ବରଗଡ: ବିଶ୍ୱର ସର୍ବବୃହତ ମୁକ୍ତାକାଶ ରଙ୍ଗମଞ୍ଚ ଭାବେ ପ୍ରସିଦ୍ଧ ବରଗଡ଼ ଧନୁଯାତ୍ରାରେ କୃଷ୍ଣ ଭଗବାନଙ୍କ ବାଲ୍ୟଲୀଳା ଦେଖିବାକୁ ଭକ୍ତଙ୍କ ସୁଅ ଛୁଟିଛି ଗୋପପୁରକୁ । ମହାରାଜ କଂସଙ୍କ ଦ୍ୱାରା ପ୍ରେରିତ ସମସ୍ତ ରାକ୍ଷସ ରାକ୍ଷସୀ କୃଷ୍ଣ ବଳରାମଙ୍କ ହାତରେ ନିଧନ ହୋଇଥିବା ବେଳେ ଗୋପପୁରରେ ଦେଖାଦେଇଛି ଉତ୍ସବର ମାହୋଲ । ଘରେ ଘରେ କୃଷ୍ଣ ବଳରାମଙ୍କୁ ପୂଜାର୍ଚ୍ଚନା କରାଯାଉଥିବା ବେଳେ କୃଷ୍ଣ ବଳରାମଙ୍କୁ ପାଖରେ ପାଇ ଗୋପପୁରବାସୀ ଉତ୍ସାହିତ ହୋଇପଡିଛନ୍ତି ।
ଶ୍ରୀକୃଷ୍ଣଙ୍କ ଲୀଳାରେ ଉତ୍ସବମୁଖର ଗୋପପୁର
୫ ଦିନରେ ବିଶ୍ୱପ୍ରସିଦ୍ଧ ବରଗଡ ଧନୁଯାତ୍ରା । ଧନୁଯାତ୍ରାରେ ଗୋପପୁରର ପରିବେଶ ବେଶ ନିଆରା l ସତେ ଯେପରି ଦ୍ୱାପର ଯୁଗ ଭଳି ଲାଗୁଛି ପୁରା ଗୋପପୁର । ଭଗବାନ ଶ୍ରୀକୃଷ୍ଣ ଓ ବଡ଼ଭାଇ ବଳରାମ ଚନ୍ଦ୍ରକଳା ପରି ନନ୍ଦଉଆସରେ ବଢ଼ିବାରେ ଲାଗିଥିବା ବେଳେ ଗୋପପୁରରେ ଭଗବାନଙ୍କ ନଗର ପରିକ୍ରମା ପାଇଁ ଆୟୋଜନ କରାଯାଇଥିଲା । ଏଥିପାଇଁ ସାରା ଗୋପପୁର ଉତ୍ସବ ମୁଖରିତ ହୋଇଥିବା ବେଳେ ଘରେ ଘରେ ଝୋଟି ଅଙ୍କାଯାଇଛି, କୃଷ୍ଣ-ବଳରାମଙ୍କ ପାଦଧୋଇ ପୂଜାର୍ଚ୍ଚନା କରାଯାଇଛି ।
କଂସଙ୍କ ପ୍ରେରିତ ରାକ୍ଷସ- ରାକ୍ଷସୀଙ୍କୁ ନିହତ କରୁଛନ୍ତି କୃଷ୍ଣ- ବଳରାମ
ଶ୍ରୀକୃଷ୍ଣଙ୍କ ଲୀଳାରେ ଗୋପପୁର ଉତ୍ସବମୁଖର ହୋଇଥିବା ବେଳେ, କୃଷ୍ଣଙ୍କ ସହ ତାଙ୍କ ଶଖା ମଧୁମଙ୍ଗଳ ଓ ବାଳକ ପୁଅମାନେ ଗୀତନାଚ କରି ଗାଁ ପରିଭ୍ରମଣ କରିଛନ୍ତି । ସେପଟେ ପ୍ରଭୁ ଶ୍ରୀକୃଷ୍ଣ କେତେବେଳେ ଗୋପାଳ ବାଳକଙ୍କ ସହ ଖେଳକୁଦ କରୁଛନ୍ତି ତ ଆଉ କେତେବେଳେ ଲୁଚି ଲୁଚି ମାଟି ଖାଉଛନ୍ତି । ଏପଟେ କଂସଙ୍କ ପ୍ରେରିତ ପୁତନା, ବକା, ସକଟା, ତୃଣା ଓ ଧେନୁକା କପଟରେ କୃଷ୍ଣ ବଳରାମକୁ ମାରିବାକୁ ଉଦ୍ୟମ କରୁଥିବା ବେଳେ କୃଷ୍ଣ ବଳରାମ ସମସ୍ତଙ୍କୁ ନିହତ କରିଛନ୍ତି ।
ଦ୍ୱାପର ଯୁଗର ସ୍ୱାଦ ଦେଉଛି ଅମ୍ବାପାଲି ଗାଁ
ଧନୁଯାତ୍ରା ସମୟରେ ଗୋପପୁର କୁହାଯାଉଥିବା ଏହି ଅମ୍ବାପାଲି ଗାଁ ସତେ ଯେପରି ଦ୍ୱାପର ଯୁଗକୁ ନେଇଯାଇଥାଏ । ଆଉ ଏହି ସମୟରେ ଗାଁରେ ଭକ୍ତିମୟ ପରିବେଶ ସୃଷ୍ଟି ହୋଇଥାଏ । ଦର୍ଶକମାନେ ଦୂରଦୁରାନ୍ତରୁ ଆସି ଭଗବାନ କୃଷ୍ଣଙ୍କର ବାଲ୍ୟଲୀଳା ଦେଖି ବେଶ୍ ଉପଭୋଗ କରିଛନ୍ତି ।
ବରଗଡ, ଇଟିଭି ଭାରତ
