ଭାଲୁ ଘଉଡ଼ାଇବା ବେଳେ ଅଘଟଣ, ଟ୍ରାଙ୍କୁଲାଇଜ ଗୁଳି ବାଜି ଫରେଷ୍ଟର ଗୁରୁତର - Forester tranquilizer

FORESTER TRANQUILIZER: ଢେଙ୍କାନାଳ: କେରଜୁଳି ଗାଁରେ ଭାଲୁ ଆତଙ୍କ । ବନ ବିଭାଗ ଭାଲୁକୁ ଟ୍ରାଙ୍କୁଲାଇଜ କରିବା ସମୟରେ ଫରେଷ୍ଟରଙ୍କୁ ବାଜିଲା ଟ୍ରାଙ୍କୁଲାଇଜ ଗୁଳି । ଗୁରୁତର ଫରେଷ୍ଟର ଜଣକ ହେଲେ ଢେଙ୍କାନାଳ ବିରାଶାଳ ସେକ୍ସନର ଫରେଷ୍ଟର ଦୀପକ ସାହୁୁ । ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।

ଆଜି (ମଙ୍ଗଳବାର) ଦିନ ୯ଟାରେ ନିକଟସ୍ଥ ଜଙ୍ଗଲରୁ କେରଜୁଳି ଗ୍ରାମକୁ ଭାଲୁଟି ପିଶିଥିଲା । ପରେ ଗ୍ରାମବାସୀ ଦେଖି ବନ ବିଭାଗକୁ ଖବର ଦେଇଥିଲେ । ବନ ବିଭାଗ ଟିମ୍‌ ପହଞ୍ଚି ଭାଲୁକୁ ଘଉଡାଇବାକୁ ଉଦ୍ୟମ କରି ବିଫଳ ହୋଇଥିଲେ । ପରେ ସଙ୍ଗେ ସଙ୍ଗେ କପିଳାଶ ରାପିଡ ରେସ୍କ୍ୟୁ ଟିମକୁ (RRT) ଡକାଇଥିଲେ । ଟିମ୍‌ ପହଞ୍ଚି ଟ୍ରାଙ୍କୁଲାଇଜ ପ୍ରକ୍ରିୟା ଆରମ୍ଭ କରିଥିଲା । ସେଥିରେ ଭାଲୁଟି ଅଚେତ୍ ନହେବା ଫଳରେ ଦ୍ୱିତୀୟ ଡୋଜ ଟ୍ରାଙ୍କୁଲାଇଜ କରିବାକୁ ଯାଉଥିବା ବେଳେ ଭାଲୁଟି ଆକ୍ରମଣ କରିବା ପାଇଁ ଗୋଡାଇ ଥିଲା । ତେବେ ଦୌଡା ଦୌଡିରେ ଭୁଲବଶତଃ ଫରେଷ୍ଟର ଦୀପକ ସାହୁୁଙ୍କୁ ଟ୍ରାଙ୍କୁଲାଇଜ ଡୋଜ ଲାଗିଯାଇଥିଲା । ଫଳରେ ସଙ୍ଗେ ସଙ୍ଗେ ସେ ଅଚେତ ହୋଇପଡିଥିଲେ । ତାଙ୍କୁ ତୁରନ୍ତ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେପଟେ ଭାଲୁଟି ଗ୍ରାମରେ ରହି ଆତଙ୍କ ଖେଳାଉଥିବା ବେଳେ ଭୟଭୀତ ଅବସ୍ଥାରେ ଅଛନ୍ତି ଗ୍ରାମବାସୀ ।  

ଇଟିଭି ଭାରତ, ଢେଙ୍କାନାଳ