ମଉଳି ଗଲା ହୋଲି ମାହୋଲ, ନଦୀରେ ବୁଡ଼ି ଯୁବକ ମୃତ - Young Men Drowned To Death In River

Young Man Drowned To Death ଢେଙ୍କାନାଳ: ମଉଳି ଗଲା ହୋଲି ଖେଳ ଖୁସିର ମାହୋଲ । ସାଙ୍ଗମାନଙ୍କ ସହିତ ହୋଲି ଖେଳି ମସଗୁଲ ଥିବା ଯୁବକ ଗାଧୋଇବା ବେଳେ ନଦୀରେ ବୁଡ଼ିଗଲେ । ପରେ ଗ୍ରାମବାସୀ ନଦୀରୁ ଯୁବକଙ୍କ ମୃତଦେହ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିବା ଜଣାପଡିଛି । ଏଭଳି ଏକ ଅଭାବନୀୟ ଘଟଣା ଘଟିଛି ଢେଙ୍କାନାଳ ଜିଲ୍ଲା ରାସୋଳ ଥାନା ଅନ୍ତର୍ଗତ କଦଳୀପାଳ ଗ୍ରାମରେ ।

ସୂଚନା ଅନୁସାରେ,  କଦଳୀପାଳ ଗ୍ରାମରେ ହୋଲି ଅବସରରେ ଆଜି ଯୁବକମାନେ ହୋଲି ଖେଳିବା ପରେ ଗାଁ ପାଖରେ ଥିବା ସାପୁଆ ନଦୀକୁ ଗାଧୋଇବାକୁ ଯାଇଥିଲେ । କିଛି ଯୁବକ ସାଙ୍ଗ ହୋଇ ନଦୀରେ ଗାଧୋଇବା ସମୟରେ ଜଣେ ଯୁବକ ପାଣିରେ ବୁଡି ଯାଇଥିଲେ । ଗ୍ରାମବାସୀଙ୍କ ସହାୟତାରେ ତାଙ୍କୁ ଖୋଜା ଖୋଜି କରି ଉଦ୍ଧାର କରାଯାଇଥିଲା । ପ୍ରଥମେ ଯୁବକଙ୍କୁ ଭାପୁର ଡାକ୍ତରଖାନା ଓ ପରେ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ ଗ୍ରାମବାସୀ । ମାତ୍ର ନଦୀରେ ବୁଡିଯିବାରୁ ଯୁବକଙ୍କର ମୃତ୍ୟୁ ଘଟିଥିବା ଡାକ୍ତରଖାନା ସୂତ୍ରରୁ ଜଣାପଡ଼ିଛି । ମୃତ ଯୁବକ ଜଣଙ୍କ କଦଳୀପାଳ ଗ୍ରାମର ବୈକୁଣ୍ଠ ସାହୁ ଓ ତାଙ୍କ ବୟସ ୩୨ ବର୍ଷ ବୋଲି ଜଣାପଡିଛି । ତେବେ ତାଙ୍କ ସହ ନଦୀରେ ଗାଧୋଉ ଥିବା ଅନ୍ୟ ଯୁବକମାନେ ସୁରକ୍ଷିତ ଅଛନ୍ତି । ସେପଟେ ଖବର ପାଇ ରାସୋଳ ଥାନା ପୋଲିସ ପହଞ୍ଚି ମୃତଦେହକୁ ବ୍ୟବଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛି ।  ଏହି ଘଟଣା ପରେ କଦଳୀପାଳ ଅଞ୍ଚଳରେ ହୋଲି ପର୍ବର ମହୋଲ ସମ୍ପୂର୍ଣ୍ଣ ଫିକା ପଡି ଯାଇଥିବା ବେକେ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି। 

ଇଟିଭି ଭାରତ, ଢେଙ୍କାନାଳ