ଟ । କିଛି ସମୟ ପୂର୍ବରୁ ଚିଦାମ୍ବରମଙ୍କୁ 5 ଦିନିଆ ରିମାଣ୍ଡରେ ନେବାକୁ ଦାବି କରିଥିବା ସିବିଆଇର ଆବେଦନକୁ ସଂରକ୍ଷିତ ରଖିଥିଲେ କୋର୍ଟ ।
ସେହିପରି ପ୍ରବର୍ତ୍ତନ ନିର୍ଦ୍ଦେଶାଳୟ ବିରୋଧରେ ପି ଚିଦାମ୍ବରମ କରିଥିବା ଆବେଦନର ଶୁଣାଣି ଆସନ୍ତା 27 ତାରିଖରେ ସୁପ୍ରିମକୋର୍ଟରେ ହେବ। ସେହିଭଳି ସିବିଆଇ ବିରୋଧରେ କରାଯାଇଥିବା ଯାଚିକାର ଶୁଣାଣି ଆସନ୍ତାକାଲି ଠାରୁ ହେବ ।
ଏହି ମାମଲାରେ ଆଜି ସକାଳୁ ଆରମ୍ଭ ହୋଇଥିଲା ଶୁଣାଣି । ସିବିଆଇକୁ ସେ ଅସହଯୋଗ କରୁଥିବା ଶୁଣାଣି ସମୟରେ ସାଲିସିଟର ଜେନେରାଲ ଅଭିଯୋଗ କରିଥିଲେ । ଅନ୍ୟପଟେ ମାମଲାରେ କୌଣସି ପ୍ରମାଣ ନ ଥାଇ ତାଙ୍କୁ ଗିରଫ କରାଯାଇଥିବା କହିଥିଲେ ଚିଦାଙ୍କ ଓକିଲ କପିଲ ଶିବଲ ।
ସିବିଆଇ ପକ୍ଷରୁ ସାଲିସିଟର ଜେନେରାଲ ତୁଷାର ମେହେଟ୍ଟା ଓ ପି ଚିଦାମ୍ବରମଙ୍କ ପକ୍ଷରୁ କପିଲ ଶିବଲ ମାମଲାର ପରିଚାଳନା କରୁଥିଲେ । ଏହି ମାମଲାରେ କୌଣସି ପ୍ରମାଣ ନ ଥିବା ଚିଦାଙ୍କ ଓକିଲ ଶିବଲ କହିଛନ୍ତି । କେବଳ ଚାର୍ଜସିଟ ଆଧାରରେ ତାଙ୍କୁ ଗିରଫ କରାଯାଇଥିବା ସେ କହିଛନ୍ତି । ବୁଧବାର ରାତିରେ ତାଙ୍କ ବାସଭବନରୁ ଚିଦାମ୍ବରମଙ୍କୁ ଗିରଫ କରିଥିଲା ସିବିଆଇ । ଆଇଏନଏକ୍ସ ମିଡିଆ ଦୁର୍ନୀତି ମାମଲାରେ ସୁପ୍ରିମକୋର୍ଟରୁ ଚିଦାଙ୍କୁ ସୁରକ୍ଷା ନ ମିଳିବା ପରେ ଉଭୟ ସିବିଆଇ ଓ ଇଡି ତାଙ୍କୁ ଗିରଫ କରିବା ପାଇଁ ବାସଭବନରେ ପହଞ୍ଚିଥିଲେ ।
ପ୍ରବର୍ତ୍ତନ ନିର୍ଦ୍ଦେଶାଳୟ ବିରୋଧରେ ବରିଷ୍ଠ କଂଗ୍ରେସ ନେତା ପି ଚିଦାମ୍ବରମ କରିଥିବା ପିଟିସନର ଶୁଣାଣୀ ଆସନ୍ତା 27 ତାରିଖରେ ସୁପ୍ରିମକୋର୍ଟରେ ହେବ। ସେହିଭଳି ସିବିଆଇ ବିରୋଧରେ କରାଯାଇଥିବା ପିଟିସନର ଶୁଣାଣୀ ଆସନ୍ତାକାଲିଠାରୁ ହେବ ।
