ଜମିବାଡି ବିବାଦରୁ ନୟାଗଡ ହତ୍ୟାକାଣ୍ଡ ମାମଲା: ମୁଖ୍ୟ ଅଭିଯୁକ୍ତ ଗିରଫ - Nayagarh police

Nayagarh Murder: ନୟାଗଡ: ଜିଲ୍ଲାର ଇଟାମାଟି ଥାନା ଅଞ୍ଚଳରେ ହତ୍ୟାକାଣ୍ଡ ଘଟଣା । ଦୁଇ ଅଭିଯୁକ୍ତ କାବୁଲି ରାଉତ ଏବଂ ତାଙ୍କ ପୁଅ ସାନୁଲୁ ରାଉତଙ୍କୁ ଗିରଫ କଲା ପୋଲିସ । ୨ ପରିବାର ମଧ୍ୟରେ ଜମିବାଡି ବିବାଦରୁ ବଚସା ପରେ ଆକ୍ରମଣ କରାଯାଇଥିଲା । ଯେଉଁଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ୨ଜଣ ଗୁରୁତର ଆହତ ହୋଇଛନ୍ତି  । 

ନୟାଗଡ଼ ଜିଲ୍ଲା ଇଟାମାଟି ଥାନା ଅନ୍ତର୍ଗତ ଭୁତଡ଼ି ଗ୍ରାମରେ ରବିବାର ସନ୍ଧ୍ୟାରେ ଜମିବାଡ଼ି ବିବାଦକୁ ନେଇ ବିଲ୍‌ ମଧ୍ୟରେ ଜଘନ୍ୟ ହତ୍ୟାକାଣ୍ଡ ଘଟିଥିଲା । ଘଟଣାରେ ଲାଠିପଡ଼ା ପାଇକସାହିର ଦଣ୍ଡପାଣି ପରିଡ଼ାଙ୍କ ମୃତ୍ୟୁ ହୋଇଥିବାବେଳେ ଦଣ୍ଡପାଣିଙ୍କ ବାପା ଜଗଦ୍ଦେବ ପରିଡ଼ା ଏବଂ ସାନଭାଇ ପ୍ରମୋଦ ଗୁରୁତର ଆହତ ହୋଇଥିଲେ । ଦୀର୍ଘଦିନ ହେବ ଜଗଦ୍ଦେବଙ୍କ ସହ ଭୁତଡ଼ିହି ଗ୍ରାମର କାବୁଲି ରାଉତଙ୍କ ପରିବାର ସହ ଜମିବାଡ଼ି ବିବାଦ ରହିଥିଲା । 

ଭୁତଡ଼ିହି ମୈାଜାରେ ରହିଥିବା ଏକ ଚାଷ ଜମିକୁ ନେଇ ରହିଥିବା ବିବାଦ ସୋମବାର ଆପୋଷ ଆଲୋଚନା ମାଧ୍ୟମରେ ସମାଧାନ ପାଇଁ ଧାର୍ଯ୍ୟ ହୋଇଥିଲା । ତେବେ ରବିବାର ସନ୍ଧ୍ୟାରେ ଜଗଦ୍ଦେବ ଏବଂ ତାଙ୍କ ଦୁଇ ପୁଅ ଗହୀରରେ ଚାଷ କାର୍ଯ୍ୟ ଓ ପାଣି ମଡ଼ା କାମ କରୁଥିବା ବେଳେ କାବୁଲି ରାଉତ, ତାଙ୍କ ପୁଅ ଏବଂ ଅନ୍ୟ ତିନିଜଣ ବ୍ୟକ୍ତି ସେଠାରେ ପହଞ୍ଚି ଆକ୍ରମଣ କରିଥିଲେ ।

ଘଟଣାସ୍ଥଳରେ ଦଣ୍ଡପାଣିଙ୍କ ମୃତ୍ୟୁ ହୋଇଯାଇଥିବାବେଳେ ଜିଲ୍ଲା ମୁଖ୍ୟ ଚିକିତ୍ସାଳୟରେ ପ୍ରାଥମିକ ଚିକିତ୍ସା ପରେ ବାପା ଓ ସାନପୁଅକୁ ଭୁବନେଶ୍ୱର ସ୍ଥାନାନ୍ତରିତ କରାଯାଇଥିଲା । ଘଟଣା ପରେ ଫେରାର୍ ଅଭିଯୁକ୍ତମାନଙ୍କୁ ଧରିବାପାଇଁ ନୟାଗଡ ପୋଲିସ ଦୁଇଟି ଟିମ୍ ଗଠନ କରି ରାତିସାରା ଚଢାଉ କରି ଖଣ୍ଡପଡା ଅଞ୍ଚଳରୁ 2 ଅଭିଯୁକ୍ତଙ୍କୁ ଗିରଫ କରିଥିଲା । ହତ୍ୟାକାଣ୍ଡରେ ବ୍ୟବହୃତ କଟୁରି ଏବଂ ଅନ୍ୟାନ୍ୟ ସାମଗ୍ରୀ ଜବତ କରିଛି ପୋଲିସ । ନୟାଗଡ ଏସପି ରାହୁଲ ଜୈନ ପ୍ରେସମିଟ୍ କରି ଏସମ୍ପର୍କରେ ଜଣାଇଛନ୍ତି ।

ଇଟିଭି ଭାରତ, ନୟାଗଡ