ଲୌହ ଦାନବ ନେଲା ଦନ୍ତାର ଜୀବନ

ଢେଙ୍କାନାଳ: ଟ୍ରେନ ଧକ୍କାରେ ଦନ୍ତାର ମୃତ୍ୟୁ । ପୂର୍ବତଟ ରେଳପଥର ଢେଙ୍କାନାଳ ଚିନ୍ତାପୋଖରୀ ନିକଟରେ ଘଟିଛି ଏହି ଅଘଟଣ । ୩୫ ଟିକିଆ ହାତୀପଲ ଟ୍ରେନ ଲାଇନ ଅତିକ୍ରମ କରୁଥିବାବେଳେ ଧକ୍କା ଦେଇଛି ଟ୍ରେନ । ମୃତ ଦନ୍ତାର ବୟସ ପ୍ରାୟ ୨୦ବର୍ଷ ବୋଲି ଜଣାପଡିଛି । ଢେଙ୍କାନାଳ ବନଖଣ୍ଡର ସଦର ବନାଞ୍ଚଳ ଅନ୍ତର୍ଗତ ମେରାମୁଣ୍ଡଳୀ ଫରେଷ୍ଟ ସେକ୍ସନ ଚିନ୍ତାପୋଖରୀ ଗ୍ରାମ ନିକଟରେ ଗତ ମଧ୍ୟ ରାତ୍ରରେ ଏହି ଅଘଟଣ ଘଟିଛି । ମେରାମୁଣ୍ଡଳୀ ଷ୍ଟେସନଠାରୁ ମାତ୍ର ୩ କିଲୋମିଟର ଦୂର ଅପଲାଇନରେ ଘଟିଛି ଏହି ଦୁର୍ଘଟଣା । ଖବର ପାଇ ଘଟଣା ସ୍ଥଳରେ ବନ ବିଭାଗ , ରେଳ ବିଭାଗ ଏବଂ ସ୍ଥାନୀୟ ପୋଲିସ ପହଞ୍ଚି ହାତୀର ମୃତଦେହକୁ ଉଦ୍ଧାର କରିଛନ୍ତି । ହାତୀ ପଲ ସ୍ଥାନୀୟ ଜଙ୍ଗଲରେ ରହିଥିବାବେଳେ ଲୋକେ ଆତଙ୍କିତ ହୋଇପଡ଼ିଛନ୍ତି । ସେପଟେ ଏପରି ଦୁର୍ଘଟଣା ବାରମ୍ବାର ଘଟୁଥିବାରୁ ସ୍ଥାନୀୟ ସରପଞ୍ଚ ସ୍ଥାୟୀ ସମାଧାନ ପାଇଁ ଅନୁରୋଧ କରିଛନ୍ତି । 

ଇଟିଭି ଭାରତ, ଢେଙ୍କାନାଳ