ନୂଆପଡ଼ାରେ ବିଜେପିର ବିଶାଳ ରାଲି, ନାମାଙ୍କନ ଭରିଲେ ଖଡ଼ିଆଳ ବିଜେପି ପ୍ରାର୍ଥୀ ହିତେଶ ବଗର୍ତ୍ତି - Odisha Assembly Election 2024

Odisha Assembly Election 2024: ନୂଆପଡ଼ା: ଖଡ଼ିଆଳ ବିଧାନସଭା ନିର୍ବାଚନ ମଣ୍ଡଳୀରୁ ବିଜେପି ବିଧାୟକ ପ୍ରାର୍ଥୀ ହିତେଶ କୁମାର ବଗର୍ତ୍ତି ଆଜି ନୂଆପଡ଼ା ରିଟର୍ଣ୍ଣିଂ ଅଫିସରଙ୍କ ପାଖରେ ନାମାନଙ୍କନ ପତ୍ର ଦାଖଲ କରିଛନ୍ତି । ପ୍ରଥମେ ଖଡ଼ିଆଳର ଅଧିଷ୍ଠାତ୍ରୀ ଦେବୀ ମା' ସମଲେଶ୍ବରୀ, ଗଡରକ୍ଷକ ମା' ରକ୍ତାମ୍ବରୀଙ୍କ ମନ୍ଦିରରେ ପୂଜାର୍ଚ୍ଚନା କରି ନାମାଙ୍କନ ପତ୍ର ଦାଖଲ ଅଭିମୁଖେ ନୂଆପଡା ବାହାରିଥିଲେ । ପ୍ରାର୍ଥୀ ହିତେଶ କୁମାର ବଗର୍ତ୍ତିଙ୍କ ସମେତ ଦଳୀୟ ନେତା, କର୍ମୀ, ଶୁଭେଚ୍ଛୁ ଓ ହଜାର ହଜାର ସଂଖ୍ୟାରେ ସମର୍ଥକ ନୂଆପଡା ଏକତା ଛକଠାରେ ପହଞ୍ଚି ଥିଲେ । ପରେ ଏକ ବିଶାଳ ଶୋଭାଯାତ୍ରାରେ ବାହାରି ରିଟର୍ଣ୍ଣିଂ ଅଫିସର କାର୍ଯ୍ୟାଳୟ ଅଭିମୁଖେ ବାହାରିଥିଲେ ।

ହିତେଶ ବଗର୍ତ୍ତିଙ୍କୁ ନିର୍ବାଚନରେ ବିଜୟୀ କରିବା ପାଇଁ ଦଳୀୟ ନେତା ଓ କର୍ମୀଙ୍କ ମଧ୍ୟରେ ବିପୁଳ ଉତ୍ସାହ ଦେଖାଦେଇଛି । ଏହି ଅବସରରେ ହିତେଶ କହିଛନ୍ତି, "ରାଜ୍ୟରେ 24 ବର୍ଷ ଧରି ସାଶନରେ ଥିବା ନବୀନ ସରକାରଙ୍କ ଶାସନରୁ ଲୋକେ ବିମୁଖ ହୋଇ ସାରିଛନ୍ତି । ଏଥର ରାଜ୍ୟବାସୀ ନବୀନ ସରକାରକୁ ତଡି ବିଜେପି ସରକାର ଗଠନ କରିବେ । ରାଜ୍ୟ ସରକାର ଶିକ୍ଷା, ସ୍ବାସ୍ଥ୍ୟ, ନିଯୁକ୍ତି, ଜଳସେଚନ ଆଦି ବିଭିନ୍ନ କ୍ଷେତ୍ରରେ ଫେଲ ମାରିଛନ୍ତି । ଏଥର ଭୋଟର ବୁଝି ସାରିଲେଣି । ଉଭୟ କେନ୍ଦ୍ର ଓ ରାଜ୍ୟରେ ବିଜେପି ସରକାର ଗଠନ କରାଯିବ । ଓଡ଼ିଶାରେ ବିଜେପି ସରକାର ହେଲେ ଧାନର ସର୍ବନିମ୍ନ କ୍ବିଣ୍ଟାଲ ପ୍ରତି 31 ଶହ ଟଙ୍କା କରାଯିବ, ମହିଳାମାନଙ୍କୁ ପ୍ରତି ମାସରେ 1 ହଜାର ଟଙ୍କା ଭତ୍ତା ଦିଆଯିବ । ଚାଷୀଙ୍କ ଜମିକୁ ଜଳସେଚନ ବ୍ୟବସ୍ଥା କରାଯିବ, ନିଯୁକ୍ତି ସୃଷ୍ଟି କରି ବେକାର ଦାଦନ ସମସ୍ୟା ଦୂର କରାଯିବ ।" ବିଶେଷ କରି ଖଡ଼ିଆଳ ନିର୍ବାଚନ ମଣ୍ଡଳୀର ପଛୁଆ ଅଞ୍ଚଳ ଗୁଡିକ ବିକାଶ କରିବେ ବୋଲି ବିଜେପି ବିଧାୟକ ପ୍ରାର୍ଥୀ ହିତେଶ କୁମାର ବଗର୍ତ୍ତି ପ୍ରକାଶ କରିଛନ୍ତି ।

ଇଟିଭି ଭାରତ, ନୂଆପଡ଼ା