ତେଲ୍ ଅଭିଭ୍: ପ୍ରାୟ ବର୍ଷେ ହେବ ଇସ୍ରାଏଲ ଓ ହମାସ୍ ମଧ୍ୟରେ ଯୁଦ୍ଧ ଚାଲିଥିବା ବେଳେ ଗାଜା ଉପରେ ପ୍ରଚଣ୍ଡ ଆକ୍ରମଣ ଜାରି ରଖିଛି ଇସ୍ରାଏଲ ସେନା । ଏବେ ଇସ୍ରାଏଲ ପୂର୍ବ ଗାଜାର ଏକ ସ୍କୁଲକୁ ଟାର୍ଗେଟ କରି ଏୟାରଷ୍ଟ୍ରାଇକ କରିଛି । ଆକ୍ରମଣରେ ୧୦୦ରୁ ଅଧିକ ଲୋକଙ୍କ ଜୀବନ ଯାଇଥିବା ବେଳେ ଶତାଧିକ ଆହତ ହୋଇଛନ୍ତି । ସେହି ସ୍କୁଲରେ ପାଲେଷ୍ଟାଇନ ଯୁଦ୍ଧ ବିସ୍ଥାପିତମାନେ ଆଶ୍ରୟ ନେଇଥିଲେ । ଶନିବାର ସକାଳ ଆକ୍ରମଣ ହୋଇଥିବା ସ୍ଥାନୀୟ ସରକାରୀ ମିଡିଆ ଅଫିସ ପକ୍ଷରୁ ସୂଚନା ଦିଆଯାଇଛି ।
ସକାଳ ପ୍ରାର୍ଥନା ବେଳେ ସ୍କୁଲରେ ରକେଟ ମାଡ଼:
ହମାସ୍ ପରିଚାଳିତ ଗାଜା ସରକାରୀ ମିଡିଆ ଅଫିସ୍ ଅନୁସାରେ, ଆକ୍ରମଣ ହୋଇଥିବା ସ୍କୁଲରେ ବିସ୍ଥାପିତମାନେ ଆଶ୍ରୟ ନେଉଥିଲେ । ଶନିବାର ସକାଳେ ସେମାନେ ପ୍ରାର୍ଥନା କରୁଥିବାବେଳେ ଇସ୍ରାଏଲ ଆକ୍ରମଣ କରିଥିଲା । ସ୍କୁଲ ଉପରେ ୩ଟି ରକେଟ ମାଡ ହୋଇଥିଲା । ଏଥିରେ ଶତାଧିକ ଲୋକେ ମୃତାହତ ହୋଇଛନ୍ତି । ରକେଟ ମାଡ ଯୋଗୁଁ ସ୍କୁଲରେ ନିଆଁ ଲାଗିଯାଇଥିଲା । ଅନେକ ଲୋକ ନିଆଁରେ ଜଳି ପ୍ରାଣ ହରାଇଛନ୍ତି । ଅନ୍ୟପଟେ ଆକ୍ରମଣ ହୋଇଥିବା ସେହି ସ୍କୁଲରେ ସାଧାରଣ ନାଗରିକ ନୁହଁନ୍ତି ବରଂ ଆତଙ୍କବାଦୀ ଲୁଚିଥିବା ଇସ୍ରାଏଲ ଦାବି କରିଛି ।
ଏହା ମଧ୍ୟ ପଢନ୍ତୁ: ଇସ୍ରାଏଲର ଟାର୍ଗେଟ କିଲିଂ, ଭବିଷ୍ୟତ ଉପରେ କଣ ପଡିବ ପ୍ରଭାବ ? - Targeted Killings of Israel
ସପ୍ତାହେ ତଳେ ମଧ୍ୟ ଇସ୍ରାଏଲ ସେନା ଗାଜାର ୪ଟି ସ୍କୁଲକୁ ଟାର୍ଗେଟ କରିଥିଲା ଯେଉଁଥିରେ ୩୦ରୁ ଅଧିକ ଜଣଙ୍କ ମୃତ୍ୟୁ ଓ ଅନେକ ଆହତ ହୋଇଥିଲେ । ଇସ୍ରାଏଲ ଗାଜାରେ ସ୍କୁଲ ସମେତ ଆବାସିକ ବିଲ୍ଡିଂଗୁଡିକ ଉପରେ ଆକ୍ରମଣ କରୁଛି ଏବଂ ଦାବି କରୁଛି ଯେ, ସେହିସବୁ ସ୍ଥାନରେ ଆତଙ୍କବାଦୀ ଲୁଚିକି ଅଛନ୍ତି । ସେମାନେ ହମାସ୍ କମାଣ୍ଡ କଣ୍ଟ୍ରୋଲ ସେଣ୍ଟରରୁ ନିଜର ଗତିବିଧି ଚଳାଉଛନ୍ତି ।
ମଲେଣି ୪୦ ହଜାରରୁ ଅଧିକ ନାଗରିକ:
ଅକ୍ଟୋବର ୭ରୁ ୧୦ ମାସ ହେଲା ଇସ୍ରାଏଲ ଓ ହମାସ୍ ମଧ୍ୟର ଯୁଦ୍ଧ ଜାରି ରହିଛି । ପ୍ରଥମେ ହମାସ୍ ଇସ୍ରାଏଲ ଉପରେ ଆକ୍ରମଣ କରିଥିଲା ଓ ଏଥିରେ ୧୨୦୦ରୁ ଅଧିକ ଇସ୍ରାଏଲ ନାଗରିକଙ୍କ ମୃତ୍ୟୁ ହୋଇଥିଲା ଓ ୨୫୦ ଜଣକୁ ପଣବନ୍ଦୀ କରିଥିଲା ହମାସ୍ । ଏହାର ଜବାବରେ ଗାଜା ଉପରେ ଘନ ଘନ ଏୟାରଷ୍ଟ୍ରାଇକ କରୁଛି ଇସ୍ରାଏଲ ସେନା । ଏହି ଆକ୍ରମଣର ଅଦ୍ୟାବଧି ୪୦ ହଜାରରୁ ଅଧିକ ପାଲେଷ୍ଟାଇନ ନାଗରିକଙ୍କ ମୃତ୍ୟୁ ହୋଇସାରିଛି । ଅସ୍ତ୍ରବିରତି ପାଇଁ ଦୁଇ ପକ୍ଷ ମଧ୍ୟରେ ଏକାଧିକ ରାଉଣ୍ଡ ଆଲୋଚନା ହୋଇଥିଲେ ହେଁ ରକ୍ତପାତରେ ବ୍ରେକ ଲାଗିପାରୁନି ।
