କୋରେଇରେ ପ୍ରଚାର କଲେ ମୁଖ୍ୟମନ୍ତ୍ରୀ, ଯୋଡ଼ି ଶଙ୍ଖକୁ ଭୋଟ ଦେବାକୁ କଲେ ନିବେଦନ - Naveen Patnaik Campaign in Jajpur

Naveen Patnaik Campaign for BJD: ଯାଜପୁର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତକାଲି(ଶୁକ୍ରବାର) ଯାଜପୁରର କୋରେଇ ନିର୍ବାଚନ ମଣ୍ଡଳୀ ଅନ୍ତର୍ଗତ ବ୍ରାହ୍ମଣୀଦେବୀ ଠାରେ ଆୟୋଜିତ ନିର୍ବାଚନୀ ସଭାରେ ଯୋଗଦେଇଥିଲେ । ତାଙ୍କ ସହ ସାମିଲ ଥିଲେ 5T ଅଧ୍ୟକ୍ଷ ଭିକେ ପାଣ୍ଡିଆନ ଓ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ । ଏହି ସଭାରେ ଲକ୍ଷାଧିକ ଲୋକଙ୍କ ସମାଗମ ହୋଇଥିବାବେଳେ ସାଂସଦ ପ୍ରାର୍ଥୀ ଶର୍ମିଷ୍ଠା ସେଠୀଙ୍କ ସହିତ ଏହି ଲୋକସଭା କ୍ଷେତ୍ର ଅଧିନ ୭ ନିର୍ବାଚନ ମଣ୍ଡଳୀର ବିଧାୟକ ପ୍ରାର୍ଥୀମାନେ ଉପସ୍ଥିତ ଥିଲେ । ସାଂସଦ ପ୍ରାର୍ଥୀଙ୍କ ସହ ସମସ୍ତ ବିଧାୟକ ପ୍ରାର୍ଥୀଙ୍କୁ ଯୋଡ଼ି ଶଙ୍ଖରେ ବିପୁଳ ସଂଖ୍ୟାରେ ଭୋଟଦେଇ ନିର୍ବାଚିତ କରିବାକୁ ମୁଖ୍ୟମନ୍ତ୍ରୀ ଓ ପାଣ୍ଡିଆନ ଜନସାଧାରଣଙ୍କୁ ନିବେଦନ କରିଥିଲେ ।

ଏହି ସଭାକୁ ସମ୍ବୋଧନ କରି ପାଣ୍ଡିଆନ କହିଥିଲେ, "ନିର୍ବାଚନ ସମୟରେ ବିଜେପି ଶୁଖିଲା ବାହାସ୍ଫୋଟ ମାରୁଛି । ଚାଷୀଙ୍କ ପାଇଁ କୁମ୍ଭୀର କାନ୍ଦଣା କାନ୍ଦୁଛି । ବିଜେଡିଠୁ ଶୁଣି ରାଜ୍ୟବାସୀଙ୍କୁ ମାଗଣା ବିଜୁଳି ଦେବା କଥା କହୁଛି । ଅନେକ କିଛି ମିଥ୍ୟା ପ୍ରତିଶ୍ରୁତି ଦେଉଛି । ମୁଖ୍ୟମନ୍ତ୍ରୀ ଅନେକ କିଛି ବିକାଶ କରିଛନ୍ତି । ଆହୁରି ଅନେକ କାର୍ଯ୍ୟ କରିବେ ।" ତେଣୁ ପ୍ରତ୍ୟେକ ପ୍ରାର୍ଥୀଙ୍କୁ ୧ ଲକ୍ଷରୁ ଅଧିକ ଭୋଟରେ ଜିତାଇବା ସହ ୬ଷ୍ଠ ଥର ପାଇଁ ନବୀନଙ୍କୁ ମୁଖ୍ୟମନ୍ତ୍ରୀ ଭାବେ ନିର୍ବାଚିତ କରିବାକୁ ପାଣ୍ଡିଆନ ଆହ୍ବାନ କରିଥିଲେ । ଏହି ସମାବେଶରେ ମୁଖ୍ୟମନ୍ତ୍ରୀ ଯୋଗଦେଇ ବିଜେଡି ସପକ୍ଷରେ ଭୋଟ ଭିକ୍ଷା କରିଥିବାରୁ ପ୍ରାର୍ଥୀମାନେ ମଧ୍ୟ ବେଶ ଉତ୍ସାହିତ ଥିଲେ । ସେପଟେ ଆସନ୍ତା ଜୁନ ୧ ତାରିଖରେ ଯାଜପୁର ଜିଲ୍ଲାରେ ୪ର୍ଥ ପର୍ଯାୟରେ ନିର୍ବାଚନ ହେବ । ସେଥିପାଇଁ ସମସ୍ତ ଦଳ ପକ୍ଷରୁ ପ୍ରଚାର କାର୍ଯ୍ୟକ୍ରମ ଜୋରଦାର ହୋଇଛି ।

ଇଟିଭି ଭାରତ, ଯାଜପୁର