ରଜ ମହୋତ୍ସବରେ ସାମିଲ ହେଲେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା - PRAVATI PARIDA JOINS RAJA UTSAV

ନିମାପଡା: ନିଜ ନିର୍ବାଚନ ମଣ୍ଡଳୀରେ ରଜ ମହୋତ୍ସବରେ ସାମିଲ ହେଲେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା । ଗତକାଲି (ରବିବାର) ଅପରାହ୍ନରେ ପ୍ରଭାତୀ ନିମାପଡ଼ା ଗସ୍ତ କରି ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଥିଲେ । ଏହା ପରେ ସେ ନିଜର ଶାଶୁଘରକୁ ମଧ୍ୟ ଯାଇଥିଲେ । ସନ୍ଧ୍ୟାରେ ନିମାପଡ଼ା ବିଷ୍ଣୁପୁର ଉଚ୍ଚବିଦ୍ୟାଳୟ ପରିସରରେ ଆୟୋଜିତ ‘୭ମ ରଜ ମହୋତ୍ସବ-୨୦୨୪’ରେ ଅଂଶଗ୍ରହଣ କରିଥିଲେ । ଏଥିରେ ପ୍ରଭାତୀ ମୁଖ୍ୟ ଅତିଥି ଭାବେ ଅଂଶଗ୍ରହଣ କରିଥିବା ବେଳେ ପୂର୍ବତନ ମନ୍ତ୍ରୀ ତଥା ବିଜେପି ନେତା ସମୀର ଦାଶ ମଧ୍ୟ ଏହି କାର୍ଯ୍ୟକ୍ରମରେ ପ୍ରଭାତୀଙ୍କ ସହ ନଜର ଆସିଥିଲେ ।

ଆୟୋଜିତ ଏହି କାର୍ଯ୍ୟକ୍ରମରେ ଅନୁଷ୍ଠାନ ପକ୍ଷରୁ ଓଡ଼ିଆଣି ଝିଅ, ରଙ୍ଗୋଲି ଦଉଡି ଡିଆଁ ,ଝୋଟି ପ୍ରତିଯୋଗିତା ଆଦି ଆୟୋଜିତ କରାଯାଇଥିଲା । ଏଥିରେ ଶତାଧିକ କୁମାରୀ ଅଂଶଗ୍ରହଣ କରିଥିଲେ । କୃତି ପ୍ରତିଯୋଗୀଙ୍କୁ ଉପମୁଖ୍ୟମନ୍ତ୍ରୀ ଓ ଅନ୍ୟ ଅତିଥିମାନେ ପୁରସ୍କୃତ କରିଥିଲେ । ଏପରି ଆୟୋଜନକୁ ନେଇ ପ୍ରଭାତୀ ଖୁସି ବ୍ୟକ୍ତ କରିଛନ୍ତି । ସମସ୍ତଙ୍କୁ ରଜ ଶୁଭେଚ୍ଛା ମଧ୍ୟ ଜଣାଇଛନ୍ତି ।

ଇଟିଭି ଭାରତ, ନିମାପଡା