ତୃତୀୟ ପର୍ଯ୍ୟାୟରେ କଟକରେ ନାମାଙ୍କନ ଭରିଲେ ବହୁ ପ୍ରାର୍ଥୀ - Nomination In Cuttack

Nomination In Cuttack: କଟକ: ଆଜି ତୃତୀୟ ପର୍ଯ୍ୟାୟ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଶେଷ ହୋଇଛି। ଅପରାହ୍ନ ୩ଟାରେ ଏହି ପ୍ରକ୍ରିୟା ସରିଛି । ଆଜି ଶେଷ ଦିନରେ ଅନେକ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଥିଲେ । କଟକ-ବାରବାଟୀ ନିର୍ବାଚନ ମଣ୍ଡଳୀ ପାଇଁ ବିଜେପିର ପ୍ରାର୍ଥୀ ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ର ନାମାଙ୍କନ ଭରିଛନ୍ତି । ନିଜର ସମର୍ଥକଙ୍କ ସହ ଶୋଭାଯାତ୍ରାରେ ଆସି ସେ ପ୍ରାର୍ଥୀପତ୍ର ଦାଖଲ କରିଛନ୍ତି । ଚଳିତ ନିର୍ବାଚନରେ ଯଦିଓ ପୂର୍ଣ୍ଣଚନ୍ଦ୍ର ପ୍ରଥମ ଥର ପାଇଁ ନିର୍ବାଚନ ଲଢୁଛନ୍ତି, ତଥାପି ସେ ବିଜୟ ହେବେ ବୋଲି ଆଶା ପ୍ରକଟ କରିଛନ୍ତ।

ସେହିପରି ଦଳରେ ଗୋଷ୍ଠୀ କନ୍ଦଳ ଉପରେ ମଧ୍ୟ ପ୍ରତିକ୍ରିୟା ଦେଇଛନ୍ତି ପୂର୍ଣ୍ଣଚନ୍ଦ୍ର ମହାପାତ୍ର । ସେ କହିଛନ୍ତି, "ସବୁ ଆଡେ ମତାନ୍ତର ଥାଏ ମାତ୍ର ମନାନ୍ତର ଥିଲେ ସମସ୍ୟା ସୃଷ୍ଟି ହେବ ।" ସମସ୍ତେ ଏକତ୍ରିତ ହୋଇ ଲଢ଼ିବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି ପୂର୍ଣ୍ଣଚନ୍ଦ୍ର । ସେହିପରି କଟକ ଚୌଦ୍ୱାର ନିର୍ବାଚନ ମଣ୍ଡଳୀ ପାଇଁ ଦୁଇ ଜଣ ସ୍ୱାଧୀନ ଭାବରେ ନାମାଙ୍କନ ଭରିଛନ୍ତି । ରୂପାଲି ଲେଙ୍କା ଏବଂ ବିପ୍ଳବ ନନ୍ଦ ଆଜି ନାମାଙ୍କନ ଦାଖଲ କରିଛନ୍ତି । କଟକ ସଦର ନିର୍ବାଚନ ମଣ୍ଡଳୀରେ କଂଗ୍ରେସ ପକ୍ଷରୁ ରାମଚନ୍ଦ୍ର ଗୋଚ୍ଛାୟତ  ନାମାଙ୍କନ ଭରିଛନ୍ତି ।

ଇଟିଭି ଭାରତ, କଟକ