ଭୁବନେଶ୍ବର:‘‘ମତେ ଫସାଇବା ପାଇଁ ସଂଗଠିତ ଭାବେ ଯୋଜନା କରିଥିଲେ, ଜନବିରୋଧୀ ବୋଲି ମୋ ଉପରେ ଆରୋପ ଲାଗିଥିଲା । ଗୋପାଳପୁରବାସୀ ଦୀର୍ଘ 5 ବର୍ଷ ନ୍ୟାୟରୁ ବଞ୍ଚିତ ହୋଇଥିଲେ । କୋର୍ଟ କଚେରୀ ଦୌଡି ଦୌଡି ମୋ ସମୟ ଯାଉଥିଲା । ନିର୍ବାଚିତ ପ୍ରତିନିଧି ହିସାବରେ ବହୁ କାମ କରିବାରୁ ବଞ୍ଚିତ ହେଉଥିଲି । ଆଜି କୋର୍ଟ ମତେ ରିଲିଫ୍ ଦେଇଛନ୍ତି । ଏହି ନୂଆବର୍ଷରେ ନବୀନଙ୍କ ପାଞ୍ଜି ଖୋଲିବ ।’’ ଚାକିରି ପାଇଁ ଠକେଇ ସମ୍ପର୍କିତ ସମସ୍ତ 5ଟି ମାମଲାରେ ନିର୍ଦ୍ଦୋଷ ସାବ୍ୟସ୍ତ ହେବା ପରେ ଏପରି ଢଙ୍ଗରେ ସିଧା ‘ବିଜୁ ଜନତା ଦଳ’ ଉପରେ ବର୍ଷିଛନ୍ତି ବ୍ରହ୍ମପୁର ସାଂସଦ ପ୍ରଦୀପ ପାଣିଗ୍ରାହୀ ।
- ‘ମତେ ଫସାଇବା ସଙ୍ଘବଦ୍ଧ ଯୋଜନା କରାଯାଇଥିଲା’
ବ୍ରହ୍ମପୁର ‘ଜେଏମଏଫସି’ କୋର୍ଟ ଦ୍ବାରା ଗତକାଲି 2ଟି ଓ ଆଜି 3 ମାମଲାକୁ ମିଶାଇ ସମସ୍ତ 5ଟି ଠକେଇ ମାମଲାରେ ନିର୍ଦ୍ଦୋଷ ସାବ୍ଯସ୍ତ ହୋଇଛନ୍ତି ପ୍ରଦୀପ । ବ୍ରହ୍ମପୁର ଓ ଗୋପାଳପୁରରେ ପ୍ରଦୀପଙ୍କ ସମର୍ଥକମାନେ ସେଲିବ୍ରେସନ କରୁଥିବା ବେଳେ ରାଜଧାନୀରେ ପ୍ରେସମିଟ୍ କରି ଏପରି ଢଙ୍ଗରେ ଭୀଷଣ ବର୍ଷିଛନ୍ତି ପ୍ରଦୀପ । ବିଜେଡି, ନବୀନ, ପାଣ୍ଡିଆନ ଓ ପୂର୍ବ ସରକାରର ହାତବାରିସୀ ସାଜିଥିବା କିଛି ବରିଷ୍ଠ ପୋଲିସ ଅଧିକାରୀଙ୍କୁ ସିଧାସଳଖ ଏହି କାର୍ଯ୍ଯାନୁଷ୍ଠାନ ଷଡଯନ୍ତ୍ର ସହ ଯୋଡିଛନ୍ତି ପ୍ରଦୀପ ।
ସେ କହିଛନ୍ତି,‘‘ ମତେ ଫସାଇବା ସଙ୍ଘବଦ୍ଧ ଯୋଜନା କରାଯାଇଥିଲା । ଆଜି ମତେ କୋର୍ଟରୁ ଆଶ୍ବସ୍ତି ମିଳିଛି । ପୁଅ,ଝିଅଙ୍କୁ ସ୍କୁଲରେ ପାଠ ପଢିଲା ବେଳେ ଅନେକ କଥା ଶୁଣିବାକୁ ମିଳିଥିଲା । ଗୋପାଳପୁର ଲୋକ ନ୍ୟାୟରୁ ବଞ୍ଚିତ ହୋଇଥିଲେ । ନିର୍ବାଚିତ ପ୍ରତିନିଧି ହିସାବରେ ବହୁ କାମ କରିବାରୁ ବଞ୍ଚିତ ହେଉଥିଲି । ଜନବିରୋଧୀ ବୋଲି ମୋ ଉପରେ ଆରୋପ ଲାଗିଥିଲା । ଜେଲରୁ ବାହାରିବା ପରେ ମତେ କଡା ପ୍ରଶ୍ନ କରାଯାଇଥିଲା । ଗତ 5 ବର୍ଷରୁ ଅଧିକ ସମୟ ହେଲାଣି କୋର୍ଟ କଚେରୀରେ ସମୟ କଟୁଥିଲା । ଏବେ ଲିଙ୍ଗରାଜ, ଜଗନ୍ନାଥ ଓ ଭୁବନେଶ୍ବରୀଙ୍କ କୃପାରୁ ମତେ ଆଶ୍ବସ୍ତି ମିଳିଛି ।’’
- ‘ଜେଲ ଭିତରେ ମୋତେ ହଇରାଣ କରାଯାଇଛି’
ପ୍ରଦୀପ ଆହୁରି ମଧ୍ୟ କହିଛନ୍ତି,‘‘ ସବୁ ଶ୍ରେୟ ଗଣମାଧ୍ୟମକୁ ଦେବି । ସେମାନେ ସତକୁ ସାମ୍ନାକୁ ଆଣିଲେ । ଯିଏ ମତେ ବାହାର କରିଥିଲେ, ସେମାନଙ୍କୁ ଓଡିଶାବାସୀ ବାହାର କଲେ । ନବୀନଙ୍କ ବହୁତ କର୍ତ୍ତବ୍ୟ ଥିଲା । ଜଣେ ବିଧାୟକ ଗିରଫ ହେଲେ, କିନ୍ତୁ ଗୃହମନ୍ତ୍ରୀ ହିସାବରେ ନବୀନ ପଟ୍ଟନାୟକ ନୀରବ ରହିଥିଲେ । ମୁଖ୍ୟମନ୍ତ୍ରୀଙ୍କ ଆଦେଶ ନହେଲେ କେହି କିଛି କରିବେନି । ଜେଲ ଭିତରେ ବି ମତେ ହଇରାଣ କରାଯାଇଛି ।’’ ତମାମ ଘଟଣା ପାଇଁ ନବୀନଙ୍କ ନୀରବତା ଓ ବିଜେଡିର ଷଡଯନ୍ତ୍ରକୁ ଭର୍ତ୍ସନା କରି ପ୍ରଦୀପ ପ୍ରବଳ ବର୍ଷିଛନ୍ତି । କହିଛନ୍ତି, ବିଜେଡି ପାଞ୍ଜି ମୋ ପାଖରେ ଅଛି । ନବୀନଙ୍କ ପାଞ୍ଜି ଖୋଲିବ ।
- ପାଣ୍ଡିଆନଙ୍କ ପ୍ଲାନରେ କାମ କରିଥିଲେ ଏହି ପୋଲିସ ଅଧିକାରୀ:-
ପ୍ରଦୀପ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ସେତେବେଳର ବରିଷ୍ଠ ପୋଲିସ ଅଧିକାରୀଙ୍କୁ ମଧ୍ୟ ଛାଡିନାହାନ୍ତି । ବିଜେଡି ଦଳ ଓ ଏହାର ତଥାକଥିତ ନିୟନ୍ତ୍ରକ ପାଣ୍ଡିଆନଙ୍କୁ ସେ ସିଧାସଳଖ ଟାର୍ଗେଟ କରି କହିଛନ୍ତି, ‘‘କାର୍ତ୍ତିକ (ପାଣ୍ଡିଆନ)ଙ୍କ ପ୍ଲାନକୁ କାର୍ଯ୍ୟକାରୀ କରିଥିଲେ ତତ୍କାଳୀନ ଜଣେ କ୍ରାଇମବ୍ରାଞ୍ଚ ଅଧିକାରୀ । ପ୍ରଦୀପଙ୍କୁ କିଏ ଗିରଫ କରିବ ବୋଲି କାର୍ତ୍ତିକ ପଚାରିବା ପରେ, ସେ ଅଧିକାରୀ ବାବୁ ଆଗ ମତେ ଗିରଫ କରିବାକୁ ବାହାରି ପଡ଼ିଥିଲେ । ପରେ ସେ ପ୍ରଥମ ମୋ ଗିରଫଦାରୀ ସମ୍ପର୍କରେ ଟ୍ବିଟ୍ କରିଥିଲେ । ଏହି କାରଣରୁ ତାଙ୍କୁ ପୋଲିସ କମିଶନର ଭାବେ ପୁରସ୍କାର ମିଳିଲା ।’’
- CMO ଥିଲା କଲେକ୍ସନ ହବ୍: ପ୍ରଦୀପ
ପ୍ରଦୀପ ଆହୁରି ମଧ୍ୟ କହିଛନ୍ତି, ‘ମୁ୍ଖ୍ୟମନ୍ତ୍ରୀଙ୍କ କାର୍ଯାୟଳୟ (ସିଏମଓ)କୁ କରପସନ, କମିଶନ ଓ କଲେକ୍ସନର ହବ କରାଯାଇଥିଲା । ଟ୍ରାଫିକ୍ ପୋଲିସ ହେଉଥିବା ଲୋକ କଣ ଜଣେ ନେତା କି ବୋଲି ପ୍ରଶ୍ନ କଲେ ପ୍ରଦୀପ ? ତାଙ୍କୁ ଯେମିତି ବ୍ୟବହାର କରାଯାଇଛି, ତାଙ୍କ ଶାନ୍ତ ହେବନି ? ସେ କାହାକୁ ଛାଡ଼ିବେ ନାହିଁ । ସମସ୍ତଙ୍କର ପୋଥି ଖୋଲିବେ । ବହୁତ ଶୀଘ୍ର ବିଜେଡି ରାଜ୍ଯରେ ଶେଷ ହୋଇଯିବ ।
ଇଟିଭି ଭାରତ, ଭୁବନେଶ୍ବର
