ଲକ୍ଷ୍ନୌ: ପାଖେଇ ଆସୁଛି ଉତ୍ତରପ୍ରଦେଶ ବିଧାନସଭା ନିର୍ବାଚନ । ୭ଟି ପର୍ଯ୍ୟାୟରେ ହେବ ମତଦାନ । ୧୦ରେ ପ୍ରଥମ ପର୍ଯ୍ୟାୟ ନିର୍ବାଚନ ଥିବାବେଳେ ଏଥିରେ ପ୍ରତିଦ୍ବନ୍ଦ୍ବିତା କରୁଛନ୍ତି ୬୧୫ ପ୍ରାର୍ଥୀ । ତେବେ ଏହି ପ୍ରାର୍ଥୀଙ୍କ ମଧ୍ୟରୁ ୧୫୬ ଜଣ ବା ୨୫ ପ୍ରତିଶତ ପ୍ରାର୍ଥୀଙ୍କ ବିରୁଦ୍ଧରେ ଗୁରୁତର ଅପରାଧିକ ମାମଲା ରହିଛି । ଆସୋସିଏନସନ ଫର୍ ଡେମୋକ୍ରାଟିକ ରିଫର୍ମସ(ADR) ରିପୋର୍ଟରେ ଏହା କୁହାଯାଇଛି ।
ପ୍ରଥମ ପର୍ଯ୍ୟାୟରେ ୫୮ ଆସନ ପାଇଁ ନିର୍ବାଚନ ଦୌଡରେ ମୋଟ ୬୨୩ ପ୍ରାର୍ଥୀ ରହିଛନ୍ତି । କ୍ରିମିନାଲ ହିଷ୍ଟ୍ରି ଥିବା ୧୫୬ ଜଣଙ୍କ ମଧ୍ୟରୁ ୬ ଜଣ ନାଁରେ ହତ୍ୟା ମାମଲା, ୩୦ ବିରୁଦ୍ଧରେ ହତ୍ୟା ଉଦ୍ୟମ ଭଳି ସଙ୍ଗୀନ ମାମଲା ରହିଛି । ସେଥି ମଧ୍ୟରୁ ୧୨ ଜଣ ମହିଳା ବିରୋଧି ହିଂସା ଏବଂ ଜଣେ ଦୁଷ୍କର୍ମ ମାମଲାରେ ସମ୍ପୃକ୍ତ ଅଛନ୍ତି ।
ADR ଅନୁସାରେ, ସମାଜବାଦୀ ପାର୍ଟିର ୨୮ ପ୍ରାର୍ଥୀଙ୍କ ଭିତରୁ ୨୧ (୭୫ %), ରାଷ୍ଟ୍ରୀୟ ଲୋକ ଦଳର ୨୯ ପ୍ରାର୍ଥୀଙ୍କ ମଧ୍ୟରୁ ୧୭(୫୯%), ବିଜେପିର ୫୭ ମଧ୍ୟରୁ ୨୯ (୫୧%), କଂଗ୍ରେସର ୫୮ ପ୍ରାର୍ଥୀରୁ ୨୧(୩୬%), ବହୁଜନ ସମାଜ ପାର୍ଟିର ୫୭ ଜଣଙ୍କ ମଧ୍ୟରୁ ୧୯(୩୪%) ଏବଂ ଆମ୍ ଆଦମୀ ପାର୍ଟିର ୫୨ ପ୍ରାର୍ଥୀଙ୍କ ମଧ୍ୟରୁ ୮(୧୫%) ଜଣ ସତ୍ୟପାଠରେ ସେମାନଙ୍କ ବିରୁଦ୍ଧରେ ଥିବା ଅପରାଧିକ ମାମଲା ଥିବା ଘୋଷଣା କରିଛନ୍ତି ।
