ନୂଆଦିଲ୍ଲୀ: ୟୁକ୍ରେନ-ଋଷିଆ ଘମାଘୋଟ ଯୁଦ୍ଧ ମଧ୍ୟରେ ୟୁକ୍ରେନ ଗସ୍ତ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ରାଷ୍ଟ୍ରପତି ଭୋଲଡମିର ଜେଲେନସ୍କିଙ୍କ ନିୟନ୍ତ୍ରଣ କ୍ରମେ ସେ ଆସନ୍ତା ୨୩ ତାରିଖରେ ପ୍ରଥମ ଥର ୟୁକ୍ରେନ ଯିବେ । କିଛି ଦିନ ତଳେ ମୋଦି ଋଷିଆ ଗସ୍ତ କରିଥିଲେ । ଦୁଇ ଦେଶରେ ଜାରି ରହିଥିବା ଯୁଦ୍ଧ ମଧ୍ୟରେ ଏବେ ମୋଦିଙ୍କ ୟୁକ୍ରେନ ଗସ୍ତକୁ ବେଶ୍ ଗୁରୁତ୍ବପୂର୍ଣ୍ଣ ମନେ କରାଯାଉଛି ଏବଂ ଏହା ଉପରେ ସାରା ବିଶ୍ବର ନଜର ରହିଛି । ତେବେ ଋଷିଆ ପରେ ୟୁକ୍ରେନ ଗସ୍ତକୁ ଭାରତର ସନ୍ତୁଳନ ରକ୍ଷା ଆଭିମୁଖ୍ୟ ଭାବରେ ମଧ୍ୟ ଦେଖାଯାଉଛି । ତିନି ଦଶନ୍ଧି ମଧ୍ୟରେ କୌଣସି ପ୍ରଧାନମନ୍ତ୍ରୀ ୟୁକ୍ରେନ ଗସ୍ତରେ ଯାଉଛନ୍ତି ।
#WATCH | Secretary West, MEA, Tanmaya Lal says, " pm narendra modi will undertake an official visit to ukraine later this week on friday, august 23, on the invitation of ukrainian president volodymyr zelenskyy. this is also a landmark and a historic visit since this will be the… pic.twitter.com/xs71GtdsfT
— ANI (@ANI) August 19, 2024
- 21ରୁ ଦୁଇଦିନିଆ ପୋଲାଣ୍ଡ ଗସ୍ତ
ବିଦେଶ ବ୍ୟାପାର (ପଶ୍ଚିମ ରାଷ୍ଟ୍ରସମୂହ) ସଚିବ ଚନ୍ମୟଲାଲ ଗତକାଲି ସାପ୍ତାହିକ ପ୍ରେସମିଟରେ ପ୍ରଧାନମନ୍ତ୍ରୀଙ୍କ ଗସ୍ତ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିଥିଲେ । ପ୍ରଧାନମନ୍ତ୍ରୀ ମୋଦି ଅଗଷ୍ଟ ୨୩ରେ ୟୁକ୍ରେନ ଗସ୍ତ କରିବେ । ୟୁକ୍ରେନ- ଭାରତ ଦ୍ବିପାକ୍ଷିକ ସମ୍ପର୍କ ପ୍ରତିଷ୍ଠା ହେବାପରଠାରୁ ଏହା ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରଥମ ଗସ୍ତ । ମୋଦି ପ୍ରଥମେ ୨୧ ତାରିଖରେ ଦୁଉଦିନିଆ ଗସ୍ତରେ ପୋଲାଣ୍ଡରେ ପହଞ୍ଚିବେ । 22 ତାରିଖରେ ସେ ପାଲାଣ୍ଡରୁ କିଭ ଯାତ୍ରା କରିବେ । ମୋଦି ଟ୍ରେନ ମାଧ୍ୟମରେ ପାଲାଣ୍ଡରୁ କିଭ ଯାଇପାରନ୍ତି । ମାତ୍ର ଏସମ୍ପର୍କରେ ସରକାରୀ ଭାବେ କିଛି ପ୍ରକାଶ କରାଯାଇନି । ଉଭୟ ଋଷିଆ ଓ ୟୁକ୍ରେନ ସହ ଭାରତର ସ୍ବତନ୍ତ୍ର ସମ୍ପର୍କ ରହିଛି । ଦୁଇ ଦେଶ ମଧ୍ୟରେ ଜାରି ରହିଥିବା ସଙ୍କଟର କୂଟନୀତି ଓ ଆଲୋଚନା ମାଧ୍ୟମରେ ସମାଧାନ କରିବାକୁ ଗୁରୁତ୍ବ ଦେଇଆସିଛି ଭାରତ ।
- ବିଦେଶ ସଚିବଙ୍କ ସୂଚନା:-
ବୈଦେଶିକ ସଚିବ (ୱେଷ୍ଟ) ତନ୍ମୟ ଲାଲ କହିଛନ୍ତି, ‘‘ପ୍ରଧାନମନ୍ତ୍ରୀ ମୋଦି ଉଭୟ ୟୁକ୍ରେନ ଓ ଋଷିଆ ରାଷ୍ଟ୍ରପତିଙ୍କ ସହ ଆଲୋଚନା କରିଛନ୍ତି ଏବଂ ଏହି ବିବାଦର ଶାନ୍ତିପୂର୍ଣ୍ଣ ସମାଧାନ ପାଇଁ ସହଯୋଗ କରିବାକୁ ଚାହୁଁଛନ୍ତି । ଏଥିପାଇଁ ସମସ୍ତ ସମ୍ଭାବ୍ୟ ସମର୍ଥନ ଓ ସହଯୋଗ ପ୍ରଦାନ କରିବାକୁ ଭାରତ ପ୍ରସ୍ତୁତ । ଏପରି ସ୍ଥଳେ ଭାରତ ଓ ୟୁକ୍ରେନ ନେତାଙ୍କ ମଧ୍ୟରେ ଏହି ଆଲୋଚନାର ଫଳାଫଳ କ'ଣ ହେବା ତାହା ପୂର୍ବାନୁମାନ କରିବା ଆମ କାମ ନୁହେଁ ।’’
- ଋଷ-ୟୁକ୍ରେନ ସଙ୍କଟ ଓ ଭାରତର ଆଭିମୁଖ୍ୟ
ପ୍ରକାଶ ଥାଉକି, ୟୁକ୍ରେନ ଓ ଋଷିଆ ଯୁଦ୍ଧ ଆରମ୍ଭ ପରଠୁ ଭାରତ ପ୍ରଥମରୁ ଅତି ସନ୍ତୁଳିତ ଆଭିମୁଖ୍ୟ ରଖିଆସିଛି । ପାଶ୍ଚାତ୍ୟ ରାଷ୍ଟ୍ରମାନଙ୍କ କଟକଣା ସତ୍ତ୍ବେ ଋଷିଆ ସହ ବାଣିଜ୍ୟିକ କାରବାର ଜାରି ରଖିବା ସଙ୍ଗେ ସଙ୍ଗେ ଯୁଦ୍ଧ ପ୍ରଭାବିତ ୟୁକ୍ରେନକୁ ଆବଶ୍ୟକୀୟ ମେଡିସିନ ଓ ମାନବୀୟ ସହାୟତା ପ୍ରଦାନ କରିଛି । ଗୋଷ୍ଠୀ ନରପେକ୍ଷତା ବଜାୟ ରଖିଥିଲେ ମଧ୍ୟ ଭାରତ କେବେ ବି ୟୁକ୍ରେନ ଉପରେ ଆକ୍ରମଣ ପାଇଁ ଋଷିଆର ନିନ୍ଦା କରିନାହିଁ । ଏମିତିକି ଜାତିସଂଘରେ ମଧ୍ୟ ଋଷିଆ ବିରୋଧି ନିନ୍ଦା ପ୍ରସ୍ତାବ ଭୋଟିଂରୁ ନୂଆଦିଲ୍ଲୀ ବିରତ ରହିଥିଲା । ଏନେଇ ଭାରତର ଆଭିମୁଖ୍ୟରେ ସ୍ପଷ୍ଟତା ନଥିବା କହି ପାଶ୍ଚତ୍ୟ ରାଷ୍ଟ୍ରମାନେ ନିନ୍ଦା କରିଥିଲେ । ଏହାବ୍ୟତୀତ ନିର୍ବାଚନ ପରେ ଗତ ମାସରେ ପ୍ରଧାନମନ୍ତ୍ରୀ ମୋଦି ଋଷିଆ ଗସ୍ତ କରିଥିଲେ । ତାଙ୍କର ଏହି ଗସ୍ତ ଏବଂ ରାଷ୍ଟ୍ରପତି ପୁଟିନ ତାଙ୍କୁ ସୌହାର୍ଦ୍ଦପୂର୍ଣ୍ଣ ଆଲିଙ୍ଗନ କରିବାକୁ ନେଇ କିଭ୍ କଡା ନିନ୍ଦା ମଧ୍ୟ କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
