ଭୁବନେଶ୍ୱର: ୨୦୨୪ ବର୍ଷ ସିନେମା ଶିଳ୍ପ ଅନେକ ଉତ୍ଥାନ ପତନକୁ ନେଇ ଗତି କରିଥିବା ବେଳେ ପାଇଛି ଅନେକ ସଫଳତା । ଏହି ସଫଳତା ମଧ୍ୟରେ ନୂଆ ବର୍ଷରେ ଅନେକ ଓଡ଼ିଆ ଫିଲ୍ମ ପରଦାକୁ ଆସିବାକୁ ଥିବା ବେଳେ ହଲ ଅଭାବକୁ ନେଇ ପ୍ରଭାବିତ ହୋଇଛି କିଛି ସିନେମା । ରାଜ୍ୟରେ ବଲିଉଡ଼ ସିନେମାକୁ ହଲ ମିଳୁଥିବା ବେଳେ ଆଞ୍ଚଳିକ ସିନେମାକୁ କିନ୍ତୁ ମିଳୁନାହିଁ । ଏହାକୁ ନେଇ ଓଡ଼ିଆ ଫିଲ୍ମ 'ମିଶିରି ଓ ୱାଇଫ'କୁ ହଲ ମିଳୁନଥିବା ବେଳେ ଏନେଇ ଉଦବେଗ ପ୍ରକାଶ କରିଛନ୍ତି ପ୍ରଯୋଜକ ସ୍ଥିତ ପଟ୍ଟନାୟକ । 'ମିଶିରି ଓ ୱାଇଫ' ଫିଲ୍ମ ନୂଆବର୍ଷରେ ପରଦାକୁ ଆସିବ ହେଲେ ଆବଶ୍ୟକ ହଲ୍ ମିଳୁନଥିବା ନେଇ ପ୍ରତିକ୍ରିୟା ରଖିଛନ୍ତି ପ୍ରଯୋଜକ ସ୍ଥିତ ପଟ୍ଟନାୟକ । ଏଥିସହ ସେ 2024 ବିଦାୟୀ ବର୍ଷରେ ଓଲିଉଡ଼ ଇଣ୍ଡଷ୍ଟ୍ରି ପାଇଁ କିପରି ରହିଥିଲା ତାହା ମଧ୍ୟ ଗୁରୁତ୍ୱାରୋପ କରିଛନ୍ତି ।
'2024 ଓଡ଼ିଆ ଇଣ୍ଡଷ୍ଟ୍ରି ପାଇଁ ପ୍ରେରଣାଦାୟକ ଥିଲା'
2024 ଓଡ଼ିଆ ଇଣ୍ଡଷ୍ଟ୍ରି ଓଲିଉଡ଼ ଇଣ୍ଡଷ୍ଟ୍ରି ପାଇଁ କିପରି ରହିଥିଲା ? ସେ ନେଇ ପ୍ରଯୋଜକ ସ୍ଥିତ ପଟ୍ଟନାୟକ କହିଛନ୍ତି, ''2024 ଓଡ଼ିଆ ଇଣ୍ଡଷ୍ଟ୍ରି ପାଇଁ ପ୍ରେଣାଦାୟକ ଥିଲା । 2024ରେ ପ୍ରାୟ ସିନେମା 84 ଟି ରିଲିଜ ହୋଇଛି । ଏଥିରୁ 40ଟି ଫିଲ୍ମ ହଲରେ ରିଲିଜ ହୋଇଥିବା ବେଳେ 44ଟି ଓଟିଟି ଓ ଟିଭିରେ ରିଲିଜ ହୋଇଛି । ଅନେକ କଳାକାର, ଟେକ୍ନିସିଆନ, ପ୍ରଯୋଜକ ଏବଂ ନିର୍ଦ୍ଦେଶକ ଏହି ବର୍ଷ ଡେବ୍ୟୁ କରିଛନ୍ତି । ଫିଲ୍ମ 'କୁହୁଡି' ହେଉ 'ପାବାର' ହେଉ । ରେକର୍ଡ ଭାଙ୍ଗିଥିବା 'କର୍ମ', 'ପରବ', ଭିଲେନ ଭଲି ହାଇ ବଜେଟ ଫିଲ୍ମ 2024ରେ ରିଲିଜ ହୋଇଛି । ଯାହା ଦର୍ଶକଙ୍କ ମନ ଜିତିଛି । ଭିନ୍ନ ଭିନ୍ନ ଧରଣର କାହାଣୀ ସହ ପରଦାକୁ ଆସିଛି ଫିଲ୍ମ ।''
'ଓଡ଼ିଆ ଫିଲ୍ମକୁ ମିଳୁନି ହଲ୍'
ମୋର 'ଅତିଥି' ଫିଲ୍ମ ଆସିଥିଲା ଏବଂ 'ମିଶିରି' ଫିଲ୍ମ 2024ରେ ରିଲିଜ ହେବାର ଥିଲା । ହେଲେ ପୁଣି ସବୁ ଜିନିଷ ଟିକେ ଥିଲେ ମଧ୍ୟ କିଛି ଜାଗାରେ ଆମେ ଅଟକି ଯାଉଛୁ । ଓଡ଼ିଆ ଫିଲ୍ମର ପ୍ରଯୋଜକ, ବିତରକ ଏବଂ ସିନେମା ହଲ ମାଲିକଙ୍କ ମଧ୍ୟରେ ତାଳମେଳ ଠିକ ରହୁନଥିବାରୁ ଓଡ଼ିଆ ଫିଲ୍ମକୁ ହଲ୍ ମିଳୁନି । 'ପୁଷ୍ପା 2' ବକ୍ସ ଅଫିସରେ ହିଟ୍ ହେଲା ହେଲେ ଓଡ଼ିଆ ଫିଲ୍ମକୁ ହଲ୍ ମିଳିଲାନି । ଏନେଇ 'ପରବ' ଏହାର ଶିକାର ହେଲା । ଏହା ପରେ 'ମିଶିରି' ପିଲ୍ମ ଯାହା 2024ର ଶେଷ ଫିଲ୍ମ ହୋଇଥାନ୍ତା । ହେଲେ ତାହା ରିଲିଜ ହୋଇପାରିଲା ନାହିଁ । ଏହି ଫିଲ୍ମ 2025ରେ ରିଲିଜ ହେବ । ବର୍ଷର ପ୍ରଥମ ଫିଲ୍ମ ଭାବେ ଦର୍ଶକଙ୍କ ମନ ଛୁଇଁବ ବୋଲି ଆଶା କରୁଛି । ଜଣେ ପ୍ରଡ୍ୟୁସର ହିସାବରେ ମୁଁ ଚାହିଁବି ଫିଲ୍ମକୁ ଅଧିକ ହଲ୍ ମିଳୁ ଏବଂ ଏହା ଲୋକଙ୍କ ପାଖରେ ପହଞ୍ଚୁ । ମୁଁ ଆଶା କରୁଛି ଏହି ଫିଲ୍ମ ଯୁବପିଢିଙ୍କୁ ବେଶ ଆକୃଷ୍ଟ କରିବ ।
ଏହା ମଧ୍ୟ ପଢନ୍ତୁ: ନୂଆବର୍ଷରେ ଆସୁଛି ଏସବୁ ଓଡ଼ିଆ ଫିଲ୍ମ, ଧମାକା କରିବେ ବର୍ଷା ପ୍ରୟଦର୍ଶିନୀ-ସୂର୍ଯ୍ୟମୟୀ
ମିଶିରି ବିଷୟରେ କହିବାକୁ ଗଲେ, ଚଳିତ ଜାନୁଆରୀରେ ରିଲିଜ ହେବ ଓଡ଼ିଆ ରୋମାଣ୍ଟିକ ଫିଲ୍ମ 'ମିଶିରି'। ନିର୍ମଲ୍ ଜୈସୱାଲ୍ ପ୍ରଡ଼କସନ୍, ରିଲ୍ସ ଏନ ରିଲ୍ସ ଏବଂ ଏ ଏ ଏଣ୍ଟରଟେଣ୍ଟମେଣ୍ଟ ଦ୍ୱାରା ପ୍ରଯୋଜିତ ଓଡ଼ିଆ ଚଳଚ୍ଚିତ୍ର "ମିଶିରି" । ଏହି ଚଳଚ୍ଚିତ୍ରର ପ୍ରଯୋଜକ ଭାବେ ନିର୍ମଲ୍ ଜୈସୱାଲଙ୍କ ସହ ସହପ୍ରଯୋଜକ ସ୍ଥିତ ପଟ୍ଟନାୟକ ଓ ଆକାଂକ୍ଷା ପାଢୀ ରହିଛନ୍ତି । ଫିଲ୍ମର ଲେଖକ ଶିବା ରହିଥିବା ବେଳେ ନିର୍ଦ୍ଦେଶକ ଶିଶିର ଓ ପିନାକୀ ରହିଛନ୍ତି । ସଙ୍ଗୀତ ଅଭିଷେକ, ଇଶାନ,କୌଶିକ ରହିଛନ୍ତି। ମୁଖ୍ୟ ଭୂମିକାରେ ଅଭିନେତ୍ରୀ ରୂପଶ୍ରୀ ପଣ୍ଡା ରହିଥିବା ବେଳେ ବିପକ୍ଷରେ ରହିଛନ୍ତି ଅଭିନେତା ଭିଭାସ ଓ ପ୍ରସନଜିତ । ଏହି ଫିଲ୍ମ ଆସନ୍ତା 4ରେ ହେବ ରିଲିଜ ।
ବ୍ୟୁରୋ ରିପୋର୍ଟ, ଇଟିଭି ଭାରତ
