ସୈତାନ ସ୍ୱାମୀ, କାଠଫାଳିଆରେ ପିଟି ସ୍ତ୍ରୀକୁ ହତ୍ୟା

Husband killed wife: ନୂଆପଡା: ସ୍ୱାମୀ ସାଜିଲା ସୈତାନ । ସ୍ତ୍ରୀର ଚରିତ୍ରକୁ ସନ୍ଦେହ କରି  କାଠ ଫାଳିଆରେ ପିଟିପିଟି ହତ୍ୟାକଲା ସ୍ୱାମୀ । ନୂଆପଡା ଜିଲ୍ଲା ଖଡ଼ିଆଳ ଥାନା ଅନ୍ତର୍ଗତ ବଡମୁଲା ଗାଁରେ ଘଟିଛି ଅଭାବନୀୟ ଘଟଣା । ସ୍ୱାମୀର କାଠଫାଳିଆ ମାଡରେ ସ୍ତ୍ରୀର ମୃତ୍ୟୁ ହୋଇଛି । ଖବର ପାଇଁ ଖଡ଼ିଆଳ ପୋଲିସ ବଡମୁଲା ଗାଁରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଅଭିଯୁକ୍ତ ସ୍ବାମୀକୁ ଗିରଫ କରିଛି ।  

ସୂଚନା ମୁତାବକ ଗୁରୁବାର ରାତ୍ରିରେ ସ୍ୱାମୀ ଅଚ୍ୟୁତ ସଗରିଆ ସ୍ତ୍ରୀ କୁନ୍ତୀ ସଗରିଆ ଖାଇ ପିଇ ଶୋଇବା ବେଳେ ସ୍ତ୍ରୀର ଚରିତ୍ରକୁ ସନ୍ଦେହ କରି ଅଚ୍ୟୁତ ଗାଳି ଗୁଳଜ କରିଥିଲେ । ପରେ ଉଭୟଙ୍କ ମଧ୍ୟରେ ଝଗଡ଼ା ଉଗ୍ରରୂପ ଧାରଣ କରିଥିଲା । କ୍ରୋଧାନ୍ୱିତ ହୋଇ ଅଚ୍ୟୁତ ଏକ କାଠ ଫାଳିଆରେ କୁନ୍ତୀର ମୁଣ୍ଡକୁ ଆକ୍ରମଣ କରିଥିଲା । ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଛି । ଖବର ପାଇ ମହିଳାଙ୍କ ଭାଇ ଖଡ଼ିଆଳ ଥାନାରେ ଏନେଇ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ଖଡ଼ିଆଳ ପୋଲିସ ଶୁକ୍ରବାର ଦିନ ତଦନ୍ତ କରିବା ସହ ଅଭିଯୁକ୍ତ ସ୍ୱାମୀକୁ ଗିରଫ କରିଛି ।

ଇଟିଭି ଭାରତ, ନୂଆପଡା