ଅଲମ୍ପିକ୍ସରେ ସଫଳତା ପାଇଁ ମହାପ୍ରଭୁଙ୍କ ଆଶୀର୍ବାଦ ନେଲା ଭାରତୀୟ ହକି ଟିମ୍‌ - Indian Hockey Team Visits Puri

Indian Hockey Team Visits Puri ପୁରୀ: ଅଲମ୍ପିକ୍ସରେ ସଫଳତା ହାସଲ ପାଇଁ ମହାପ୍ରଭୁଙ୍କ ଆଶୀର୍ବାଦ ନେଲେ ଭାରତୀୟ ହକି ଟିମ ଖେଳାଳି । ଭାରତୀୟ ହକି ଟିମର ଖେଳାଳିମାନେ ପୁରୀ ଗସ୍ତରେ ଆସି ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିଛନ୍ତି । ଆଗକୁ ପ୍ୟାରିସ୍‌ରେ ଅଲମ୍ପିକ୍ସ ଥିବାବେଳେ ଏଥିରେ ଭାରତୀୟ ହକି ଟିମ୍ ସଫଳ ହେବା କାମନା ନେଇ ମହାପ୍ରଭୁଙ୍କ ନିକଟକୁ ଆସିଥିଲେ ହକି ଖେଳାଳି । ହକି ଟିମ୍‌ର ଏହି ଖେଳାଳିମାନେ ପୁରୀରେ ପହଞ୍ଚିବା ପରେ ଜିଲ୍ଲା ପ୍ରଶାସନ ପକ୍ଷରୁ ସେମାନଙ୍କୁ ସ୍ବାଗତ କରାଯାଇଥିଲା । ପରେ ସେମାନଙ୍କୁ ଶ୍ରୀମନ୍ଦିର ଭିତରକୁ ଯାଇଥିଲେ । ଖେଳାଳିମାନେ ପ୍ରଥମେ ପତିତପାବନଙ୍କୁ ଦର୍ଶନ କରି ବାଇଶି ପାହଚ ଦେଇ ଶ୍ରୀମନ୍ଦିର ଭିତରକୁ ପ୍ରବେଶ କରିଥିଲେ । ପରେ ଶ୍ରୀମନ୍ଦିର ଭିତରେ ରତ୍ନସିଂହାସନ ଉପରେ ବିଜେ କରିଥିବା ମହାପ୍ରଭୁଙ୍କୁ ଦର୍ଶନ କରିଥିଲେ । ହକି ଟିମ୍ ସହ ବହୁ ବରିଷ୍ଠ ସେବାୟତ ଉପସ୍ଥିତ ଥିବାବେଳେ ଆଗାମୀ ଅଲମ୍ପିକ୍ସରେ ହକି ଟିମ୍ ସଫଳତା ଅର୍ଜନ କରୁ ବୋଲି ପ୍ରାର୍ଥନା କରିଥିଲେ ସେବାୟତ । ପରେ ଖେଳାଳିମାନେ ମା' ବିମଳା, ମା' ଲକ୍ଷ୍ମୀ ଓ ଅନ୍ୟାନ୍ୟ ପାର୍ଶ୍ଵ ଦେବଦେବୀଙ୍କ ମନ୍ଦିର ବୁଲି ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ । ଏହାପରେ ହକି ଟିମ୍ ସ୍ବର୍ଣ୍ଣାଭ ବେଳାଭୂମି ଯାଇ ସମୁଦ୍ର କୂଳରେ ଉପଭୋଗ କରିଥିଲେ ।  

ଇଟିଭି ଭାରତ, ପୁରୀ