ଭୁବନେଶ୍ବର: ଖୋଲିବ 10 ବର୍ଷ ତଳର ମର୍ଡର ମିଷ୍ଟ୍ରି ଫାଇଲ । 2016ରେ ଘଟିଥିବା ବହୁ ଚର୍ଚ୍ଚିତ ଆଶୁତୋଷ ମହାନ୍ତି ଓରଫ ଋଷି ମୃତ୍ୟୁ ରହସ୍ୟର ଖୋଲିବାକୁ ଯାଉଛି ବିଜେପି । ଏହି ମର୍ଡର ଫାଇଲ ଖୋଲିବାକୁ ସରକାରଙ୍କ ନିକଟରେ ନିବେଦନ କରିବ ବିଜେପି । ଏନେଇ ଆଜି ଏକାମ୍ର ବିଧାୟକ ବାବୁ ସିଂ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି । ଏହି ଘଟଣାରେ ପୂର୍ବତନ ମେୟର ତଥା ବର୍ତ୍ତମାନର ଭୁବନେଶ୍ବର ମଧ୍ୟ ବିଧାୟକ ଅନନ୍ତ ନାରାୟଣ ଜେନାଙ୍କ ସମ୍ପୃକ୍ତି ଥିବା ସେ ସମୟରେ ସାମ୍ବାଦିକ ସମ୍ମିଳନୀ କରି ଅଭିଯୋଗ ଆଣିଥିଲା କଂଗ୍ରେସ । ସେପଟେ ଏହାକୁ ନେଇ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟକ ଅନନ୍ତ ନାରାୟଣ ଜେନା ।
ଖୋଲିବ ଋଷି ହତ୍ୟାକାଣ୍ଡର ଗୁମର:
ବିଜେପି ବିଧାୟକ ବାବୁ ସିଂ କହିଛନ୍ତି, " ବିଗତ 10 ବର୍ଷ ତଳେ ଋଷିର ଯେଉଁ ହତ୍ୟାକାଣ୍ଡ ଘଟିଥିଲା ତାହାର ପର୍ଦ୍ଦାଫାସ ବା ତା ପରିବାରକୁ କିଏ ସମବେଦନା ଜଣାଇଥିଲା । ତତ୍କାଳୀନ ମେୟର ସେହି ଘଟଣାରେ ସମ୍ପୃକ୍ତି ଥିବା ସନ୍ଦେହ ଘେରରେ ଅଛନ୍ତି । ସେହି ହତ୍ୟାକାଣ୍ଡର ଫାଇଲ ଖୋଲିବାକୁ ଆମେ ସରକାରଙ୍କୁ ନିଶ୍ଚିତ ଜଣାଇବୁ । ଋଷି ମୃତ୍ୟୁର ଫାଇଲ ଖୋଲିଲେ ତା’ ପରିବାର ନିଶ୍ଚିତ ଶାନ୍ତିରେ ଜୀବନଯାପନ କରିପାରିବେ । ଆଜିବି ତାଙ୍କ ପରିବାର ଦୁଃଖ ଭିତରେ ରହିଛନ୍ତି ।’
ଯେତେ ତଦନ୍ତ କଲେ ମୁଁ ପ୍ରସ୍ତୁତ:
ବିଜେପି ବିଧାୟକ ବାବୁ ସିଂଙ୍କ ଏପରି ଅଭିଯୋଗ ପରେ ପ୍ରତିକ୍ରିୟା ରଖିଛନ୍ତି ମଧ୍ୟ ବିଧାୟକ ଅନନ୍ତ ନାରାୟଣ ଜେନା । ସେ କହିଛନ୍ତି, ‘ଯେ କୌଣସି ତଦନ୍ତ ହେଲେ ମୁଁ ପ୍ରସ୍ତୁତ । ମୁଁ ସବୁବେଳେ ସ୍ବାଗତ କରିଛି । ମୁଁ ମୂଳରୁ କହିଛି, ଭବିଷ୍ୟତରେ ବି କହିବି ଜୀବନ ଥିବା ପର୍ଯ୍ୟନ୍ତ..ମୁଁ କେବେ ନଥିଲି । ଯେତେ ପ୍ରକାର ତଦନ୍ତ କଲେ ମୁଁ ପ୍ରସ୍ତୁତ । ଯଦି ଅନ୍ୟାୟରେ ଥାନ୍ତା ମୁଁ ଚ୍ୟାଲେଞ୍ଜ ଦେଇକି ବିଧାୟକ ହୋଇ ଜିତିଲି ।
କାହାକୁ ଭଲ ପାଇଲି ତାହା ବ୍ୟକ୍ତିଗତ:
ସେ ଆହୁରି କହିଛନ୍ତି, ‘ବ୍ୟକ୍ତିଗତ ଭାବରେ ମୁଁ କାହାକୁ ଭଲ ପାଇଲି କାହାକୁ କଣ କଲି ସେଥିରେ ଯେଉଁଟା ନ୍ୟାୟ ନ୍ୟାୟ ଯାହା ଅନ୍ୟାୟ ଅନ୍ୟାୟ ସେଥିରେ କୌଣସି ଅସୁବିଧା ହେବ ନାହି । ମୋ ନାଁରେ ଥାନାରେ ଏ ପର୍ଯ୍ୟନ୍ତ ଗୋଟିଏ ବି ମାମଲା ନାହିଁ । 22 ବର୍ଷ ରାଜନୈତିକ କ୍ୟାରିୟରରେ କୌଣସି ମାମଲା ନାହିଁ ।’
ଋଷି ମୃତ୍ୟୁ ରହସ୍ୟ:
ଏହି ଘଟଣାଟି 2016ର । ମେ’ 6, 2016ରେ ଖଣ୍ଡଗିରି ଥାନା ଅଞ୍ଚଳରୁ ଏକ ହଷ୍ଚେଲ ଭିତରୁ ମିଳିଥିଲା ଇଞ୍ଜିନିୟରିଂ ଆଶୁତୋଷ ମହାନ୍ତି ଓରଫ ଋଷିଙ୍କ ମୃତତେଦହ । ପୋଲିସ ଏକ ଅପମୃତ୍ୟୁ ମାମଲାର ରୁଜୁ କରିଥିଲା । ଋଷିକୁ ହତ୍ୟା କରାଯାଇଥିବା ସେ ସମୟରେ ଅଭିଯୋଗ ଆଣିଥିଲେ ଋଷିଙ୍କ ବାପା ମା’ ।
ଋଷି ମୃତ୍ୟୁ ସହ କେମିତି ଯୋଡି ହେଲା ପୂର୍ବତନ ମେୟରଙ୍କ ନାଁ:
ଋଷି ମୃତ୍ୟୁର 6 ମାସ ପରେ ଅର୍ଥାତ ଡିସେମ୍ବର ମାସରେ ଏକ ଅଶ୍ଲୀଳ ଭିଡିଓ ସାମ୍ନାକୁ ଆସିଥିଲା । ଯାହାକୁ ନେଇ ତତ୍କାଳୀନ ଛାତ୍ର କଂଗ୍ରେସ ସଭାପତି ଇତିଶ ପ୍ରଧାନ ଏକ ସାମ୍ବାଦିକ ସମ୍ମିଳନୀ କରି ଏକ ଅଭିଯୋଗ ଆଣିଥିଲେ, ଏହି ମୃତ୍ୟୁ ପଛରେ ଶାସକ ଦଳର ଜଣେ ଜଣେ ନେତାଙ୍କ ସମ୍ପୃକ୍ତି ରହିଛି । ଏହି ଘଟଣାକୁ ପରେ ଛାତ୍ର କଂଗ୍ରେସ ମୁଦ୍ଦା କରିଥିଲା । ପରେ ବିଜେପି ମଧ୍ୟ ଆନ୍ଦୋଳନ କରିଥିଲା । ଗୋଟିଏ ଦିନରେ ବିଜେପି-ବିଜେଡି ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା ।
ସେ ସମୟରେ ତଦନ୍ତ ପରିସରକୁ ଆସିଥିଲେ ଅନନ୍ତ:
ଏହି ଘଟଣାକୁ ରାଜ୍ୟରେ ତୁମ୍ବିତୋଫାନ ଦେଖିବାକୁ ମିଳିଥିଲା । ଏହି ଘଟଣାକୁ ନେଇ ରାଜନୀତି ମଧ୍ୟ ସରଗରମ ହୋଇଥିଲା । ସେତେବେଳେ ତଦନ୍ତ ପରିସରକୁ ଆସିଥିଲେ ବର୍ତ୍ତମାନର ବିଧାୟକ ଅନନ୍ତ ନାରାୟଣ ଜେନା । ଏହାକୁ ନେଇ ବିଜେପି ଅନନ୍ତଙ୍କୁ ଟାର୍ଗେଟ କରିଥିଲା । ରାଜନୈତିକ ଚାପ ବଢିବା ପରେ ଡିପିସି ସତ୍ୟବ୍ରତ ଭୋଇଙ୍କ ତତ୍ତ୍ବାବଧାନରେ ଜଣେ ACP ରାଙ୍କର ଅଫିସର ତନାଘନା କରିଥିଲେ । ଋଷିଙ୍କ 3 ସାଙ୍ଗଙ୍କୁ ପଚରାଉଚରା ହୋଇଥିଲା ।
ମୃତ୍ୟୁର 10 ଦିନ ପୂର୍ବରୁ ଏମିତି ପୋଷ୍ଟ କରିଥିଲେ ଋଷି:
ଋଷିଙ୍କ ସନ୍ଦେହ ଜନକ ମୃତ୍ୟୁର 10 ଦିନ ପୂର୍ବରୁ ସୋସିଆଲ ମିଡିଆରେ ଏକ ପୋଷ୍ଟ କରିଥିଲେ ଋଷି । ଯେଉଁଥିରେ ସେ ଉଲ୍ଲେଖ କରିଥିଲେ 2 ଜଣ ବ୍ୟକ୍ତିଙ୍କ କାଉଣ୍ଟଡାଉନ ଆରମ୍ଭ । ଜଣେ ମହିଳା ଓ ରାଜନୈତିକ ବ୍ୟକ୍ତି ବୋଲି ଦର୍ଶାଇଥିଲେ । ଯାହାକୁ ନେଇ ଘଟଣା ଚର୍ଚ୍ଚା ହୋଇଥିଲା ଭିଡିଓ ସୁଟିଂ ପଛରେ ଋଷିଙ୍କ ଜଣେ ବାନ୍ଧବୀଙ୍କ ଭୂମିକା ଥିଲା । ଋଷିଙ୍କ ମା’ ବାପା ମଧ୍ୟ ଆପତ୍ତି ଉଠାଇଥିଲେ ପୋଲିସ ପାଖରେ ଅଭିଯୋଗ କରିଥିଲେ । ପୁଅର ମୃତ୍ୟୁ ପଛରେ ରାଜନୈତିକ ଷଡଯନ୍ତ୍ର ରହିଛି ବୋଲି କହିଥିଲେ । ପରେ ଏହାର ତଦନ୍ତ ରିପୋର୍ଟ ସାମ୍ନାକୁ ଆସିନଥିଲା । ବର୍ତ୍ତମାନ ପୁଣି ଏହି ମାମଲାର ତଦନ୍ତ କରିବାକୁ ଦାବି କରାଯିବ କହିବା ପରେ ପୁଣି ଚର୍ଚ୍ଚା ହେଉଛି ଋଷି ମୃତ୍ୟୁ ଉପରୁ ପରଦା ହଟିପାରେ ।
ଇଟିଭି ଭାରତ, ଭୁବନେଶ୍ବର
