ଶପଥ ନେବା ପୂର୍ବରୁ ଆକ୍ସନ ମୋଡ଼ରେ ଆଶ୍ରିତ ପଟ୍ଟନାୟକ, ବୁଝିଲେ ଲୋକଙ୍କ ସମସ୍ୟା - Ashrit Patnaik

Pipili MLA Ashrit Patnaik: ନିମାପଡ଼ା: ଶପଥ ନେବା ପୂର୍ବରୁ ଲୋକଙ୍କ ସମସ୍ୟା ବୁଝିଲେ ପିପିଲିର ନବ ନିର୍ବାଚିତ ବିଧାୟକ। ବିଧାନସଭାରେ ଶପଥ ନେବା ପୂର୍ବରୁ ବିଧାୟକ ଆଶ୍ରିତ ପଟ୍ଟନାୟକ, ପିପିଲି ପୋପରଙ୍ଗା ପଞ୍ଚାୟତ ଅଧିନ ଗଙ୍ଗୁଆ ନାଳରେ ଚାଲିଥିବା ଘାଇ ମରାମତି କାର୍ଯ୍ୟର ତଦାରଖ କରିଛନ୍ତି। ଦୀର୍ଘ ୨ବର୍ଷ ହେବ ଗଙ୍ଗୁଆ ନାଳରେ ସୃଷ୍ଟି ହୋଇଥିବା ଘାଇ ଫଳରେ ବନ୍ୟା ଜଳରେ ହେକ୍ଟର ହେକ୍ଟର ଚାଷ ଜମିରେ ପଶି ଚାଷ ଜମିକୁ ଜଳ ମଗ୍ନ କରିବା ସହିତ ଚାଷୀଙ୍କ ପାଇଁ ସମସ୍ୟା ସୃଷ୍ଟି କରୁଥିଲା। ଏହାର ମରାମତି ପାଇଁ ଚାଷୀଙ୍କ ପକ୍ଷରୁ ବାରମ୍ବାର ଦାବି ହୋଇ ଆସୁଥିଲା। ହେଲେ ସ୍ଥାନୀୟ ଲୋକଙ୍କ ପକ୍ଷରୁ ନିମ୍ନ ମାନର ମରାମତି କାର୍ଯ୍ୟ ହେଉଥିବା ଅଭିଯୋଗ ହେବା ପରେ ଡ୍ରେନେଜ ବିଭାଗର ଅଧିକ୍ଷଣ ଯନ୍ତ୍ରୀଙ୍କୁ ସାଙ୍ଗରେ ନେଇ ଘଟଣାସ୍ଥଳ ପରିଦର୍ଶନ କରିଥିଲେ ବିଧାୟକ। ଉନ୍ନତ ମାନର କାର୍ଯ୍ୟ କରି ଠିକଣା ସମୟରେ ସାରିବା ସହିତ ନଦୀବନ୍ଧ ରକ୍ଷଣା ବେକ୍ଷଣା କରିବା ପାଇଁ ସ୍ୱତନ୍ତ୍ର ଏକ ସର୍ଭିସ ରୋଡ଼ ପାଇଁ ସରକାରଙ୍କ ନିକଟରେ ଦାବି ରଖିବେ ବୋଲି ବିଧାୟକ କହିଛନ୍ତି।

ଇଟିଭି ଭାରତ, ନିମାପଡ଼ା