ହାଇଦ୍ରାବାଦ: ତେଲେଙ୍ଗାନା ପୋଲିସକୁ ବଡ଼ ସଫଳତା । ମୁଲୁଗୁରେ ବଡ଼ ଧରଣର ମାଓ ଅପରେସନ ସଫଳ ହୋଇଛି । ଏନକାଉଣ୍ଟରରେ ସୁରକ୍ଷାକର୍ମୀଙ୍କ ଗୁଳିରେ ୭ ଜଣ ମାଓବାଦୀ ନିହତ ହୋଇଥିବା ସୂଚନା ମିଳିଛି । ଆଜି (ରବିବାର) ମୁଲୁଗୁ ଜିଲ୍ଲାର ଇଟର୍ନଗରମ ଚଲପାକା ଜଙ୍ଗଲ ତଥା ତେଲେଙ୍ଗାନା ଏବଂ ଛତିଶଗଡ଼ ସୀମାବର୍ତ୍ତୀ ଅଞ୍ଚଳରେ ସର୍ଚ୍ଚ ଅପରେସନ ବେଳେ ସୁରକ୍ଷା କର୍ମୀ ଏବଂ ମାଓବାଦୀଙ୍କ ମଧ୍ୟରେ ଗୁଳିବିନିମୟ ହୋଇଥିଲା । ଯାହାଫଳରେ ୭ ଜଣ ହାର୍ଡକୋର ମାଓବାଦୀ ସୁରକ୍ଷାକର୍ମୀଙ୍କ ଗୁଳିରେ ନିହତ ହୋଇଥିଲେ ।
ଦୁଇଟି AK 47 ଜବତ:
ତେଲେଙ୍ଗାନା ପୋଲିସର ଆଣ୍ଟି ନକ୍ସଲ ଫୋର୍ସ ଏବଂ ଗ୍ରେହାଉଣ୍ଡସ୍ ମଧ୍ୟରେ ମିଳିତ ଅପରେସନ ବେଳେ ଏହି ଏନକାଉଣ୍ଟର ହୋଇଥିବା ପୋଲିସ ସୂଚନା ଦେଇଛି । ବର୍ତ୍ତମାନ ମଧ୍ୟ ଏହି ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଥିବା ଅଧିକାରୀମାନେ ସୂଚନା ଦେଇଛନ୍ତି । ଘଟଣାସ୍ଥଳରୁ ବିଭିନ୍ନ ମାଓ ସାମଗ୍ରୀ ଜବତ ହୋଇଥିବା ବେଳେ ଦୁଇଟି AK 47 ରାଇଫଲ ମଧ୍ୟ ଜବତ ହୋଇଛି ।
୭ ଜଣ ହାର୍ଡକୋର ମାଓବାଦୀ ନିହତ:
ମୃତ ମାଓବାଦୀ ମାନେ ହେଲେ କୁରୁସାମ ମଙ୍ଗୁ (35),ଇଗୋଲାପୁ ମଲାୟା ଓରଫ୍ ମଧୁ (43) , ମୁସାକି ଦେବଲ ଓରଫ୍ କରୁଣାକର (22), ମୁସାକି ଜମୁନା (23) , ଜୟସିଙ୍ଗ (25), କିଶୋର (22) ଏବଂ କାମେଶ (23) ବୋଲି ଜଣାପଡିଛି।
ତେଲେଙ୍ଗାନା ଡ଼ିଜିପିଙ୍କ ସମୀକ୍ଷ ବୈଠକ:
ଗତ ୧୧ ତାରିଖରେ ଭଦ୍ରାଦ୍ରୀ କୋଥାଗୁଡେମ, ମୁଲୁଗୁ ଏବଂ ଜୟଶଙ୍କର ଭୁପାଲପାଲ୍ଲି ଜିଲ୍ଲାର ପୋଲିସ ଅଧିକାରୀଙ୍କ ସହ ସମୀକ୍ଷା ବୈଠକ କରିଥିଲେ ତେଲେଙ୍ଗାନା ପୋଲିସ ମହାନିର୍ଦ୍ଦେଶକ । ଏହି ଅବସରରେ ମାଓ ଗତିବିଧିକୁ ନିଜର ରଖିବା ପାଇଁ ସୀମାବର୍ତ୍ତୀ ଅଞ୍ଚଳରେ କାର୍ଯ୍ୟ କରୁଥିବା ପୋଲିସ ଅଧିକାରୀଙ୍କୁ ଛତିଶଗଡ ପୋଲିସ ସହ ସମନ୍ବୟ ରକ୍ଷାକରି କାର୍ଯ୍ୟ କରିବା ପାଇଁ ଅନୁରୋଧ କରିଥିଲେ ।
ଛତିଶଗଡ଼ରେ ୧୦ ଜଣ ନକ୍ସଲ ନିହତ ହୋଇଥିଲେ:
ଏହା ପୂର୍ବରୁ ଛତିଶଗଡ଼ ବସ୍ତର ଡିଭିଜନ ସୁକମା ଜିଲ୍ଲାରେ ନକ୍ସଲ ବିରୋଧୀ ଅପରେସନ ସୁରକ୍ଷାବଳକୁ ମିଳିଥିବା ବଡ଼ ସଫଳତା । ନିପାତ ହୋଇଥିଲେ ୧୦ ଜଣ ନକ୍ସଲ । ଘଟଣା ସ୍ଥଳରୁ ପୋଲିସ ଅତ୍ୟାଧୁନିକ ରାଇଫଲ ସମେତ ଅନ୍ୟ ମାରଣାସ୍ତ୍ର ଓ ମାଓସାମଗ୍ରୀ ଜବତ ହୋଇଥିବା ସୂଚନା ମିଳିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
