ବିଜେପିର କଳାହାଣ୍ଡି କ୍ୟାମ୍ପେନ, ଭୋଟ ମାଗିଲେ ପ୍ରଦୀପ୍ତ-ମାଳବିକା - BJP CAMPAIGN IN KALAHANDI

BJP ELECTION CAMPAIGN IN KALAHANDI, ଭବାନୀପାଟଣା: ଦିନ କେଇଟା ପରେ ନିର୍ବାଚନ । ପ୍ରଚାର ମୈଦାନକୁ ଓହ୍ଲାଇଲେଣି ପ୍ରାର୍ଥୀ । ଖରା ଓ ବର୍ଷାକୁ ଖାତିର ନ କରି ରାତି ଦିନ ଘର ଘର ବୁଲି ଭୋଟ୍ ମାଗିଲେଣି । ଏହି କ୍ରମରେ କଳାହାଣ୍ଡିରେ ବିଜେପି ନିଜର ପ୍ରଚାରକୁ ଜୋରଦାର କରିଛି । ଜିଲ୍ଲା ବିଜେପି ପକ୍ଷରୁ ସହରରେ ବିଶାଳ ଶୋଭାଯାତ୍ରା କରାଯାଇଛି । ସ୍ବାସ୍ଥ୍ୟ ସମସ୍ୟା ସତ୍ତ୍ବେ ଭବନୀପାଟଣା ଆସନରୁ ବିଧାୟକ ପ୍ରାର୍ଥୀ ହୋଇଥିବା ପ୍ରଦୀପ୍ତ ନାଏକ ଶୋଭାଯାତ୍ରାରେ ସାମିଲ ହୋଇ ଲୋକଙ୍କୁ ଭୋଟ ଭିକ୍ଷା କରିଛନ୍ତି  । ବୁଧବାର କେସିଙ୍ଗାଠାରୁ ଏକ ବିଶାଳ ବାଇକ୍ ଶୋଭାଯାତ୍ରାରେ ଭବାନୀପାଟଣା ବିଜେପି ବିଧାୟକ ପ୍ରାର୍ଥୀ ପ୍ରଦୀପ୍ତ ନାଏକ, ଲୋକସଭା ପ୍ରାର୍ଥୀ ମାଳବିକା କେଶରୀ ଦେଓ ଶୋଭାଯାତ୍ରାରେ ବାହାରି ଲୋକଙ୍କ ନିକଟରେ ପହଞ୍ଚିଥିଲେ । ପରେ ଭବାନୀପାଟଣା ଠାରେ ପହଞ୍ଚିବା ପରେ ସହରରେ ମଧ୍ୟ ବାଇକ୍ ରାଲି ହୋଇଥିଲା । ଉଭୟ ପ୍ରାର୍ଥୀ ପ୍ରଥମେ ଜିଲ୍ଲାର ଅଧିଷ୍ଠାତ୍ରୀ ଦେବୀ ମା' ମାଣିକେଶରୀଙ୍କ ଦର୍ଶନ କରିବା ସହ ଗାନ୍ଧୀ ଛକରେ ଅନୁଷ୍ଠିତ ଏକ ସଭାରେ ଯୋଗ ଦେଇଥିଲେ । ଜିଲ୍ଲା ବିଜେପି ସଭାପତି ଆର୍ତ୍ତତ୍ରାଣ ମହାପାତ୍ରଙ୍କ ସଭାପତିତ୍ୱରେ ଅନୁଷ୍ଠିତ ଏହି ସଭାରେ ଦୁଇ ପ୍ରାର୍ଥୀଙ୍କ ସମେତ ପୂର୍ବତନ ବିଧାୟକ ଅନାମ ନାଏକ, ପୂର୍ବତନ ସାଂସଦ ଅର୍କକେଶରୀ ଦେଓ ଏବଂ ବହୁ ବିଜେପି କର୍ମକର୍ତ୍ତା ସାମିଲ ହୋଇଥିଲେ  ।

ଇଟିଭି ଭାରତ, କଳାହାଣ୍ଡି