ନୂଆଦିଲ୍ଲୀ: ପୁଣି ଡରାଉଛି କୋରୋନା ଭାଇରସ । ବ୍ରିଟେନରୁ ଫେରିଥିବା 11 ଯାତ୍ରୀ କୋରୋନା ସଂକ୍ରମିତ ହୋଇଥିବା ସୂଚନା ମିଳିଛି । ଆଜି(ବୁଧବାର) ବ୍ରିଟେନ ଫେରନ୍ତାଙ୍କ ମଧ୍ୟରୁ ଦିଲ୍ଲୀରେ 6 ଜଣ କୋରୋନା ପଜିଟିଭ ଚିହ୍ନଟ ହୋଇଛନ୍ତି । ମଙ୍ଗଳବାର 5ଶହରୁ ଅଧିକ ଲୋକ ବ୍ରିଟେନରୁ ଫେରିଥିଲେ। ଦିଲ୍ଲୀ ଏୟାରପୋର୍ଟରେ ପହଞ୍ଚିବା ପରେ ଯାତ୍ରୀଙ୍କ ଆରଟି-ପିସିଆର ଟେଷ୍ଟ ହୋଇଥିଲା ।
ଆରଟି-ପିସିଆର ଟେଷ୍ଟ ବେଳେ ମଙ୍ଗଳବାର 5 ଜଣ କୋରୋନା ସଂକ୍ରମିତ ହୋଇଥିଲେ । ଆଜି(ବୁଧବାର) 6 ଜଣ କୋରୋନା ସଂକ୍ରମିତ ଚିହ୍ନଟ ହେବାପରେ ଏହି ସଂଖ୍ୟା 11ରେ ପହଞ୍ଚିଛି । କୋରୋନା ସଂକ୍ରମିତଙ୍କ ନମୁନା ରୋଗ ନିୟନ୍ତ୍ରଣ ପାଇଁ କେନ୍ଦ୍ର (center for disease control)କୁ ପଠାଯାଇଛି । ଏମାନେ ନୂଆ ଷ୍ଟ୍ରେନ କୋରୋନା ସଂକ୍ରମିତ ହୋଇଛନ୍ତି କି ନାହିଁ ସେନେଇ ପରୀକ୍ଷା କରାଯିବ।
11 ଜଣ କୋରୋନା ସଂକ୍ରମିତ ଚିହ୍ନଟ ହେବା ପରେ ଦିଲ୍ଲୀରେ ଆଲର୍ଟ ଜାରି ହୋଇଛି । ବର୍ତ୍ତମାନ ସୁଦ୍ଧା ସଂକ୍ରମିତଙ୍କ କୋରୋନା ପ୍ରକାର ଭେଦ ଜଣା ପଡ଼ିନାହିଁ । ସୋମବାର ଓ ମଙ୍ଗଳବାର ଦିନ ବ୍ରିଟେନରୁ ଦିଲ୍ଲୀକୁ 950ରୁ ଅଧିକ ଯାତ୍ରୀ ଫେରିଛନ୍ତି । ଏମାନେ ବ୍ରିଟେନର ଚାରୋଟି ଭିନ୍ନଭିନ୍ନ ସ୍ଥାନରୁ ଦିଲ୍ଲୀ ଫେରିଥିବା ନେଇ ସୂଚନା ମିଳିଛି । ବର୍ତ୍ତମାନ ସୁଦ୍ଧା 50 ଜଣଙ୍କୁ ସଙ୍ଗରୋଧରେ ରଖାଯାଇଥିବା ବେଳେ ଅନ୍ୟମାନଙ୍କୁ ନିଜକୁ ଆଇସୋଲେଟ କରି ରଖିବାକୁ କୁହାଯାଇଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
