ସରିଲା ଆଦିବାସୀଙ୍କ ବାଲିଯାତ୍ରା, ପାରମ୍ପରିକ ବାଦ୍ୟରେ ଝୁମିଲା ଗାଁ ଦାଣ୍ଡ - Bhimaguda Baliyatra

Bhimaguda Baliyatra: ନବରଙ୍ଗପୁର: ଶେଷ ହେଲା ତିନି ମାସିଆ ବାଲିଯାତ୍ରା । ନବରଙ୍ଗପୁର ଜିଲ୍ଲା ତେନ୍ତୁଳୀଖୁଣ୍ଟି ବ୍ଲକ ଅଞ୍ଚଳଗୁମା ପଞ୍ଚାୟତର ଭୀମାଗୁଡା ଠାରେ ଆଦିବାସୀଙ୍କ ପାରମ୍ପରିକ ବାଲିଯାତ୍ରା ଶେଷ ହୋଇଛି । ଭୀମାଗୁଡା ବାଲିଯାତ୍ରା ପୂଜା କମିଟିର ସଭାପତି ପଦ୍ମନାଭ ପଟେଲଙ୍କ ଅଧ୍ୟକ୍ଷତାରେ ଏହି ଯାତ୍ରା ମାର୍ଚ୍ଚ ୧୭ ତାରିଖରୁ ଆରମ୍ଭ ହୋଇ ମେ ୧୭ ତାରିଖ ଯାଏଁ ତିନି ମାସ ଧରି ଚାଲିଥିଲା।  

ଯାତ୍ରାରେ ଭୀମାଗୁଡା ଗ୍ରାମର ସମସ୍ତ ଦେବାଦେବୀ ଉକ୍ତ ସ୍ଥାନରେ ପୂଜା ପାଇଥିବା ବେଳେ ସମସ୍ତଙ୍କୁ ତିନିମାସ ପାଇଁ ନିମନ୍ତ୍ରଣ ହୋଇଥିଲା। ଦେବାଦେବୀ ମନୁଷ୍ୟ ରୂପରେ ବିରାଜ ହୋଇ ଏହି ସ୍ଥାନରେ ଶିରା ଖେଳନ୍ତି ଓ ଲୋକେ ବିଶ୍ବାସର ସହ ତାଙ୍କୁ ପୂଜା ପାଠ କରନ୍ତି । ଏହି ଯାତ୍ରାକୁ ୧୨ ବର୍ଷକୁ ଥରେ ପାଳନ କରିଥାନ୍ତି ଗ୍ରାମବାସୀ । ବିଶ୍ୱାସ ରହିଛି ଗାଁ ଦେବୀ ସନ୍ତୁଷ୍ଟ ହେଲେ ଚାଷ କାର୍ଯ୍ୟ ଭଲ ଭାବରେ ହେବା ସହିତ ରୋଗ ସମସ୍ୟା ଦୂର ହୋଇଥାଏ । ଫଳରେ ଗାଁରେ ସୁଖ ସମୃଦ୍ଧି ଆସିଥାଏ ବୋଲି ବିଶ୍ବାସ ରହିଛି । ଯାତ୍ରାରେ ଆଖପାଖ ଗ୍ରାମର ଏକ ଲକ୍ଷରୁ ଊର୍ଦ୍ଧ୍ବ ଲୋକଙ୍କ ଭିଡ଼ ଜମିଥିଲା । ଯାତ୍ରାଟି ଦୁଇ ଦିନ ଧରି ଚାଲିଥିବା ବେଳେ ଲୋକଙ୍କ ମନୋରଞ୍ଜନ ନିମନ୍ତେ ଦେଶିଆ ନାଟକ ରାତିରେ ପରିବେଷଣ କରାଯାଉଛି l ଯାହାର ସୂଚନା ବାଲିଯାତ୍ରା କମିଟି ସଭାପତି ପଦ୍ମନାଭ ପଟେଲ, ସମ୍ପାଦକ ରଘୁନାଥ ପୂଜାରୀ ପ୍ରମୁଖ ଦେଇଛନ୍ତି ।

ଇଟିଭି ଭାରତ, ନବରଙ୍ଗପୁର