ମନୋରମା ମହାନ୍ତି ନର୍ଲା ବିଜେଡି ପ୍ରାର୍ଥୀ, କହିଲେ ନିଶ୍ଚୟ ଜିତିବୁ - Odisha Assembly polls 2024

ଭବାନୀପାଟଣା: ଅନେକ କଳ୍ପନା ଜଳ୍ପନା ପରେ ଘୋଷଣା ହୋଇଛି ନର୍ଲା ବିଧାନସଭା ନିର୍ବାଚନ ମଣ୍ଡଳୀ ପାଇଁ ବିଜେଡି ପ୍ରାର୍ଥୀ । ନର୍ଲାରେ ମନୋରମା ମହାନ୍ତିଙ୍କୁ ଟିକଟ ମିଳିଛି । ଗୁରୁବାର ବିଜେଡି ସୁପ୍ରିମୋ ନବୀନ ପଟ୍ଟନାୟକ ମନୋରମାଙ୍କ ନାଁ ଘୋଷଣା କରିବା ପରେ ଦଳୀୟ କର୍ମୀ ଓ ତାଙ୍କର ସମର୍ଥକଙ୍କ ମଧ୍ୟରେ ଉତ୍ସାହ ଖେଳିଯାଇଛି । ମନୋରମା ମହାନ୍ତି ୨୦୧୭ ମସିହାରେ ରାଜନୀତିରେ ପାଦ ଦେଇଥିଲେ । ପ୍ରଥମେ ନର୍ଲା ବ୍ଲକ ଅଧ୍ୟକ୍ଷା ଭାବରେ ଦାୟିତ୍ୱ ଗ୍ରହଣ କରିଥିବା ବେଳେ ୨୦୨୨ ମସିହାରେ ପୁଣିଥରେ ବ୍ଲକ ଅଧ୍ୟକ୍ଷା ହୋଇଥିଲେ । ଏବେ ମୁଖ୍ୟମନ୍ତ୍ରୀ ତାଙ୍କୁ ବିଧାୟକ ପ୍ରାର୍ଥୀ ଭାବରେ ଘୋଷଣା କରିଛନ୍ତି । ମନୋରମା ବ୍ଲକ ଅଧ୍ୟକ୍ଷା ରହିଥିବା ବେଳେ ତାଙ୍କ ସ୍ଵାମୀ ଦୁର୍ଗା ପ୍ରସାଦ ମହାନ୍ତି ବ୍ଲକ ଉପାଧ୍ୟକ୍ଷ ରହି ୨୦୧୯ରେ ସ୍ଵାଧୀନ ପ୍ରାର୍ଥୀ ଭାବରେ ନିର୍ବାଚନ ଲଢି ୨୨ ହଜାର ୨୦ ଖଣ୍ଡ ଭୋଟ ପାଇ ପରାଜିତ ହୋଇଥିଲେ । ତେବେ ଚଳିତ ନିର୍ବାଚନରେ ନର୍ଲା ନିର୍ବାଚନ ମଣ୍ଡଳୀରେ ପ୍ରଥମ ଥର ପାଇଁ ଜଣେ ମହିଳାଙ୍କୁ ପ୍ରାର୍ଥୀ କରିଛି ବିଜେଡି । ଏନେଇ ମନୋରମା ମହାନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇବା ସହ ନିଶ୍ଚୟ ଜିତିବୁ ବୋଲି ଦୃଢୋକ୍ତି ପ୍ରକାଶ କରିଛନ୍ତି । ନର୍ଲା ବିଧାନସଭା ଆସନ ଲାଗି ପୂର୍ବରୁ କଂଗ୍ରେସର ଟାଣୁଆ ନେତା ଭକ୍ତ ଚରଣ ଦାସ ଓ ବିଜେପି ପକ୍ଷରୁ ଅନିରୁଦ୍ଧ ପ୍ରଧାନଙ୍କୁ ପ୍ରାର୍ଥୀ କରାଯାଇଛି  । ତେଣୁ ଏଠାରେ ତିନି ଦଳ ମଧ୍ୟରେ ଜୋରଦାର ଟକ୍କର ଦେଖିବାକୁ ମିଳିବ । 

ଇଟିଭି ଭାରତ, କଳାହାଣ୍ଡି