ରାତି ଅଧିଆ ଆସୁଛନ୍ତି କାରରେ ଉଠାଇ ନେଉଛନ୍ତି, ସିସିଟିଭିରେ ଗାଈ ଚୋରି ଦୃଶ୍ୟ କଏଦ - Cow theft caught on CCTV

CATTLE SMUGGLING: ଖୋର୍ଦ୍ଧା: ସାବଧାନ ! ଖୋର୍ଦ୍ଧା ଜିଲ୍ଲାରେ ମାତିଛନ୍ତି ଗୋରୁ ଚୋର । ରାତି ଅଧରେ ଗାଈଗୋରୁଙ୍କୁ ଗାଡିରେ ଉଠାଇ ନେଉଛନ୍ତି । ମାଲବୁହା ଗାଡ଼ି ନୁହେଁ ବରଂ ଯାତ୍ରୀ ଯାତାୟାତ ପାଇଁ ବ୍ୟବହାର ହେଉଥିବା ଗାଡ଼ିରେ ଗାଈଙ୍କୁ ଚୋରି କରି ନେଇଯାଉଛନ୍ତି । ଖୋର୍ଦ୍ଧା ଜିଲ୍ଲାର ବିଭିନ୍ନ ଅଞ୍ଚଳରେ ଏମିତିକା ଚୋର ଘୁରି ବୁଲୁଛନ୍ତି । ରାତି ଅଧିଆ ରାସ୍ତାରେ ବୁଲା ଗାଈଗୋରୁଙ୍କୁ ଉଠାଇ ନେଉଛନ୍ତି । ଯାହାର ସିସିଟିଭି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭିଡିଓଟି ବାଲୁଗାଁ ଥାନା ସରଳାପଦର ଛକର । ଏଥିରେ ଦେଖାଯାଉଛି କି, ବିଳମ୍ବିତ ରାତିରେ ଏକ ନାଲି ରଙ୍ଗର କାରରେ ଦୁଇ ଜଣ ଯୁବକ ଆସୁଛନ୍ତି  । ରାସ୍ତା ଉପରେ ଗାଡି ରଖି ରାସ୍ତାରେ ଥିବା ଗାଈକୁ ଧରି ଗାଡ଼ିରେ ଭର୍ତ୍ତି କରି ଫେରାର ହୋଇଯାଉଛନ୍ତି ।
 

ଖୋର୍ଦ୍ଧା ଜିଲ୍ଲାରେ ବେଆଇନ ଗୋଚାଲାଣ ବଢୁଥିବା ବେଳେ ଏହାର ଚେର ବର୍ତ୍ତମାନ ବାଲୁଗାଁ ପର୍ଯ୍ୟନ୍ତ ବ୍ୟାପିଲାଣି । ଗତକାଲି (ଶୁକ୍ରବାର) ମଧ୍ୟରାତିରେ ବାଲୁଗାଁ ଥାନା ସରଳାପଦର ଛକଠାରେ ଦୁଇ ଜଣ ଦୁର୍ବୃତ୍ତ ଏକ ନାଲି ରଙ୍ଗର କାରରେ ଗାଈ ଚୋରି କରି ନେଉଥିବା ଦୃଶ୍ୟ ସ୍ଥାନୀୟ ଏକ ଦୋକାନିଙ୍କ ସିସିଟିଭି କ୍ୟାମେରାରେ କଏଦ ହୋଇଛି । ଉକ୍ତ ସ୍ଥାନରେ ମାଳ ମାଳ ଲାଇଟ ଲାଗିଥିବା ବେଳେ ଏହା ଲୋକଙ୍କ ଚଳପ୍ରଚଳ ରାସ୍ତା । ତଥାପି ଗୋ ମାଫିଆମାନେ ଏପରି ସାହସ କେମିତି ଜୁଟାଉଛନ୍ତି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି । ତେବେ ଏହି ଖବର ପ୍ରଚାର ହେବା ପରେ ବାଲୁଗାଁ ଓ ବାଣପୁର ଅଞ୍ଚଳର ଗୋରକ୍ଷକ ଏବଂ ବୁଦ୍ଧିଜୀବୀଙ୍କ ମଧ୍ୟରେ ଆକ୍ରୋଶ ଦେଖାଦେଇଛି । ପୋଲିସ ଉକ୍ତ ଭିଡିଓର ତଦନ୍ତ କରି ନିଜ ଆଡୁ ମାମଲା ରୁଜୁ କରିବା ସହ ଅଭିଯୁକ୍ତଙ୍କୁ ଗିରଫ କରିବାକୁ ଦାବି ଜୋର ଧରିଛି । 
 

ଇଟିଭି ଭାରତ, ଖୋର୍ଦ୍ଧା