ଅଗ୍ନିରୁପା ମା’ ହିଙ୍ଗୁଳାଙ୍କ ଆଶିଷ ନେଲେ ବିଧାୟକ ଓ ସାଂସଦ ପାର୍ଥୀ, ହଜାର ହଜାର ସମର୍ଥକ ସାମିଲ - Odisha Assembly Polls 2024

Maa Hingula Temple: ଅନୁଗୋଳ: ପାଖେଇ ଆସୁଛି ଲୋକସଭା ଓ ବିଧାନସଭା ନିର୍ବାଚନ । ମୈଦାନ ପ୍ରସ୍ତୁତ, ଯୋଦ୍ଧା ବି ତୟାର । ଆରମ୍ଭ ହୋଇଗଲାଣି ଜୋରଦାର ପ୍ରଚାର । ତେବେ ନିର୍ବାଚନ ମୈଦାନକୁ ଓହ୍ଲାଇବା ପୂର୍ବରୁ ଆଜି ତାଳଚେରର ଅଧିଷ୍ଠାତ୍ରୀ ଦେବୀ ମା’ ହିଙ୍ଗୁଳାଙ୍କ ଆଶିଷ ଭିକ୍ଷା କରିଛନ୍ତି ବିଜେଡି ପ୍ରାର୍ଥୀ । ତାଳଚେର ବିଧାୟକ ପାର୍ଥୀ ବ୍ରଜକିଶୋର ପ୍ରଧାନଙ୍କ ସହ ଢେଙ୍କାନାଳ ସାଂସଦ ପାର୍ଥୀ ଅଭିନାଶ ସାମଲଙ୍କୁ ମା’ଙ୍କ ପୀଠରେ ପୂଜା କରୁଥିବା ଦେଖିବାକୁ ମିଳିଛି ।  

ତାଳଚେର ବିଧାନସଭା ପାଇଁ ବିଜେଡିର ପାର୍ଥୀ ଘୋଷଣା ପରେ ଆଜି ବିଧାୟକ ପାର୍ଥୀ ତଥା ବିଧାୟକ ବ୍ରଜକିଶୋର ପ୍ରଧାନ ତାଙ୍କ କର୍ମୀଙ୍କ ସହ ମା’ଙ୍କ ପାଖରେ ପୂଜାର୍ଚ୍ଚନା କରିଛନ୍ତି । ହଜାର ହଜାର କର୍ମୀଙ୍କ ଗହଣରେ ଉଭୟ ସାଂସଦ ଓ ବିଧାୟକ ପାର୍ଥୀ ମା’ଙ୍କ ପାଖରେ ପୂଜାର୍ଚ୍ଚନା କରିବା ସହ କର୍ମୀଙ୍କ ସହଯୋଗ କାମନା କରିଛନ୍ତି । ଆଜି ଅପରାହ୍ନରେ ବ୍ରଜକିଶୋର ଏବଂ ଅବିନାଶ ବିରାଟ ଶୋଭାଯାତ୍ରାରେ ହିଙ୍ଗୁଳା ମନ୍ଦିର ପହଞ୍ଚିଥିଲେ । ପ୍ରାୟ ୫ହଜାରରୁ ଅଧିକ କର୍ମୀ ଓ ସମର୍ଥକ ବାଜା ବଜାଇ ସେମାନଙ୍କୁ ମନ୍ଦିର ପର୍ଯ୍ୟନ୍ତ ଆଣିଥିଲେ। ଏହାପରେ ଉଭୟ ପ୍ରାର୍ଥୀଙ୍କୁ ଫୁଲତୋଡା ଦେଇ ସମ୍ବର୍ଦ୍ଧନା ଜଣାଇଥିଲେ । ଏହି ଅବସରରେ ବିଧାୟକ ପ୍ରାର୍ଥୀ ବ୍ରଜକିଶୋର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କୃତଜ୍ଞତା ଜଣାଇଥିଲେ । ମୁଖ୍ୟମନ୍ତ୍ରୀ ତାଙ୍କ ଉପରେ ପୁଣି ଥରେ ଭରସା କରିଥିବାରୁ ତାଳଚେରବାସୀଙ୍କ ସେବା କରି ମୁଖ୍ୟମନ୍ତ୍ରୀଙ୍କ ଭରସାକୁ ଅତୁଟ ରଖିବେ ବୋଲି କହିଛନ୍ତି ବ୍ରଜ । ଆସନ୍ତାକାଲିଠାରୁ ମୁଖ୍ୟମନ୍ତ୍ରୀଙ୍କ ଜନକଲ୍ୟାଣ କାର୍ଯ୍ୟକ୍ରମଗୁଡିକୁ ନେଇ ଲୋକଙ୍କ ପାଖକୁ ଯିବେ ବୋଲି ସେ କହିଛନ୍ତି ।

ଇଟିଭି ଭାରତ, ଅନୁଗୋଳ