ଭୁବନେଶ୍ବର: ଓଡ଼ିଶା ଆସିବେ ୫ ମହାବଳ । ଦେବ୍ରିଗଡ଼ ଅଭୟାରଣ୍ୟ ପାଇଁ ୩ ଓ ଶିମିଳିପାଳ ପାଇଁ ୨ ବାଘ ଆସିବେ । ଅଗଷ୍ଟ ଶେଷ ସୁଦ୍ଧା ଦେବ୍ରିଗଡ଼ ପାଇଁ ମହାରାଷ୍ଟ୍ର ଓ ମଧ୍ୟପ୍ରଦେଶରୁ ବାଘ ଅଣାଯିବ ବୋଲି ଜଣାପଡ଼ିଛି । ଅକ୍ଟୋବର ଶେଷ ସୁଦ୍ଧା ଶିମିଳିପାଳ ପାଇଁ ମଧ୍ୟପ୍ରଦେଶ, ମହାରାଷ୍ଟ୍ରରୁ ଆସିବେ ମହାବଳ ବାଘ । ୫ଟି ମହାବଳ ବାଘ ଓଡ଼ିଶା ଆସିବା ନେଇ ବନ ବିଭାଗ ପକ୍ଷରୁ ସୂଚନା ଦିଆଯାଇଛି । ବନ ବିଭାଗର ତଥ୍ୟ ଅନୁସାରେ, ଦେବ୍ରିଗଡ଼ ପାଇଁ ଆସିବାକୁ ଥିବା ୩ ମହାବଳ ମଧ୍ୟରୁ ୧ ଅଣ୍ଡିରା ମହାବଳ ଏବଂ ୨ଟି ବାଘୁଣୀ ଅଣାଯିବ । ଏହାସହ ଶିମିଳିପାଳ ପାଇଁ ୨ଟି ମହାବଳ ବାଘ ମଧ୍ୟରୁ ୨ଟି ଯାକ ବାଘୁଣୀ ରହିଛନ୍ତି । ଏହାସହ ଅନ୍ୟାନ୍ୟ ଜୀବଜନ୍ତୁ ଅଦଳବଦଳ ହେବାର ଯୋଜନା ମଧ୍ୟ କରାଯାଇଛି ।
୨୦ଟି ଗୟଳ ଦେବ୍ରିଗଡ଼ରୁ ଚନ୍ଦକା ଅଭୟାରଣ୍ୟକୁ ଅଣାଯିବ । ସେଥିରେ ରହିଛି ୫ଟି ଅଣ୍ଡିରା ଗୟଳ ସମେତ ୧୫ଟି ମାଈ ଗୟଳ । ଏହା ଜୁଲାଇ ୩୧ ମଧ୍ୟରେ ଆସିବେ । ସେହିପରି ଭାବରେ ୧୧୫ଟି ଚିତ୍ରା ହରିଣ ସମ୍ବଲପୁର ପ୍ରାଣୀ ଉଦ୍ୟାନରୁ ଦେବ୍ରିଗଡ଼ ଜୁଲାଇ ୩୧ ସୁଦ୍ଧା ଆସିବ । ଏଥିରେ ରହିଛନ୍ତି ୫୬ଟି ଅଣ୍ଡିରା, ୪୬ଟି ମାଈ ଏବଂ ୧୩ଟି ଛୋଟ ହରିଣ । ଏହାସହ ତପ୍ତପାଣି ହରିଣ ପାର୍କରୁ ଲାଖରି ଭ୍ୟାଲିକୁ ଆସିବେ ୩୨ଟି ଚିତ୍ରା ହରିଣ ଯାହା ଜୁଲାଇ ୨୦ ସୁଦ୍ଧା ଆସିବେ । ଅନୁଗୋଳର ହରିଣ ପାର୍କ ନାଲକୋ ନଗରରୁ ଢେଙ୍କାନାଳର କନ୍ଧାରା ୨୫ ଜୁଲାଇ ସୁଦ୍ଧା ୫୫ଟି ଚିତ୍ରା ହରିଣ ଆସିବେ । ସେଥିରେ ରହିଛନ୍ତି ୨୨ଟି ଅଣ୍ଡିରା ଏବଂ ୩୫ ଟି ମାଈ ଚିତ୍ରା ହରିଣ । ଏହାସହ ନନ୍ଦନକାନନ ପ୍ରାଣୀ ଉଦ୍ୟାନର ଚନ୍ଦକା ଅଭୟାରଣ୍ୟକୁ ଜୁଲାଇ ୧୦ ତାରିଖ ମଧ୍ୟରେ ୧୦୦ଟି ଚିତ୍ରା ହରିଣ ଆସିବେ । ସେଥିରେ ରହିଛନ୍ତି ୫୦ଟି ଅଣ୍ଡିରା ଏବଂ ଆଉ ୫୦ଟି ମାଈ ଚିତ୍ରା ହରିଣ ।
ଅନ୍ୟପଟେ ନନ୍ଦନକାନନ ପ୍ରାଣୀ ଉଦ୍ୟାନରୁ ୫୦୦ଟି ଚିତ୍ରା ହରିଣ ଢେଙ୍କାନାଳର କାନ୍ଧାରା, ସାତକୋଶିଆ ବାଘ ଅଭୟାରଣ୍ୟ, କୁଲଢିହା ଅଭୟାରଣ୍ୟକୁ ଅଗଷ୍ଟ ୩୧ ସୁଦ୍ଧା ଆସିବ। କୃଷ୍ଣସାର ମୃଗ ଗଞ୍ଜାମର ବେଠୋନି ଅଞ୍ଚଳରୁ କୋଣାର୍କର ବାଲୁକାଖଣ୍ଡକୁ ଜୁଲାଇ ୨୦ ସୁଦ୍ଧା ଆସିବେ ୮ ଟି କୃଷ୍ଣସାର ମୃଗ । ଯେଉଁଥିରେ ରହିଛନ୍ତି ୨ ଅଣ୍ଡିରା ଏବଂ ୬ ମାଈ ମୃଗ । ଏହାସହ ନନ୍ଦନକାନନ ପ୍ରାଣୀ ଉଦ୍ୟାନରୁ କୋଣାର୍କ ବାଲୁକାଖଣ୍ଡକୁ ୧୦ଟି କୃଷ୍ଣସାର ମୃଗ ଅଗଷ୍ଟ ୧୫ ମଧ୍ୟରେ ୪ ଟି ଅଣ୍ଡିରା ଏବଂ ୬ ମାଇ କୃଷ୍ଣସାର ମୃଗ ଆସିବେ । ଅନ୍ୟପଟେ ନନ୍ଦନକାନନ ପ୍ରାଣୀ ଉଦ୍ୟାନରୁ ଶିମିଳିପାଳ ରିଭରକୁ ୩୦ଟି ମଗର କୁମ୍ଭୀର ନଭେମ୍ବର ୧୫ ସୁଦ୍ଧା ଆସିବେ । ସେଥିରେ ରହିଛନ୍ତି ୧୦ଟି ଅଣ୍ଡିରା ୨୦ଟି ମାଈ ମଗର କୁମ୍ଭୀର । ସେହିପରି ୨୦ଟି ଲୁଣି କୁମ୍ଭୀର ନନ୍ଦନକାନନ ପ୍ରାଣୀ ଉଦ୍ୟାନରେ କୁମ୍ଭୀର ପ୍ରଜନନ ପାଇଁ ରଖାଯାଇଛି ।
ଇଟିଭି ଭାରତ, ଭୁବନେଶ୍ବର
