ଭୁବନେଶ୍ବର: ପୂଜା ପୂର୍ବରୁ ରାଜଧାନୀରେ ଅଶାନ୍ତ ପରିବେଶ । ସାଧାରଣରେ ଖୁଲମଖୁଲା ଦୁର୍ବୃତ୍ତଙ୍କ ସିରିଜ ବୋମାମାଡ । ବୋମାମାଡରେ ଥରିଲା ବାପୁଜୀନଗର ଓ ଶିଶୁଭବନ ଛକ । କ୍ୟାପିଟାଲ ଥାନା ଅଞ୍ଚଳରେ ଦୁଇଟି ସ୍ଥାନରେ ବୋମାମାଡ ହୋଇଛି । ଦୁଇ ଜଣ ଦୁର୍ବୃତ୍ତ ବାଇକ ଯୋଗେ ଆସି ୩ଟି ବୋମାମାଡ କରି ଚମ୍ପଟ ମାରିଥିଲେ । ଫଳରେ ବାପୁଜୀନଗର ଓ ଶିଶୁଭବନ ଛକ ପାଖରେ ରାତି ୧୧ସମୟରେ ସ୍ଥାନୀୟ ଅଞ୍ଚଳରେ ଲୋକେ ଭୟରେ ଥରହର ହୋଇଥିଲେ । ଘଟଣାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ସ୍ଥାନୀୟ ବାସିନ୍ଦା ।
ବୋମାମାଡରେ ଥରିଲା ରାଜଧାନୀ:
ଏନେଇ ସ୍ଥାନୀୟ ଜଣେ ଯୁବକ କହିଛନ୍ତି," ବାପୁଜୀନଗର କେଦାପଲ୍ଲୀ ପାଖ କାସା ଲିଭି ପାଖରେ ଥିବା ସ୍ପୋର୍ଟସ ଏମ୍ପୋରିୟମ କଡ଼ରେ ତା ପଛକୁ ଯିବାକୁ ଯେଉଁ ବାଟ ଅଛି ସେହି ପାଚେରୀ ଉପରକୁ ଦୁଇଟି ବୋମାମାଡ କରାଯାଇଛି । ଦୁଇଜଣ ବାଇକରେ ଆସି ଦୁଇ ଥର ବୋମାମାଡ କରିଥିବା ମୁଁ ଶୁଣିବାକୁ ପାଇଲି ।ଏହାପରେ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । "
ଆତଙ୍କିତ ରାଜଧାନୀବାସୀ:
ସେହିପରି ଅନ୍ୟ ଜଣେ ସ୍ଥାନୀୟ ବାସିନ୍ଦା କହିଛନ୍ତି," ଆମେ ରାତି ପ୍ରାୟ ୧୧ଟା ସମୟରେ ଘରେ ଖାଇବାକୁ ବସିଥିଲୁ । ହଠାତ୍ ଜୋରରେ ଶବ୍ଦ ହେଲା ଆଉ କମ୍ପି ଉଠିଲା । ଏନେଇ ଆମେ ଭାବିଲୁ କୌଣସି ଭସାଣି ହେଉଛି ବୋଲି ହେଲେ ପୁଣିଥରେ ବୋମା ଫୁଟିଲା । ଆମେ ପୁରା ଭୟଭୀତ ହୋଇଗଲୁ । ଗ୍ରୀନ କଲର ସାର୍ଟ ପିନ୍ଧିକି ଆସିଥିବା ଦୁଇ ଜଣ ଦୁର୍ବୃତ୍ତ ବୋମା ଫୋପାଡ଼ି ଚମ୍ପଟ ମାରିଥିଲେ ।"
ବୋମାମାଡର କାରଣ ଅସ୍ପଷ୍ଟ:
ତେବେ ବୋମାମାଡ କେବଳ ବାପୁଜୀନଗର ଭିତରେ ଲେନ ନମ୍ବର ୧ ପାଖରେ ନୁହେଁ ପରେ ଦୁର୍ବୃତ୍ତ ମାନେ ଝରଣା ସାହି ପାଖରେ ମଧ୍ୟ ଆଉ ଏକ ବୋମାମାଡ କରିଥିଲେ । ଏନେଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ତେବେ ଦାଦାବଟି ବା ଭାଇଗିରି ବା କୋୖଣସି ବ୍ୟକ୍ତିଗତ ରାଗ ରଖି ବୋମାମାଡ ହୋଇଛି, ସେନେଇ ଛାନଭିନ କରୁଛି ପୋଲିସ ।
ଇଟିଭି ଭାରତ, ଭୁବନେଶ୍ବର
