ପରିବର୍ତ୍ତନ ମୁଁହା ଚିଲିକା ଜନତା: ପ୍ରଦୀପ ସ୍ବାଇଁ - Assembly Election 2024

Congress MLA Candidate Pradeep Swain: ଖୋର୍ଦ୍ଧା: ନିର୍ବାଚନର ବିଗୁଲ ବାଜି ସାରିଛି ଏବଂ ମତଦାନ ପାଇଁ ତାରିଖ ମଧ୍ୟ ଘୋଷଣା କରି ସାରିଛନ୍ତି ନିର୍ବାଚନ କମିଶନର । ରାଜ୍ୟରେ ତିନି ପ୍ରମୁଖ ଦଳ ବିଜେପି, ବିଜେଡି ଓ କଂଗ୍ରେସ ବିଭିନ୍ନ ନିର୍ବାଚନ ମଣ୍ଡଳୀରେ ତାର ଯୋଦ୍ଧାଙ୍କ ନାମ ପର୍ଯ୍ୟାୟ କ୍ରମେ ଘୋଷଣା କରୁଛନ୍ତି । ସେହିଭଳି ରାଜ୍ୟର ପ୍ରମୁଖ ନିର୍ବାଚନ ମଣ୍ଡଳୀ ଭାବେ ପରିଚିତ ଚିଲିକା ନିର୍ବାଚନ ମଣ୍ଡଳୀରେ ତିନି ପ୍ରମୁଖ ଦଳ ତାର ପ୍ରାର୍ଥୀଙ୍କ ନାମ ଘୋଷଣା କରି ସାରିଛନ୍ତି । ତେବେ କଂଗ୍ରେସରୁ ପ୍ରାର୍ଥୀ ହୋଇଥିବା ପ୍ରଦୀପ ସ୍ବାଇଁ ଏଥର ଚିଲିକାବାସୀଙ୍କ ଆସ୍ଥା ଜିତିବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି ।

ଚିଲିକା ନିର୍ବାଚନ ମଣ୍ଡଳୀ ପାଇଁ ବିଜୁ ଜନତା ଦଳ ପୂର୍ବତନ ବିଧାୟକ ରଘୁନାଥ ସାହୁଙ୍କୁ ପ୍ରାର୍ଥୀ ଭାବେ ଘୋଷଣା କରିଥିବା ବେଳେ ଭାରତୀୟ ଜନତା ପାର୍ଟି ପୃଥ୍ଵୀରାଜ ହରିଚନ୍ଦନଙ୍କ ନାମ ଘୋଷଣା କରିଛି । ସେହିଭଳି କଂଗ୍ରେସ 2019ର ପ୍ରାର୍ଥୀ ପ୍ରଦୀପ ସ୍ବାଇଁଙ୍କୁ ଆଉ ଥରେ ସୁଯୋଗ ଦେଇଛି । କଂଗ୍ରେସ ତାଙ୍କ ନାଁ ଘୋଷଣା କରିବା ପରେ ଗାଁ ଗାଁରେ ନିର୍ବାଚନ ପ୍ରଚାର ଆରମ୍ଭ କରି ଦେଇଛନ୍ତି । କିପରି ଉଭୟ ବିଜେପି ଓ ବିଜେଡି ସରକାର ରାଜ୍ୟବାସୀଙ୍କୁ ମିଛ ପ୍ରତିଶୃତିର ପାହାଡ଼ରେ ଠିଆ କରି ତାଙ୍କୁ ଲୁଟ କରୁଛନ୍ତି ତାକୁ ସମାଲୋଚନା କରିଛନ୍ତି । ସେହିପରି ଚିଲିକା ନିର୍ବାଚନ ମଣ୍ଡଳୀବାସୀଙ୍କୁ କେନ୍ଦ୍ରର ବିଜେପି ସରକାର ଏବଂ ରାଜ୍ୟର ବିଜେଡି ସରକାର ପ୍ରତାରିତ କରିଛନ୍ତି, ବିଶ୍ବ ମାନଚିତ୍ରରେ ଚିଲିକାର ସ୍ବତନ୍ତ୍ର ସ୍ଥାନ ରହିଥିବା ବେଳେ ତାର ବିକାଶ ପାଇଁ କେହି ଆନ୍ତରିକତା ଦେଖାଇ ନଥିବା ଅଭିଯୋଗ କରିଛନ୍ତି କଂଗ୍ରେସ ପ୍ରାର୍ଥୀ ପ୍ରଦୀପ । ଏଥର ଚିଲିକାବାସୀ ଉଭୟ ଦଳକୁ ଚିହ୍ନି ସାରିଲେଣି ଏବଂ ପରିବର୍ତ୍ତନ ମୁଁହା ହେଲେଣି ବୋଲି ସେ କହିଛନ୍ତି । ଚିଲିକାରେ ଏଥର ବହୁ ଭୋଟର ବିଜୟୀ ହେବ ବୋଲି ଆଶା ରଖିଛନ୍ତି ପ୍ରଦୀପ ।

ଇଟିଭି ଭାରତ, ଖୋର୍ଦ୍ଧା