କୋରେଇ ଆସନ: ଆକାଶଙ୍କ ପାଇଁ ପ୍ରଚାର କଲେ ପତ୍ନୀ, ଗ୍ୟାରେଣ୍ଟି କାର୍ଡ ନେଇ ଜନତାଙ୍କ ପାଖରେ କଂଗ୍ରେସ ପ୍ରାର୍ଥିନୀ - Korei Assembly constituency

Korei Assembly constituency: ଯାଜପୁର: ପାଖଉଛି ନିର୍ବାଚନ । ସରଗରମ ପ୍ରଚାର ମଇଦାନ । ଗାଁଠୁ ସହର ସବୁଠି ଜୋରଦାର ପ୍ରଚାର । ଭୋଟ ହାତେଇବାକୁ ଜନତାଙ୍କ ନିକଟତର ହେଉଛନ୍ତି ନେତା । ଏଥର କୋରେଇ ବିଧାନସଭା ଆସନରେ, କଂଗ୍ରେସ ବିଜେଡି ଓ ବିଜେପି ମଧ୍ୟରେ ହେବ କଡ଼ା ଫାଇଟ । ବ୍ୟାସନଗର ପୌର ପରିଷଦ ସ୍ଥିତ କୁସୁନପୁର ଦୁର୍ଗା ମନ୍ଦିରରେ ପୂଜାର୍ଚ୍ଚନା କରି ପ୍ରଚାର ମୈଦାନକୁ ଓହ୍ଲାଇଛନ୍ତି କଂଗ୍ରେସ ପ୍ରାର୍ଥିନୀ ବନ୍ଦିତା ପରିଡା । ସେପଟେ ବିଜେପି ପକ୍ଷରୁ ପ୍ରାର୍ଥୀ ହୋଇଥିବା ଆକାଶ ଦାସ ନାୟକଙ୍କ ପାଇଁ ପ୍ରଚାର କରୁଛନ୍ତି ତାଙ୍କ ପତ୍ନୀ ଶୁଭ୍ରଜ୍ୟୋତି ଦାସନାୟକ । ଏହି ଆସନ ପାଇଁ ବିଜେଡି ପ୍ରଣବ ପ୍ରକାଶ ଦାସଙ୍କ ମାଆ ସନ୍ଧ୍ୟାରାଣୀ ଦାସଙ୍କୁ ଟିକଟ ଦେଇଛି । ଗତକାଲି ମନ୍ଦିରରେ ପୂଜାର୍ଚ୍ଚନା ପରେ ଏକ ବିଶାଳ ବାଇକ ରାଲିରେ ବାହାରି ବ୍ୟାସନଗର ସହର ପରିକ୍ରମା କରିଥିଲେ କଂଗ୍ରେସ ପ୍ରାର୍ଥିନୀ । ଦଳର ଗ୍ୟାରେଣ୍ଟି କାର୍ଡ ନେଇ ଭୋଟରଙ୍କ ନିକଟତର ହେବାକୁ ଚେଷ୍ଟା କରୁଛନ୍ତି ସେ l ଏହି ରାଲିରେ କୋରେଇ ନିର୍ବାଚନ ମଣ୍ଡଳୀର କଂଗ୍ରେସ ଦଳର ଶତାଧିକ ଯୁବ, ମହିଳା ଓ ବରିଷ୍ଠ କଂଗ୍ରେସ ନେତା ଯୋଗଦେଇ ପ୍ରାର୍ଥୀଙ୍କ ପାଇଁ ଭୋଟ ମାଗିଥିଲେ l ଅନ୍ୟପଟେ ଆକାଶଙ୍କ ପତ୍ନୀ ବ୍ୟାସନଗର ପୌରାଞ୍ଚଳରେ ମହିଳା କର୍ମୀମାନଙ୍କ ସହ ଘର ଘର ବୁଲି କୋରେଇ ଅସ୍ମିତା, ସ୍ୱାଭିମାନ ଓ ସମ୍ମାନର କଥା କହି ସ୍ବାମୀଙ୍କ ପାଇଁ ଭୋଟ ଭିକ୍ଷା କରିଛନ୍ତି ।  

ଇଟିଭି ଭାରତ, ଯାଜପୁର