ପୁରୀରେ ବଲିଉଡ ଅଭିନେତ୍ରୀ ଜୁହି ଚାୱଲା, ଆସିବାର କାରଣ କହିଲେ... - Juhi Chawla visits Puri Sri Mandir

ପୁରୀ: ବଲିଉଡର ଲୋକପ୍ରିୟ ଅଭିନେତ୍ରୀ ତଥା ଫିଲ୍ମ ନିର୍ମାତା ଜୁହି ଚାୱଲା ପୁରୀ ଗସ୍ତ କରିଛନ୍ତି । ଆଜି ପୁରୀ ଗସ୍ତରେ ଆସି ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ ସହ ଆଶିଷ ଲାଭ କରିଛନ୍ତି । ମହାପ୍ରଭୁଙ୍କ ଦର୍ଶନ କରି ସେ ନିଜକୁ ଭାଗ୍ୟବାନ ମନେ କରିଥିବା କହିଛନ୍ତି । ଆଜି ଏକାଦଶୀର ଏକ ଶୁଭ ଦିନରେ ମହାପ୍ରଭୁଙ୍କ ଡୋରି ତାଙ୍କୁ ପୁରୀ ଟାଣି ଆଣିଛି ବୋଲି ସେ କହିଛନ୍ତି । ତେବେ ମହାପ୍ରଭୁଙ୍କ ଦର୍ଶନ ସହ ମା' ଲକ୍ଷ୍ମୀ, ବିମଳା ଓ ଅନ୍ୟାନ୍ୟ ପାର୍ଶ୍ଵ ଦେବାଦେବୀଙ୍କ ଦର୍ଶନ କରି ବେଶ୍ ଭାବବିଭୋର ହୋଇପଡିଥିବା କହିଛନ୍ତି ଜୁହି ଚାୱଲା ।  

କିଛି ମାସ ହେଲା ମହାପ୍ରଭୁଙ୍କ ଦର୍ଶନ ପାଇଁ ସେ ଶ୍ରୀମନ୍ଦିର ଆସିବାକୁ ମନସ୍ଥ କରିଥିଲେ । ତେବେ ମହାପ୍ରଭୁ ତାଙ୍କ ଆଶା ଆଜି ପୂରଣ କରିଥିବାରୁ ମହାପ୍ରଭୁଙ୍କ ପାଖରେ ସେ ନିଜକୁ ସମର୍ପଣ କରିଦେଇଥିବା କହିଛନ୍ତି । ସେହିପରି ମହାପ୍ରଭୁଙ୍କ ଆଶୀର୍ବାଦରୁ ୨୦୨୪ ଆଇପିଏଲ ମହାସମରରେ କେକେଆର୍ ବିଜୟ ହାସଲ କରିଥିବାରୁ ସେ ମହାପ୍ରଭୁଙ୍କୁ ଧନ୍ୟବାଦ ଦେବା ପାଇଁ ପୁରୀ ଆସିଥିବା କହିଛନ୍ତି । ଆଗକୁ ନିଜ କର୍ମମୟ ଜୀବନ କିଭଳି ସୁରୁଖୁରୁରେ ଚାଲିବ ଏବଂ ଦେଶବାସୀଙ୍କ ସୁଖ ସମୃଦ୍ଧି ମଧ୍ୟ କାମନା କରିଛନ୍ତି ବରିଷ୍ଠ ଅଭିନେତ୍ରୀ ଜୁହି ଚାୱଲା ।  ଆଗାମୀ ଦିନରେ ମଧ୍ୟ ମହାପ୍ରଭୁଙ୍କୁ ଦର୍ଶନ ପାଇଁ ଆସିବେ ବୋଲି ଜୁହି ଚାୱଲା କହିଛନ୍ତି ।

ଇଟିଭି ଭାରତ, ପୁରୀ