ବୌଦ୍ଧ ମହୋତ୍ସବ ଉଦଘାଟିତ,ଐତିହ୍ୟ-କଳା-ସଂସ୍କୃତିର ମହାମିଳନ

ବୌଦ୍ଧ: ପାରମ୍ପରିକ ଲୋକବାଦ୍ୟ ସହିତ ଲୋକନୃତ୍ୟର ତାଳେ ତାଳେ କମ୍ପିଲା ମହୋତ୍ସବ ମଣ୍ଡପ । ବୌଦ୍ଧ ଜିଲ୍ଲା ପ୍ରତିଷ୍ଠା ଦିବସକୁ ସ୍ମରଣୀୟ ପାଇଁ ପ୍ରତ୍ୟେକ ବର୍ଷ ଜିଲ୍ଲା ପ୍ରଶାସନ ପକ୍ଷରୁ ଜାନୁଆରୀ ୨ ଠାରୁ ଆରମ୍ଭ ହେଉଛି ଜିଲ୍ଲା ମହୋତ୍ସବ ଓ ପଲ୍ଲିଶ୍ରୀ ମେଳା । ୧୯୯୪ ମସିହା ଜାନୁଆରୀ ୨ ତାରିଖରେ ବୌଦ୍ଧ ଏକ ସ୍ବତନ୍ତ୍ର ଜିଲ୍ଲାର ମାନ୍ୟତା ପାଇଥିଲା । ଜିଲ୍ଲା ପ୍ରତିଷ୍ଠା ଦିବସ ଅବସରରେ ଜିଲ୍ଲାର ଐତିହ୍ୟ, କଳା, ସଂସ୍କୃତିକୁ ନେଇ ପ୍ରତ୍ୟେକ ବର୍ଷ ଆୟୋଜିତ ହେଉଛି ଜିଲ୍ଲା ମହୋତ୍ସବ । ଚଳିତ ବର୍ଷ ଜାନୁଆରୀ ୨ ତାରିଖ ଠାରୁ ୬ ତାରିଖ ପର୍ଯ୍ୟନ୍ତ ୫ ଦିନ ବୌଦ୍ଧ ମହୋତ୍ସବ ଓ ପଲ୍ଲିଶ୍ରୀ ମେଳା ଆୟୋଜନ ହୋଇଥିବା ବେଳେ ଗୁରୁବାର ସନ୍ଧ୍ୟାରେ ମହୋତ୍ସବ ଉଦଘାଟିତ ହୋଇଛି । 

ବୌଦ୍ଧ ସହରର ବୁଦ୍ଧ ପାର୍କ ଠାରୁ ଜିଲ୍ଲାର ୩ଟି ବ୍ଲକରୁ ଆସିଥିବା କଳାକାରମାନେ ଏକ ବିଶାଳ ଶୋଭାଯାତ୍ରାରେ ମଶାଲ ନେଇ ମହୋତ୍ସବ ପଡିଆରେ ସ୍ଥାପନା କରିବା ପରେ ପଦ୍ମଶ୍ରୀ ସାଧୁଚରଣ ମେହେର ମଣ୍ଡପରେ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ବିଶେଷ ଭାବରେ ମହୋତ୍ସବ ମଣ୍ଡପରେ ବୌଦ୍ଧ ଜିଲ୍ଲା ସମେତ ରାଜ୍ୟର ବିଭିନ୍ନ ଲୁପ୍ତପ୍ରାୟ ଲୋକକଳାକୁ ବଞ୍ଚାଇ ରଖିବାକୁ ଉଦ୍ୟମ କରାଯାଇଛି । ପାରମ୍ପରିକ ଲୋକବାଦ୍ୟ ସହିତ ଲୋକନୃତ୍ୟ ଉଦଘାଟନ ଦିବସରେ ବିଳମ୍ବିତ ରାତି ପର୍ଯ୍ୟନ୍ତ ଦର୍ଶକଙ୍କୁ ବାନ୍ଧି ରଖିଥିଲା । 

ମହୋତ୍ସବରେ ଅତିଥି ଭାବରେ ବୌଦ୍ଧ ବିଧାୟକ ସରୋଜ କୁମାର ପ୍ରଧାନ, କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ, ଦିଗପହଣ୍ଡି ବିଧାୟକ ତଥା ସିନେ ତାରକା ସିଦ୍ଧାନ୍ତ ମହାପାତ୍ର ପ୍ରମୁଖ ଯୋଗଦେଇ ବୌଦ୍ଧ ମହୋତ୍ସବକୁ ଆନୁଷ୍ଠାନିକ ଭାବରେ ଉଦଘାଟନ କରିଥିଲେ । ବୌଦ୍ଧ ଜିଲ୍ଲାପାଳ ସୁବ୍ରତ କୁମାର ପଣ୍ଡାଙ୍କ ନେତୃତ୍ୱରେ ଜିଲ୍ଲା ମହୋତ୍ସବକୁ ଅଧିକ ଆକର୍ଷଣୀୟ ପାଇଁ ବାଲୁକା କଳା ପ୍ରଦର୍ଶନ ସହିତ ରାଜ୍ୟ ତଥା ଦେଶର ବିଭିନ୍ନ ଅଞ୍ଚଳରୁ ଆସିଥିବା ବିପଣନ ସାମଗ୍ରୀର ଷ୍ଟଲ ସବୁ ଖୋଲାଯାଇଛି । କାର୍ଯ୍ୟକ୍ରମରେ ଅତିଥି ରୂପେ ଯୋଗ ଦେଇଥିବା ବିଧାୟକ ତଥା ଅଭିନେତା ସିଦ୍ଧାନ୍ତ ମହାପାତ୍ର ବୌଦ୍ଧ ଜିଲ୍ଲାର ଐତିହ୍ୟ ସଂସ୍କୃତି କୁନେଇ ଖୁବ ପ୍ରଭାବିତ ହୋଇଥିଲେ । 

ଏହା ମଧ୍ଯ ପଢ଼ନ୍ତୁ...ବୌଦ୍ଧରେ ପାରମ୍ପରିକ ଲୋକନୃତ୍ୟରେ ଦୁଲୁକୁଛି ମା' ଭୈରବୀ ମହୋତ୍ସବ ମଞ୍ଚ ଏହା ମଧ୍ଯ ପଢ଼ନ୍ତୁ...ଭିନ୍ନ ଏକ ଶକ୍ତିପୀଠ, ଏକାଦଶୀ ତିଥିରେ ହୁଏ ଦଶହରା ଉତ୍ସବ

ଇଟିଭି ଭାରତ, ବୌଦ୍ଧ