ନୂଆଦିଲ୍ଲୀ: ରାଜ୍ୟସଭାରେ ଅନାଥ ପିଲାଙ୍କ ପ୍ରସଙ୍ଗ ଉଠାଇଛନ୍ତି ସାଂସଦ ପ୍ରସନ୍ନ ଆଚାର୍ଯ୍ୟ । ପ୍ରତ୍ୟେକ ଶିଶୁ ଦେଶର ଉଜ୍ଜଳ ଭବିଷ୍ୟତ ହୋଇଥିବାବେଳେ ଅନାଥ ଶିଶୁ ମାନେ ରାସ୍ତାରେ ବିଭିନ୍ନ ସାମଗ୍ରୀ ଗୋଟାଇ ବଞ୍ଚୁଥିବା ଦେଖାଯାଏ । ଏମାନଙ୍କର କେହି ନଥାନ୍ତି । ତେଣୁ ଏହି ପିଲାଙ୍କ ପ୍ରତି ସରକାର ଧ୍ୟାନ ଦିଅନ୍ତୁ ବୋଲି ସେ ଦାବି କରିଛନ୍ତି ।
ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟ
ଅନେକ ଅନାଥ ପିଲା ଶିକ୍ଷା ଅଭାବରୁ ଅସାମାଜିକ ହୋଇଯାଉଛନ୍ତି । ଏଥି ପାଇଁ ସରକାର ସ୍ବତନ୍ତ୍ର ବ୍ୟବସ୍ଥା କରିବା ସହିତ ସେମାନଙ୍କ ସ୍ବାସ୍ଥ୍ୟ, ଶିକ୍ଷା ଓ ରହିବାର ସୁବିଧା ଦେବାକୁ ବିଶେଷ ଭାବେ ଧ୍ୟାନ ଦିଆଯାଉ ବୋଲି ସାଂସଦ କହିଛନ୍ତି । ସେହିପରି ଏମାନଙ୍କ ଉନ୍ନତି ପାଇଁ ସ୍ବତନ୍ତ୍ର ପଦକ୍ଷେପ ନେବାକୁ ସେ ଦାବି କରିଛନ୍ତି ।
ଏହାସହ ଦେଶରେ ପାଖାପାଖି 1 ବର୍ଷରୁ 17 ବର୍ଷ ମଧ୍ୟରେ 31 ମିଲିୟନ ଅନାଥ ପିଲା ଭାରତରେ ଥିବା ଏକ ସର୍ଭେରୁ ଜଣାପଡିଛି ବୋଲି ସେ ଦର୍ଶାଇଛନ୍ତି । ଏହାକୁ ଦୃଷ୍ଟିରେ ରଖି ସରକାର ପଦକ୍ଷେପ ନିଅନ୍ତୁ ବୋଲି ସାଂସଦ କହିଛନ୍ତି ।
