ଜୟଦେବରେ ଚାଲିଛି ମତଦାନ, 8 ବିଧାୟକ ପ୍ରାର୍ଥୀଙ୍କ ହେଉଛି ଭାଗ୍ଯ ପରୀକ୍ଷା - VOTING IN JAYADEV CONSTITUENCY

ନିଆଳି: ପ୍ରଚାରରେ କମ୍ପୁଥିଲା ଭୁବନେଶ୍ବର ଲୋକସଭା କ୍ଷେତ୍ର ଅଧୀନ ଜୟଦେବ ବିଧାନସଭା ଆସନ । ଆଜି ଶାନ୍ତିଶୃଙ୍ଖଳାର ସହିତ ବିଭିନ୍ନ ବୁଥରେ ମତଦାନ ଚାଲିଛି । ଏଥିପାଇଁ ରାଜ୍ୟ ନିର୍ବାଚନ କମିଶନଙ୍କ ପକ୍ଷରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି । ମତଦାନକୁ ଆଖି ଆଗରେ ରଖି ସବୁ ପ୍ରକାର ବ୍ୟବସ୍ଥା କରିଛି ଖୋର୍ଦ୍ଧା ଜିଲ୍ଲା ପ୍ରଶାସନ । ଖୋର୍ଦ୍ଧା ଜିଲ୍ଲା ତଥା ଭୁବନେଶ୍ୱର ଲୋକସଭା ଆସନ ଅନ୍ତର୍ଗତ ଜୟଦେବ ବିଧାନସଭା ଆସନ ପାଇଁ ବିଭିନ୍ନ ରାଜନୈତିକ ଦଳର ଆଠଜଣ ବିଧାୟକ ପ୍ରାର୍ଥୀ ନିର୍ବାଚନ ଲଢୁଛନ୍ତି । ଜୟଦେବରେ ନିର୍ବାଚନ ମଣ୍ଡଳୀରେ ୩୩ ପଞ୍ଚାୟତର ମତଦାତାଙ୍କ ପାଇଁ ୨୩୬ ବୁଥ ବା ମତଦାନ କେନ୍ଦ୍ର ବ୍ୟବସ୍ଥା କରାଯାଇଛି । ବାଲିପାଟଣା ବ୍ଲକ ଧାନହରା ବୁଥରେ ସକାଳୁ ଲୋକେ ଧାଡିରେ ଛିଡା ହୋଇ ବେଶ ଉତ୍ସାହର ସହ ଭୋଟ ଦେଇଛନ୍ତି । କୃଷକ, ଛାତ୍ର ଏବଂ ଅଞ୍ଚଳର ବିକାଶ ଦିଗରେ ଯିଏ ପଦକ୍ଷେପ ନେବେ, ସେହି ପ୍ରାର୍ଥୀ ଯୋଗ୍ୟ ବୋଲି ଭୋଟର କହିଛନ୍ତି ।‌
 

ଇଟିଭି ଭାରତ, ନିଆଳି