कर्नाटकात कॉंग्रेसला 18 ते 26 जागा मिळण्याची शक्यता - डी. के. शिवकुमार - D K Shivakumar Shirdi Visit

अहमदनगर (शिर्डी) D K Shivakumar Shirdi Visit : कर्नाटक राज्याचे उपमुख्यमंत्री डि. के. शिवकुमार आज (5 मे) महाराष्ट्र दौऱ्यावर होते. शिवकुमार यांनी आज भिमाशंकर जोतिर्लिंगासह शिर्डी साईबाबांच्या दर्शनासाठी हजेरी लावलीय. आपल्या काही सहकाऱ्यांसमवेत ते बंगलोरहून खास विमानाने थेट शिर्डी विमानतळावर आले. शिर्डी विमानतळाहून हेलिकॉप्टरने त्यांनी भिमाशंकर जोतिर्लिंगला जाऊन महादेवाचे मनोभावे दर्शन घेतले. त्यानंतर पुन्हा शिर्डीत येत त्यांनी शिर्डीच्या साई मंदिरात जात साई समाधीचे मनोभावे दर्शन घेतले आहे. साईबाबांच्या दर्शनानंतर गुरुस्थानाचेही दर्शन यावेळी शिवकुमार यांनी घेतले आहे.

 

कर्नाटकात 18 ते 26 जागा मिळण्याची शाश्वती : साईबाबांच्या दर्शनानंतर प्रसारमाध्यमांशी बोलताना जनतेच्या कल्याणासाठी भिमाशंकर येथील महादेव आणि शिर्डी साईबाबांच्या चरणी प्रार्थना केली असल्याचं शिवकुमार यांनी सांगितलं आहे. यावेळी कर्नाटकात आम्हाला 18 ते 26 जागांवर यश मिळेल, असा विश्वास व्यक्त केला आहे. साऊथ इंडियामध्ये सिंगल डिजिट जागा मिळतील असंही यावेळी शिवकुमार म्हणाले आहे. यावेळी साईबाबा संस्थानचे मुख्य कार्यकारी अधिकारी गोरक्ष गाडीलकर, साईबाबा मंदिराचे सुरक्षा प्रमुख रोहिदास माळी, जनसंपर्क विभागाचे अधिकारी प्रशांत सूर्यवंशी उपस्थित होते.