ହାଇଦ୍ରାବାଦ: ଗ୍ଲାସ ଫ୍ୟାକ୍ଟ୍ରିରେ ଫାଟିଲା କମ୍ପ୍ରେସର । ବିସ୍ଫୋରଣରେ ଅକାଳରେ ଆଖି ବୁଜିଛନ୍ତି 5 ଜଣ ଶ୍ରମିକ । ମୃତ ଶ୍ରମିକଙ୍କ ମଧ୍ୟରେ କିଛି ଓଡ଼ିଆ ଥିବା ଜଣାପଡ଼ିଛି । ତେଲେଙ୍ଗାନା ରଙ୍ଗାରେଡ୍ଡି ଜିଲ୍ଲାର ଶାଦନଗର ସ୍ଥିତ ସାଉଥ ଗ୍ଲାସ ପ୍ରାଇଭେଟ ଲିମିଟେଡରେ ଏଭଳି ଭୟଙ୍କର ଅଘଟଣ ଘଟିଛି । ଏହାପରେ ଉକ୍ତ ଶିଳ୍ପାଞ୍ଚଳରେ ଭୟର ବାତାବରଣ ଖେଳିଯାଇଛି । ମୃତକଙ୍କ ମଧ୍ୟରେ ଓଡ଼ିଆ ସମେତ ବିହାର ଓ ଉତ୍ତର ପ୍ରଦେଶରୁ ଶ୍ରମିକ ଥିବା ଜଣାପଡ଼ିଛି । ଅନ୍ୟପଟେ 15ରୁ ଅଧିକ ଶ୍ରମିକ ଆହତ ହୋଇଛନ୍ତି ।
ଏହି ଅଘଟଣରେ 5 ଜଣଙ୍କ ମୃତ୍ୟୁ ଘଟିଥିବା ବେଳେ ମୃତକଙ୍କ ମଧ୍ୟରେ ଓଡ଼ିଶା, ବିହାର ଓ ଉତ୍ତର ପ୍ରଦେଶରୁ ଶ୍ରମିକ ଅଛନ୍ତି । ମୃତକମାନେ ହେଉଛନ୍ତି ଉତ୍ତର ପ୍ରଦେଶର ନିକିତ(22), ରାମସେତୁ (24) । ସେହିପରି ବିହାରରୁ ଚିତ୍ତରଞ୍ଜନ (25) ଓ ରାମପ୍ରକାଶ (45) ଓ ଓଡ଼ିଶାରୁ 25 ବର୍ଷୀୟ ଯୁବକ ରତିକାନ୍ତ ବୋଲି ଜଣାପଡ଼ିଛି । ଆହତ ଶ୍ରମିକମାନେ ଗୁରୁତର ଅବସ୍ଥାରେ ଅଛନ୍ତି । ଏନେଇ ସୂଚନା ପାଇବା ପରେ ସ୍ଥାନୀୟ ପୋଲିସ ଓ ଅଗ୍ନିଶମ ବିଭାଗ ଟିମ ତୁରନ୍ତ ଘଟଣାସ୍ଥଳରେ ପହଞ୍ଚିଛି । ପ୍ରାଥମିକ ସୂଚନା ଅନୁସାରେ କମ୍ପ୍ରେସର ଫାଟିବା ଦ୍ବାରା ବିସ୍ଫୋରଣ ଘଟିଛି ବୋଲି କୁହାଯାଉଛି । ମାତ୍ର ତଦନ୍ତ ପ୍ରକ୍ରିୟା ଆଗକୁ ବଢିଲେ ବିସ୍ଫୋରଣର ପ୍ରକୃତ କାରଣ ଜଣାପଡ଼ିବ ବୋଲି ଫ୍ୟାକ୍ଟ୍ରି କର୍ତ୍ତୃପକ୍ଷ କହିଛନ୍ତି ।
ଏହା ବି ପଢନ୍ତୁ- ଓମାନରେ ଫସିଛନ୍ତି ଓଡ଼ିଆ ଶ୍ରମିକ, ଉଦ୍ଧାର ପାଇଁ ଭିଡିଓରେ ଆକୁଳ ନିବେଦନ
ଗୁରୁତର ଆହତ ହୋଇଥିବା ଶ୍ରମିକଙ୍କୁ ଓସମାନିଆ ଓ ଗାନ୍ଧୀ ହସ୍ପିଟାଲରେ ଭର୍ତ୍ତି କରାଯାଇଛି । ବିସ୍ଫୋରଣ ପରେ ନିଆଁ ଯେପରି ଅନ୍ୟ ସ୍ଥାନକୁ ନ ବ୍ୟାପେ, ସେଥିଲାଗି ଆବଶ୍ୟକ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି । ସେପଟେ ଘଟଣାସ୍ଥଳରେ ଶମଶାବାଦ ଡିସିପି ରାଜେଶ ମଧ୍ୟ ଉପସ୍ଥିତ ରହି ପ୍ରତ୍ୟକ୍ଷ ଭାବେ ସ୍ଥିତିର ସମୀକ୍ଷା କରିଛନ୍ତି ।
ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀଙ୍କ ପ୍ରତିକ୍ରିୟା:- ବିସ୍ଫୋରଣ ନେଇ ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀ ପ୍ରତିକ୍ରିୟା ରଖିଛନ୍ତି । ଗୁରୁତରଙ୍କୁ ଆବଶ୍ୟକ ଚିକିତ୍ସା ସୁବିଧା ଯୋଗାଇବାରେ ଯେପରି ଅବହେଳା ନ ହୁଏ ସେଥିଲାଗି ଜିଲ୍ଲାପାଳଙ୍କୁ ସେ ନିର୍ଦ୍ଦେଶ ଦେଇଛନ୍ତି । ଏହାସହିତ ପୋଲିସ, ଅଗ୍ନିଶମ ବିଭାଗ ଓ ମେଡିକାଲ ଟିମ ଉଦ୍ଧାର କାର୍ଯ୍ୟକୁ ତ୍ବରାନ୍ବିତ କରିବା ଲାଗି ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।
Shocked to learn about the death of 6 workers in the horrific accident at south glass pvt limited at Shadnagar
— KTR (@KTRBRS) June 28, 2024
My heartfelt condolences to the families of the deceased and prayers for the swift recovery of those injured
Appeal to Telangana Government to immediately conduct a…
ସମବେଦନା ଜଣାଇଲେ KTR:- ବିଆରଏସ କାର୍ଯ୍ୟକାରୀ ସଭାପତି କେଟିଆର ଶାଦଗନର ବିସ୍ଫୋରଣ ସମ୍ପର୍କରେ ପ୍ରତିକ୍ରିୟା ରଖିଥିବା ବେଳେ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି । ଏହାସହିତ ରାଜ୍ୟ ସରକାର ଶିଳ୍ପାଞ୍ଚଳରେ ଏଭଳି ଅଘଟଣକୁ ଏଡ଼ାଇବା ଲାଗି ଆବଶ୍ୟକୀୟ ପଦକ୍ଷେପ ଗ୍ରହଣ କରିବା ଉଚିତ ବୋଲି ସେ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
